លោកព្រាប សុវត្ថិ បង្ហាញមនោសញ្ចេតនាចំពោះម្ចាស់ផលិតកម្ម
- ភ្នំពេញ
រាជធានីភ្នំពេញ៖ តារាចម្រៀងលោកព្រាប សុវត្ថិ បង្ហាញការគាំទ្រម្ចាស់ផលិតកម្មGalaxy លោកឡេង ណាវ៉ាត្រា ក្នុងនាមលោកជាសមាជិកនៃផលិតកម្មនេះ ខណៈលោកឡេង ណាវ៉ាត់ត្រា ជួបបញ្ហាក្ស័យធននឹងមុខរបរផ្ទាល់ខ្លួន ។
កាលពីថ្ងៃទី១៥ កញ្ញា ២០២៦ លើបណ្តាញសង្គម តារាចម្រៀងលោកព្រាប សុវត្ថិ លើកឡើងថា «ថ្ងៃនេះខ្ញុំ និងភរិយា បានមកសួរសុខទុក្ខ និងផ្ដល់កម្លាំងចិត្តដល់ប្អូនប្រុសដែលកំពុងដោះស្រាយបញ្ហាជូនអតិថិជន ។ ក្នុងនាមបងជាបងម្នាក់ ជាអ្នករួមការងារម្នាក់មើលឃើញការប្រឹងប្រែង ការតស៊ូ ការចូលរួមចំណែកក្នុងសង្គមជាច្រើននៅពេលដែលប្អូនជោគជ័យ ។
សូមប្អូនរក្សាទឹកចិត្តឱ្យស្ងប់ ពង្រឹង ស្មារតីឱ្យរឹងមាំដោះស្រាយបញ្ហាជូនអថិជនឱ្យអស់ពីកម្លាំងកាយចិត្ត ប្អូននឹងជម្នះឧបសគ្គ ទាំងអស់ទទួលបានភាពជោគជ័យដូចប្អូនចាប់ផ្តើមតាំងពីដំបូង ។
ទោះស្ថិតនៅកាលៈទេសៈបែបណា បងក៏ដូចក្រុមការងារទាំងអស់នៅតែឈរនៅពីក្រោយផ្ដល់កម្លាំងចិត្តដល់ប្អូនក្នុងការដោះស្រាយបញ្ហាទាំងអស់ជូនអថិជនដែលមានបញ្ហាឱ្យបានសមរម្យ ដោយមានការចូលរួមពីក្រសួងរៀបចំដែនដី នគរូបនីយកម្ម និងសំណង់ផងដែរ» ។
ចំណែកផលិតកម្មGalaxy Navatra កាលពីថ្ងៃទី១៤ ខែកញ្ញា ឆ្នាំ២០២៦ បានប្រកាសថា បន្ទាប់ពីក្រុមការងារបានទៅសុំយោបល់ប្រសាសន៍របស់អ្នកឧកញ៉ាឡេង ណាវ៉ាត្រា បញ្ជាក់យ៉ាងច្បាស់ថា ផលិតកម្មមិនត្រូវបានបិទទ្វារទេ ទោះបីមាន ឬគ្មានវត្តមានលោកក៏ដោយ។
មូលហេតុដែលផលិតកម្មនៅតែអាចដំណើរការបាន គឺពឹងផ្អែកលើ២ចំណុចសំខាន់៖
១-ចំណូលពីការចេញប្រគំតន្ត្រីរបស់កំពូលតារាចម្រៀងទាំងអស់ ២-ចំណូលអចិន្ត្រៃយ៍ពីប្រព័ន្ធ Social Media និងការឧបត្ថម្ភ (Sponsor)ផលិតកម្ម មិនអាចបិទទ្វារឡើយ តែអាចត្រឹមតែចុះខ្សោយ លុះត្រាតែកំពូលតារាចម្រៀងទាំងអស់ចាកចេញ និងប្រព័ន្ធSocial Media ត្រូវលុបចោលទាំងស្រុង ។
ទាំងបច្ចុប្បន្ន និងអនាគត គ្មានហេតុផលណាត្រូវបិទទ្វារនោះទេ ព្រោះបងប្អូនកំពូលតារាចម្រៀងទាំងអស់ មិនមែនត្រឹមជាបុគ្គលិកឡើយ តែជាបងប្អូនដ៏ល្អ ហើយលោកបានស្គាល់ពីក្រអៅបេះដូងរបស់ពួកគាត់យ៉ាងច្បាស់ពួកគាត់មានគុណធម៌ខ្ពស់ណាស់កាន់តែលំបាកកាន់តែនៅជិត ។
កន្លងទៅ ទោះបីក្រុមហ៊ុនជួបការលំបាកយ៉ាងណាក៏ដោយ ពួកគាត់មិនត្រឹមតែមិនចាកចេញប៉ុណ្ណោះទេថែមទាំង«បំបះពីមាត់ពីក»ជួយឧបត្ថម្ភក្រុមការងាររាល់ពេលចេញច្រៀងទៀតផង ។
លើសពីនេះសមត្ថភាពរបស់កំពូលតារាចម្រៀងទាំងអស់ គឺគ្រប់គ្រាន់ក្នុងការធ្វើការងារជាមួយក្រុមតន្ត្រីធំៗ និងអាចរកចំណូលទ្រទ្រង់ជីវភាពបានយ៉ាងរឹងមាំ ។
អ្នកឧកញ៉ាបានសង្កត់ធ្ងន់បន្ថែមថា ផលិតកម្មសម័យបច្ចុប្បន្ន ចម្រៀងជា Content អាចរកចំណូលពីSocial Media ផង បានចំណូលពីការផ្សាយពាណិជ្ជកម្មផង ខុសពីផលិតកម្មជំនាន់មុន ជំនាន់ផលិតឌីស ។
ដូច្នេះគ្មានហេតុផលណាមួយដែលត្រូវបិទទ្វារឡើយ «ទោះគ្មានវត្តមានលោកក៏ដោយ លោកបានត្រៀមប្រគល់ឱ្យកូនស្រីសម្រាប់គ្រប់គ្រងបន្តដែលមានក្រុមការងារចាំជួយជ្រោមជ្រែង» ៕
ចែករំលែកព័តមាននេះ