ខេត្តកំពត ៖ បុរសជាងសំណង់ម្នាក់ ខណៈឡើងប្រក់ដំបូលព្រះវិហារក្រោមកំដៅថ្ងៃក្តៅហែង ស្រាប់តែភ្លាត់ស្នៀតរអិលធ្លាក់ពីលើដំបូលចុះមកក្រោម ដែលមានកម្ពស់ប្រហែល១៥ម៉ែត្រ បណ្តាលឱ្យស្លាប់ភ្លាមៗយ៉ាងអណោចអធ័ម ហេតុការណ៍នេះកើតឡើងកាលពីវេលាម៉ោង០៣ និង១៥នាទីរសៀលថ្ងៃទី១១ឧសភា ស្ថិតត្រង់ចំណុចព្រះវិហារ ក្នុងបរិវេណវត្តអង្គជុំត្រពាំងឈូក ឃុំបឹងសាលាខាងជើង ស្រុកកំពង់ត្រាច ខេត្តកំពត ។ ជនរងគ្រោះឈ្មោះតុប ឌី អាយុ៥៣ឆ្នាំ មានទីលំនៅក្នុងភូមិគាថាវង្ស ឃុំត្រពាំងសាលាខាងលិច ស្រុកបន្ទាយមាស ខេត្តកំពត។
តាមប្រភពពីក្រុមជាងសំណង់ឱ្យដឹងថា មុនពេលជួបរឿងអកុសលនេះ ជនរងគ្រោះព្រមទាំងជាងសំណង់ឯទៀត នាំគ្នាឡើងប្រក់ដំបូលព្រះវិហារ ហើយការរអិលធ្លាក់ចុះពីលើដំបូលនេះ សង្ស័យជនរងគ្រោះទ្រាំទ្រនឹងកំដៅថ្ងៃមិនបាន ក៏ទៅជាវិលមុខទើបរអិលធ្លាក់ដាំក្បាលពីលើដំបូលព្រះវិហារ កម្ពស់ប្រហែល១៥ម៉ែត្របណ្តាលឱ្យស្លាប់ភ្លាមៗមួយរំពេចតែម្តង។
ក្រុមជាងសំណង់បន្តថា តាមទម្លាប់ជាងសំណង់ទាំងអស់់ ចាប់ផ្តើមបំពេញការងារចាប់ពីម៉ោង៧ព្រឹករហូតដល់ម៉ោងជាង១១ថ្ងៃ ទើបនាំគ្នាពិសារបាយ លុះម៉ោងប្រហែល១និង៣០នាទីក៏ចាប់ផ្តើម បន្តការងារជាធម្មតា ប៉ុន្តែនៅថ្ងៃកើតហេតុនេះ អាកាសធាតុក្តៅខ្លាំងខុសធម្មតា ដែលធ្វើឱ្យក្រុមជាងសំណង់ដែលទទួលរ៉ាប់រងផ្នែកប្រក់ដំបូល ត្រូវប្រឈមនឹងការលំបាក ព្រោះការប្រក់ដំបូលគ្មានកន្លែងណា អាចជ្រកម្លប់បានឡើយ ទើបធ្វើឱ្យជនរងគ្រោះត្រូវវិលមុខហើយរបូតដៃធ្លាក់ចុះមកក្រោមបណ្តាលឱ្យស្លាប់មួយរំពេច។
ចែករំលែកព័តមាននេះ