សហរដ្ឋអាមេរិក ៖ ប្រធានាធិបតីអាមេរិកលោកដូណាល់ត្រាំ ប្រកាសពីការដកខ្លួនថយរបស់ប្រទេសលោកពីកិច្ចព្រមព្រៀងស្ដីពីនុយក្លេអ៊ែរអ៊ីរ៉ង់ ជាមួយការវិលត្រឡប់ទៅរករាល់ទណ្ឌកម្មវិញ។ នេះជាជំហររឹងមួយរបស់លោក ដោយពុំអើពើចំពោះការព្រមានរបស់ពួកអឺរ៉ុបដែលថា នឹងបន្តនាថ្ងៃទី៩ ឧសភា ការរួមសហការគ្នា ដើម្បីសង្គ្រោះកិច្ចព្រមព្រៀងឆ្នាំ២០១៥នោះ។
ប្រធានាធិបតីអ៊ីរ៉ង់ លោក ហាសាន រ៉ូហានី ដែលលះបង់ច្រើនសម្រាប់កិច្ចព្រមព្រៀងនេះ បានចោទប្រកាន់ភ្លាមៗដល់សមភាគីអាមេរិកថា អនុវត្តសង្គ្រាមចិត្តសាស្ត្រមួយ ខណៈការសម្រេចនេះ របស់ក្រុងវ៉ាស៊ីនតោន បរិហារដោយគ្រប់ប្រទេសហត្ថលេខាដែលនាំឲ្យមានការភ័យខ្លាចពីការកើនឡើងថ្មីនៃភាពតានតឹងក្នុងតំបន់។
ចំណែកអតីតប្រធានាធិបតីអាមេរិក លោក បារ៉ាក់ អូបាម៉ា ជាអ្នកចុះហត្ថលេខាលើកិច្ចព្រមព្រៀងនេះ បានបញ្ចេញប្រតិកម្មថា នេះជាការខុសឆ្គងធ្ងន់ធ្ងរមួយ។
នៅសេតវិមានលោកត្រាំថ្លែងនាថ្ងៃទី៨ ឧសភាថា ខ្ញុំសូមប្រកាសនៅពេលនេះថា សហរដ្ឋអាមេរិកនឹងដកខ្លួនថយចេញពីកិច្ចព្រមព្រៀងនុយក្លេអ៊ែរអ៊ីរ៉ង់។ ក្រោយរយៈពេល១៥ខែ នៃការចូលកាន់អំណាច លោកត្រាំបានប្រកាន់ពាក្យសន្យាពេលឃោសនាបោះឆ្នោត ដែលថា លោកនឹងដកថយពីកិច្ចព្រមព្រៀងនេះ ដែលជាផ្លែផ្កានៃការចរចាយ៉ាងស្វិតស្វាញជាអន្តរជាតិ រយៈពេលដល់ទៅ២១ខែ ដើម្បីរារាំងអ៊ីរ៉ង់កុំឲ្យបំពាក់អាវុធនុយក្លេអ៊ែរ។
ជាក់ស្ដែងលោកត្រាំប្រកាន់យកការជ្រើសរើសរ៉ាឌីកាល់ ដោយរាល់ទណ្ឌកម្មដែលលុបចោលជាថ្នូរនឹងការសន្យារបស់អ៊ីរ៉ង់ពុំបំពាក់អាវុធនុយក្លេអ៊ែរ ត្រូវស្ដារឡើងវីញភ្លាមៗក្នុងគ្រប់កម្រិត៕
ចែករំលែកព័តមាននេះ