ពេជ្រ ចរណៃ បញ្ជាក់បំភ្លឺការយល់ច្រឡំមួយ
- ភ្នំពេញ
រាជធានីភ្នំពេញ ៖ តារាសម្តែង និងគ្រូក្បាច់គុនល្បុក្កតោកញ្ញាពេជ្រ ចរណៃ បានបដិសេធការភាន់ច្រឡំពីមជ្ឈដ្ឋានមួយចំនួនដែលលើកឡើងថា នាងគឺជាម្ចាស់ហាងលក់ត្រីត្រោតជំនួសត្រីសាល់ម៉ុន ដែលបោកប្រាស់អតិជននាពេលកន្លងមក ។
កាលពីពេលថ្មីៗកន្លងមក តាមរយៈវីដេអូឃ្លីបបង្ហោះលើបណ្តាញសង្គម កញ្ញាពេជ្រ ចរណៃ លើកឡើងថា កន្លងមកនាងមិនដែលចង់យកបណ្តាញសង្គមមកជជែកវែកញែកអ្វីឡើយ ប៉ុន្តែពេលនេះនាងត្រូវតែចេញមកនិយាយ ដើម្បីរកភាពស្អាតស្អំ ក៏ដូចជាបង្ហាញទៅដល់អ្នកយល់ច្រឡំលើរូបនាង ។
តាមពិតរឿងនេះបានកើតឡើងយូរហើយ មិនគួរលើកនិយាយទៀតទេ ប៉ុន្តែរឿងយល់ច្រឡំនេះបន្តរហូតមកដល់បច្ចុប្បន្ន ជាហេតុធ្វើឲ្យនាងមានអារម្មណ៍មិនសប្បាយចិត្ត និងមានបុគ្គលមួយចំនួននៅតែយល់ខុសលើរូបនាង ។
កញ្ញាពេជ្រ ចរណៃ បញ្ជាក់ថា «បងប្អូនប្រាកដជាបានដឹងពីហេតុការណ៍ឆេះហាងដែលនាងខ្ញុំបើកនាពេលកន្លងមកហើយ ក្រោយហេតុការណ៍នេះបានកើតឡើង នាងខ្ញុំក៏បានរកទីតាំងថ្មីផ្សេងទៀតដើម្បីបើកមុខរបរនេះជាថ្មី ប៉ុន្តែនៅពេលដែលហាងនាងខ្ញុំបានដំណើរការនោះក៏មានបងប្អូនមួយចំនួនចូលទៅខំមិនដោយសម្តែងការមិនគាំទ្រ ព្រោះការយល់ច្រឡំមកលើនាងខ្ញុំថាជាមនុស្សដែលបោកប្រាស់ចំពោះការលក់ត្រីត្រោតជាដើម ។ល។
បញ្ហានេះគឺជារឿងអយុត្តិធម៌សម្រាប់ខ្ញុំណាស់ ព្រោះហេតុការណ៍ដែលបានកើតឡើងនោះនាងខ្ញុំកំពុងជាប់ហាត់កងទ័ពនៅលើភ្នំនៅឡើយ ដូច្នេះខ្ញុំមិនបានដឹងរឿងអស់ទាំងនេះ ធ្វើឲ្យខ្ញុំចេញមកបកស្រាយយឺតពេលបន្តិច ហើយធ្វើឲ្យបងប្អូនជាច្រើនយល់ច្រឡំថា ខ្ញុំពិតជាម្ចាស់ហាងមួយហ្នឹង ។
នាងខ្ញុំសុំបដិសេធមិនមែនជាម្ចាស់ហាងមួយនេះឡើយ គឺនាងខ្ញុំជាម្ចាស់ហាងឈ្មោះថា «អាហារដ្ឋាន ចរណៃ» ដែលមានអាហារ កាហ្វេ និងការហាត់ក្បាច់គុន ខណៈពេលដែលហាងរបស់នាងខ្ញុំក៏បានប្តូរទីតាំងហើយដែរ ។
នាងខ្ញុំសូមបញ្ជាក់ជាថ្មីម្តងទៀតថា នាងខ្ញុំមិនមែនជាម្ចាស់ហាងឈ្មោះចរណៃត្រីសាលម៉ុន នេះឡើយ ហេតុដូច្នេះសុំបងប្អូនមានការយោគយល់ និងកុំមានការភាន់ច្រឡំបន្តទៀត ហើយបងប្អូនអាចមកជួយគាំទ្ររូបនាងខ្ញុំបន្តទៀតតាមការរយៈមកញ៉ាំអី ឬកុម្ម៉ង់នៅហាងរបស់នាងខ្ញុំដែលមានទីតាំងនៅជិតផ្សារឈូកមាស» ។
កញ្ញាពេជ្រ ចរណៃ បញ្ជាក់ថា ការបើកហាងរបស់នាងនាពេលនេះមិនបានធ្វើឲ្យនាងមានបានទេ ប៉ុន្តែវាគឺជាផ្នែកមួយ ដើម្បីជួយទ្រទ្រង់ទៅដល់ក្លឹបហាត់ក្បាច់គុនរបស់នាង ព្រោះភាគច្រើនគឺនាងបង្ហាត់ក្បាច់គុនមិនយកថ្លៃឡើយ ក្នុងគោលបំណងបណ្តុះធនធានជំនាន់ក្រោយ និងថែរក្សាក្បាច់គុនបុរាណខ្មែរ ជាពិសេសនោះគឺចង់ឲ្យអ្នកហាត់ក្បាច់គុនមានសុខភាពល្អ ដោយយកក្បាច់គុនមកជាកីឡា ៕
ចែករំលែកព័តមាននេះ