រាជធានីភ្នំពេញ ៖ វីដេអូនារីរូបស្រស់ម្នាក់បានបង្កឱ្យមានបដិវាទ ជុំវិញការសម្លាប់សត្វព្រៃជាច្រើនប្រភេទយកមកធ្វើម្ហូប ហើយបង្ហោះតាម Youtube បាននាំឲ្យមានការរិះគន់ខ្លាំងៗក្នុងបណ្តាញសង្គម Facebook និងទាមទារឲ្យមានចំណាត់ការទៅលើសកម្មភាពរបស់នារីវ័យក្មេងរូបនោះ ។
គេហទំព័រក្នុងស្រុកមួយបានដកស្រង់សម្តីលោក សៅ សុភាព អ្នកនាំពាក្យក្រសួងបរិស្ថានបានថ្លែងថា ក្រសួងបរិស្ថានបានទទួលព័ត៌មាននេះអស់ហើយ និងក៏កំពុងប្រមូលព័ត៌មានបន្ថែមទៀត ជុំវិញករណីនេះ ។ បើតាមលោក សៅ សុភាព ករណីនេះគឺរដ្ឋមន្ត្រីក្រសួងបរិស្ថាន លោកសាយ សំអាល់ បានបញ្ជាឲ្យចាត់វិធានការបន្ទាន់តែម្តង ។
មិនត្រឹមតែចាត់វិធានការ ចំពោះនារីរូបនេះទេ ក្រសួងបរិស្ថានក៏នឹងស្នើទៅខាង Youtube ដើម្បី
ដកវីដេអូទាំងនេះ ចេញពី Youtube ថែមទៀតផង ។ នេះបើតាមការបញ្ជាក់របស់លោកសៅ សុភាព ។
នារីវ័យក្មេង ដែលគេមិនទាន់ស្គាល់អត្តសញ្ញាណនៅឡើយ បានបង្កើតទំព័រ Youtube មួយឈ្មោះ «Natural Life TV» ហើយបានបង្ហាញសកម្មភាពយកសត្វព្រៃជាច្រើនប្រភេទ មានសត្វខ្លះជាប្រភេទសត្វកម្រថែមទៀតមកបង្ហោះ គឺមានគោលបំណងស្វែងរកការមើលឱ្យបានច្រើន ដើម្បីទទួលបានថវិកានៃការផ្សព្វផ្សាយពាណិជ្ជកម្មនានាតាមរយៈ Youtube ៕
ចែករំលែកព័តមាននេះ