ខេត្តកំពង់ធំ ៖ សេចក្តីរាយការណ៍ឱ្យដឹងថា យ៉ាងហោចមនុស្សម្នាក់ស្លាប់ និង៣នាក់ទៀតរងរបួសធ្ងន់-ស្រាល ក្រោយពីត្រូវរន្ទះបាញ់២លើក តែនៅកន្លែងផ្សេងគ្នា ។
ករណីទី១-កើតឡើងកាលពីវេលាម៉ោង០៣ និង២៥នាទីរសៀលថ្ងៃទី១០ ឧសភា ស្ថិតនៅតំបន់ត្រពាំងរំដឹង ក្នុងភូមិតាមុំ ឃុំដូង ស្រុកប្រាសាទបល្ល័ង្ក ខេត្តកំពង់ធំ មេឃបានភ្លៀងលាយឡំផ្គរ ហើយក៏មានរន្ទះ ក៏បាញ់ចំមនុស្ស៣នាក់រងរបួសធ្ងន់-ស្រាល៣នាក់តែម្តង ខណៈពេលពួកគេបានទៅភ្ជួរស្រែ ។ ជនរងគ្រោះទាំង៣នាក់ ១-ឈ្មោះប៉ាក់ ប៉ន ភេទប្រុស អាយុ២៨ ឆ្នាំ រងរបួសធ្ងន់ ២-ឈ្មោះសុខ ម៉េង ភេទប្រុស អាយុ២៩ឆ្នាំ រងរបួសស្រាល និង៣-ឈ្មោះផន ផល ភេទប្រុស អាយុ២៧ឆ្នាំ រងរបួសស្រាល ។
លុះនៅវេលាម៉ោង០៥ និង៣០នាទីល្ងាចថ្ងៃដដែល ស្ថិតនៅតំបន់អូរទំនប់ ក្នុងភូមិតាេប៉ាង ឃុំកំពង់ស្វាយ ស្រុកកំពង់ស្វាយ ស្រាប់តែមានរន្ទះម្តងទៀតបាញ់ចំស្ត្រីម្នាក់ស្លាប់យ៉ាងអាណោចអាធ័ម ។ ស្ត្រីរងគ្រោះឈ្មោះប៉ុន យ៉ា អាយុ៤៨ ឆ្នាំ ខណៈគាត់ដើរទៅមើលស្រែ ពេលមេឃកំពុងមានភ្លៀង ។
ចែករំលែកព័តមាននេះ