រាជធានីភ្នំពេញ ៖ គិតមកត្រឹមថ្ងៃ១១ ខែឧសភា គណៈកម្មាធិការជាតិរៀបចំការបោះ ឆ្នោតហៅកាត់ថា គ.ជ.ប.បានទទួលចុះបញ្ជីបេក្ខជនឈរឈ្មោះគណបក្សនយោបាយ ដែលដាក់បេក្ខភាពឈរសម្រាប់ ការបោះឆ្នោត បានចំនួន៣ និង៥គណបក្សកំពុងពិនិត្យសម្រេច។ នេះបើតាមអ្នកនាំពាក្យ គ.ជ.ប.។ គិតចាប់ពីថ្ងៃទី៣០ មេសា ដល់ថ្ងៃទី១១ ខែឧសភា គឺរយៈពេល១២ថ្ងៃ ដែល គ.ជ.ប.បានប្រកាស ទទួលចុះបញ្ជីបេក្ខជនឈរឈ្មោះរបស់គណបក្សនយោបាយសម្រាប់ការបោះឆ្នោត ជ្រើសតាំងអ្នក តំណាងរាស្ត្រអាណត្តិទី៦ រដ្ឋសភា។ លោក ឌឹម សុវណ្ណារុំ អ្នកនាំពាក្យ គ.ជ.ប. បានឲ្យដឹងថា គិតចាប់ពីទទួលពាក្យចុះបញ្ជីបេក្ខជនឈរឈ្មោះបោះឆ្នោត និងចុះបញ្ជីគណបក្សនយោបាយ ចាប់ពីថ្ងៃទី៣០ មេសា ឆ្នាំ២០១៨មក គ.ជ.ប. បានទទួលចុះបញ្ជីបេក្ខជន គណបក្សនយោបាយដែលបានមកសុំចុះបញ្ជីចំនួន៨ ក្នុងនោះគណបក្សនយោបាយចំនួន៣ គឺគណបក្សប្រជាជនកម្ពុជា គណបក្ស យុវជនកម្ពុជា និងគណបក្សសញ្ជាតិកម្ពុជា ត្រូវបាន គ.ជ.ប.សម្រេ ចទទួលស្គាល់ជាផ្លូវការ។ ចំណែក គណបក្សចំនួន៥ទៀត គ.ជ.ប.កំពុងពិនិត្យពាក្យ ដែលសុំមកចុះបញ្ជីបេក្ខជនឈរឈ្មោះ។
ជាមួយគ្នានោះដែរអ្នកនាំពាក្យក៏បានឲ្យដឹងថា រហូតមកដល់ថ្ងៃនេះមានគណបក្សចំនួន១៥ បានយកទម្រង់១០០៨ ទៅបំពេញបែបបទ ដើម្បីយកមកសុំចុះបញ្ជីបេក្ខជនឈរឈ្មោះ បោះឆ្នោតនៅពេលខាងមុខនេះ។ លោកក៏បានឲ្យដឹងថាគណបក្សចំនួន៥ដែល គ.ជ.ប. កំពុងពិនិត្យ និងសម្រេចនោះមាន ៖ ១.គណបក្សហ្វ៊ុនស៊ិនប៉ិច ២.គណបក្សខ្មែររួបរួមជាតិ ៣. គណបក្សខ្មែរតែមួយ ៤.គណបក្សប្រជាធិបតេយ្យមូលដ្ឋាន និង៥.គណបក្សសំបុកឃ្មុំសង្គម ប្រជាធិបតេយ្យ។ គួររំឮកថា គណៈកម្មាធិការជាតិរៀបចំការបោះឆ្នោត បានចាប់ផ្តើមការចុះបញ្ជីគណបក្សនយោបាយឈរឈ្មោះ បោះឆ្នោត និងបញ្ជីឈ្មោះបេក្ខជនតំណាងរាស្ត្រ សម្រាប់ការបោះឆ្នោតជ្រើសតាំងតំណាងរាស្ដ្រ នីតិកាលទី៦ ឆ្នាំ២០១៨ មានរយៈពេល ១៥ថ្ងៃគឺ ចាប់ពីថ្ងៃទី៣០ ខែមេសា ដល់ថ្ងៃទី១៤ ខែឧសភា ឆ្នាំ២០១៨។ ទោះបីជា គ.ជ.ប.ធ្លាប់បានសម្តែងក្តីសង្ឃឹមថា ការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦មានគណបក្សចូលរួមច្រើនក្តី ក៏នៅមានគណបក្សមួយចំនួនបានប្រកាសមិនចូល រួមនោះទេដូចជាគណបក្សសិទ្ធិមនុស្ស គណបក្សអំណាចខ្មែរ គណបក្ស ភ្លើងទៀន ជាដើម។
ការប្រកាសមិនចូលរួមរបស់គណបក្សនយោបាយខាងលើនេះ បានអះអាងថា ស្ថានការណ៍នយោបាយនៅកម្ពុជាមិនទាន់មានភាពល្អប្រសើរនោះទេ បន្ទាប់ពីតុលាការ រំលាយគណបក្សសង្គ្រោះជាតិ និងការចាប់ខ្លួនលោក កឹម សុខា អតីតប្រធានគណបក្សសង្គ្រោះជាតិ និង លោក សួន សេរីរដ្ឋា អតីតប្រធានអំណាចខ្មែរជាដើម។ គ.ជ.ប.ធ្លាប់បានអះអាងថា ដំណើរបោះឆ្នោតនៅតែមានភាពល្អប្រសើរទោះបីជាអតីត មានអតីតបក្សសង្គ្រោះជាតិ ចូលរួមក៏ដោយ ព្រោះថា គ.ជ.ប.រៀបចំការបោះឆ្នោតធ្វើតាមការកំណត់របស់ច្បាប់ ដូច្នេះសូមប្រជាពលរដ្ឋទៅបោះឆ្នោតឲ្យបានគ្រប់គ្នាដើម្បីជ្រើសរើសថ្នាក់ដឹកនាំដែលខ្លួនពេញចិត្តដែលច្បាប់បានប្រគល់ជូន។ ការសម្រេចជ្រើសថ្នាក់ដឹកនាំនេះត្រូវបានធ្វើឡើងតាមរយៈការបោះឆ្នោត ក្នុងរយៈពេល៥ឆ្នាំម្តង ដោយពលរដ្ឋម្នាក់អាចបោះឆ្នោត បានតែមួយសន្លឹកប៉ុណ្ណោះ៕
ចែករំលែកព័តមាននេះ