ខេត្តស្វាយរៀង៖ ព្រោះតែឃាត់ម្តាយមិនស្តាប់រឿងទាក់ទងស្នេហាជាមួយបុរសចំណាស់ដែលមានប្រពន្ធនិងកូន ខឹងពេកទិញដបសាំងកន្លះលីត្រចាក់ដុតទាំងម្តាយ និងប្រុសស្នេហ៍ បណ្តាលអោយឆេះមុងឆេះទាំងម្តាយ និងប្រុសស្នេហ៍ រងរបួសធ្ងន់ធ្ងរ ខណៈកំពុងដេកលង់លក់ ហើយត្រូវបានក្រុមគ្រួសារដឹកយកមកសង្គ្រោះនៅមន្ទីពេទ្យ។
ហេតុការណ៍នេះបានបង្កឲ្យមានការភ្ញាក់ផ្អើលកាលពីវេលាម៉ោង៨និង១០នាទីយប់ថ្ងៃទី៨ ខែឧសភាឆ្នាំ២០១៨ ស្ថិតក្នុងភូមិ សំបួរឃុំសំបួរ ស្រុកស្វាយទាប ខេត្តស្វាយរៀង។
បើតាមប្រភពពីសាច់ញាតិជនរងគ្រោះបានឲ្យដឹងថា មុននឹងឈានដល់ការដុតម្តាយបង្កើតនិងបុរសជា
សង្សាម្តាយនោះ គឺកូនប្រុសនេះធ្លាប់ហាមមិនឲ្យម្តាយរបស់ខ្លួនទាក់ទងជាមួយបុរសខាងលើទេ ព្រោះអីបុរសចំណាស់នោះមានប្រពន្ធនិងកូនរួចទៅហើយ និងមិនទាន់បានលះលែងគ្នាដាច់ស្រេចនៅឡើយទេ ម្យ៉ាងវិញទៀតពេលឃើញម្តាយធ្វើដូច្នេះ គឺធ្វើឱ្យកូនៗខ្មាស់គេណាស់។
បើយោងតាមសមត្ថកិច្ចបានឲ្យដឹងថា ជនរងគ្រោះឈ្មោះពេជ្រ ឆុន ភេទប្រុស អាយុ៦៧ឆ្នាំ មុខរបរកសិករ រងរបួសធ្ងន់ និងឈ្មោះ ពេជ្រ សាន់ ភេទស្រី អាយុ៥៣ឆ្មាំ មុខរបរកសិករ រងរបួសធ្ងន់។ អ្នកទាំងពីររស់នៅភូមិសំបួរ ឃុំសំបួរ ស្រុកស្វាយទាប ខេត្តស្វាយរៀងជាមួយគ្នា។
តាមប្រភពពីជនរងគ្រោះឈ្មោះពេជ្រ ឆុន បានឱ្យដឹងថា ខ្លួនបានទៅដេកនៅផ្ទះស្ត្រីឈ្មោះពេជ្រ សាន់ ហើយជនសង្ស័យឈ្មោះតូច សាវឿន ហៅទិត្យ អាយុ២៥ឆ្នាំ ត្រូវជាកូនបង្កើតរបស់ស្ត្រីរងគ្រោះ បានចាក់សាំងដុតបណ្តាលឱ្យរងរបួសធ្ងន់ទាំងពីរនាក់តែម្តង ។
បច្ចុប្បន្ន ជនរងគ្រោះត្រូវបានបញ្ជូនទៅសំរាកព្យាបាលនៅមន្ទីពេទ្យបង្អែកស្រុកស្វាយទាប តែដោយសារជនរងគ្រោះមានសភាពធ្ងន់ធ្ងរពេក ទើបត្រូវដឹកបញ្ជូនបន្តទៅកាន់មន្ទីរពេទ្យនៅរាជធានីភ្នំពេញ ។ រីឯជនសង្ស័យត្រូវបានសមត្ថកិច្ចឃាត់ខ្លួន និងបញ្ជូនមកអធិការនគរបាលស្រុកស្វាយទាបដើម្បីបំពេញសំណុំរឿងចាត់ការតាមផ្លូវច្បាប់ ៕
ចែករំលែកព័តមាននេះ