ខេត្តកំពង់ឆ្នាំង ៖ នៅក្នុងពិធីចុះសាកសួរសុខទុក្ខ និងចែកអាវភ្លៀងដល់នាយទាហ៊ាន និងពលទាហ៊ានទាំងអស់ ចំណុះឲ្យយោធភូមិភាគ ពិសេស ឯកឧត្តម នាយឧត្តមសេនីយ៍ គន់ គីម អគ្គមេបញ្ជាការរង កងយោធពលខេមរភូមិន្ទ និងជានាយសេនាធិការចម្រុះបានថ្លែងថា ៖ សម្តេចអគ្គមហាសេនាតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានផ្តាំផ្ញើរ សាកសួរសុខទុក្ខដល់កងយោធពលខេមរភូមិន្ទទាំងអស់ និងដោយការយកចិត្តទុកដាក់គិតគូរអំពីសុខទុក្ខដល់បងប្អូនក្នុងខែវស្សានេះ សម្តេចសូមផ្តល់ជូននូវ អាវភ្លៀងម្នាក់មួយៗ ដល់នាយទាហ៊ាន និងពលទាហ៊ានទាំងអស់ ក្នុងយោធភូមិភាគពិសេស ដែលមាន២០អង្គភាពចំណុះ ដែលមានអាវភ្លៀងសរុបជិត១ម៉ឺនអាវ ។
ពិធីនេះបានធ្វើឡើងនៅព្រឹកថ្ងៃទី០៩ ខែឧសភា ឆ្នាំ២០១៨ នៅក្នុងទីបញ្ជាការតំបន់ប្រតិបត្តិការសឹករងកំពង់ឆ្នាំង ។
ឯកឧត្តម នាយឧត្តមសេនីយ៍ គន់ គីម បានបន្តរថា ៖ លោកមេបញ្ជាការគ្រប់អង្គភាពទាំងអស់ត្រូវយកអាវភ្លៀងទាំងអស់នេះទៅចែកជូនដល់នាយទាហ៊ាន និងពលទាហ៊ានឲ្យបានគ្រប់ៗគ្នា និងឲ្យបានទាន់ពេលវេលា គឺបើទៅដល់អង្គភាពពេលល្ងាចត្រូវចែកឲ្យទាំងល្ងាច បើទៅដល់ពេលព្រឹកត្រូវចែកឲ្យទាំងព្រឹក ដើម្បីឲ្យនាយទាហ៊ាន និងពលទាហ៊ានបានប្រើប្រាស់ បំពេញភារកិច្ចបានល្អ នៅក្នុងរដូវវស្សានេះ ។
ឯកឧត្តមបានបញ្ជាក់ទៀតថា ៖ ដោយមានការគិតគូររបស់ប្រមុខរាជរដ្ឋាភិបាលពេលនេះប្រាក់ខែរបស់ពលទាហ៊ាន និងនាយទាហ៊ានបានម្នាក់ៗពី១លាន ទៅជាង១លានរៀល ធ្វើឲ្យជីវភាពក្នុងក្រុមគ្រួសារ និងប្រពន្ធកូនបានធូរធាមួយកម្រិតធំ ហើយនៅពេលប្រទេសជាតិមានការរីកចម្រើននោះ ប្រាក់ខែយើង និងបន្តឡើងទៀតមិនខានឡើយ ។
ជាចុងក្រោយ ឯកឧត្តមអគ្គមេបញ្ជាការរង កងយោធពល ខេមរភូមិន្ទ បានសំណូមពរដល់នាយទាហ៊ាន និងពលទាហ៊ានទាំងអស់គ្រប់អង្គភាពត្រូវនាំគ្នាទៅបោះឆ្នោតក្នុងពេលខាងមុខនេះឲ្យបានគ្រប់ៗគ្នា ជាពិសេសត្រូវជំរុញបងប្អូនប្រពន្ធកូនក្មួយ និងមិត្តភក្តិនៅក្នុងមូលដ្ឋានឲ្យទៅបោះឆ្នោតគាំទ្រសម្តេចទាំងអស់គ្នា ដើម្បីឲ្យសម្តេចដឹកនាំប្រទេសជាតិប្រកបដោយស្ថេរភាព និងមានសុខសន្តិភាពរហូតតទៅ បើមានសន្តិភាពនោះការអភិវឌ្ឍន៍លើគ្រប់វិស័យ ពិតជាមានការរីចម្រើន ហើយប្រជាពលរដ្ឋទាំងអស់ពិតជាមានជីវភាពធូរធា និងមានសុភមង្គល ៕
ចែករំលែកព័តមាននេះ