ខេត្តប៉ៃលិន ៖ បុរសជាអាចារ្យវត្តម្នាក់បានស្លាប់ ខណៈបញ្ជូនទៅសង្គ្រោះនៅមន្ទីរពេទ្យបង្អែកខេត្ត ក្នុងហេតុការណ៍គ្រោះថ្នាក់ចរាចរណ៍ម៉ូតូបុកជាមួយម៉ូតូ ទិសដៅស្របគ្នា ដែលបើកបរហួសល្បឿនកំណត់ បណ្តាលឱ្យបុកគ្នាប្រាវស្លាប់ និងរបួសធ្ងន់តែម្តង។ ហេតុការណ៍នេះ…
ខេត្តប៉ៃលិន ៖ បុរសជាអាចារ្យវត្តម្នាក់បានស្លាប់ ខណៈបញ្ជូនទៅសង្គ្រោះនៅមន្ទីរពេទ្យបង្អែកខេត្ត ក្នុងហេតុការណ៍គ្រោះថ្នាក់ចរាចរណ៍ម៉ូតូបុកជាមួយម៉ូតូ ទិសដៅស្របគ្នា ដែលបើកបរហួសល្បឿនកំណត់ បណ្តាលឱ្យបុកគ្នាប្រាវស្លាប់ និងរបួសធ្ងន់តែម្តង។ ហេតុការណ៍នេះ បានកើតឡើងកាលពីវេលាម៉ោង៧ និង៤៥នាទីព្រឹក ថ្ងៃទី១១ ខែឧសភា ឆ្នាំ២០១៨ នៅចំណុចក្បែរបូរីម្កុដពេជ្រ ស្ថិតក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន បណ្ដាលឲ្យស្លាប់ម្នាក់ និងរងរបួសធ្ងន់០២នាក់។
ប្រភពព័ត៌មានបានឱ្យដឹងថា ជនរងគ្រោះទី១-ឈ្មោះ ខៀវ គា ភេទប្រុស អាយុ២៥ឆ្នាំ មុខរបរបុគ្គលិកកាស៊ីណូ បើកបរម៉ូតូម៉ាក Honda Dream ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ បាត់ដំបង1U-12 86 រងរបួសធ្ងន់គ្រាំទ្រូង ក្អូតឈាម ទី២-ឈ្មោះ នៅ ថេង ភេទប្រុស អាយុ៦៨ឆ្នាំ ជាអាចារ្យវត្ត បើកបរម៉ូតូ Honda Dream ស៊េរីឆ្នាំ២០១២ ពណ៌ខ្មៅ ពាក់ស្លាកលេខ ប៉ៃលិន 1A-84 75 ជាអ្នកបើកបរ បានស្លាប់នៅពាក់កណ្ដាលផ្លូវ ពេលបញ្ជូនទៅមន្ទីរពេទ្យបង្អែកខេត្ត ទី៣-ឈ្មោះ សំ ហេង ភេទស្រី អាយុ៥៨ឆ្នាំ មុខរបរមេផ្ទះ ជាអ្នករួមដំណើរ រងរបួសធ្ងន់ បាក់ជើងឆ្វេង ទាំងអស់គ្នារស់នៅក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅ។
ប្រភពបន្តទៀតថា មុនពេលកើតហេតុគេឃើញបុរសចំណាស់ម្នាក់ជាអាចារ្យវត្ត បានបើកបរឌុប គ្នាក្នុងទិសដៅពីកើតទៅលិច ស្របពេលនោះមានបុរសជាបុគ្គលិកកាស៊ីណូម្នាក់បើកបរក្នុងល្បឿនលឿន ដោយមិនប្រុងប្រយ័ត្នក៏បុកពីពីក្រោយពេញទំហឹង បណ្តាលឱ្យដួលប្រាវទាំងពីរគ្រឿងរងរបួសធ្ងន់តែម្តង។ ក្រោយពេលកើតហេតុភ្លាម ជនរងគ្រោះត្រូវបានគេបញ្ជូនទៅសង្គ្រោះនៅមន្ទីរពេទ្យបង្អែកខេត្តប៉ៃលិន ហើយបុរសចំណាស់ម្នាក់បានស្លាប់ពាក់កណ្តាលផ្លូវដោយសារធ្ងន់ធ្ងរពេក។
ចំណែកអ្នករួមដំណើរផ្សេងទៀត ក៏មានភាពធ្ងន់ធ្ងរដែរ ត្រូវគ្រូពេទ្យបញ្ជូនបន្តទៅបន្ទីរពេទ្យខេត្តបាត់ដំបង។ រីឯម៉ូតូទាំង២គ្រឿង ត្រូវបានកម្លាំង នគរបាលចរាចរណ៍ជើងគោកស្រុកសាលាក្រៅយកទៅរក្សារទុកនៅអធិការដ្ឋាននគរបាលស្រុកសាលាក្រៅ ដើម្បីរង់ចាំភាគីទាំងសងខាងចូលមកធ្វើការដោះស្រាយតាមនីតិវិធី៕
ចែករំលែកព័តមាននេះ