ដាញ់ ម៉ូនីកា រំលឹកប្រវត្តិបានតំណែងតួឯកក្នុងរឿង «ទុំទាវ»
- ភ្នំពេញ
រាជធានីភ្នំពេញ៖ ទោះរំលងទៅជាច្រើនឆ្នាំក៏ដោយ ប៉ុន្តែអតីតតារាសម្តែងអ្នកនាង ដាញ់ ម៉ូនីកា នៅតែមិនទាន់ភ្លេចពីអនុស្សាវរីយ៍ល្អៗជាច្រើនក្នុងអាជីពសិល្បៈរបស់នាង ជាពិសេសនោះគឺឱកាសនៃការសម្តែងរឿងទុំទាវ ដែលនាងនឹកស្មានមិនដល់ថា អាចក្លាយជាតួឯកទេ ដ្បិតនាងជាតួថ្មីថ្មោងម្នាក់ ។
ដាញ់ ម៉ូនីកា ចាត់ទុករឿងទុំទាវ ដែលនាងសម្តែងនោះគឺជារឿងទីមួយដែលធ្វើឲ្យទស្សនិកជនហៅនាងថាជានាងទាវរហូតមកដល់សព្វថ្ងៃ ហើយក៏ជារឿងដែលនាងស្រឡាញ់ជាងគេផងដែរ ក្នុងចំណោមរឿងដែលនាងធ្លាប់សម្តែង ។
តាមរយៈរូបថតអតីតកាលដែលនាងសម្តែងក្នុងរឿងទុំទាវ អតីតតារាសម្តែងអ្នកនាងដាញ់ ម៉ូនីកា បានភ្ជាប់ជាមួយសំណេរបង្ហោះលើបណ្តាញសង្គមកាលពីពេល ថ្មីៗកន្លងមកថា «ពេលវេលាពិតជាដើរលឿនមែន ប៉ុន្តែខ្ញុំចាំមិនដែលភ្លេច និងមានអនុស្សាវរីយ៍ ល្អៗជាច្រើន ។
ជារឿងទីមួយរបស់នាងខ្ញុំ ដែលធ្វើឱ្យបងប្អូនបានស្គាល់ ហៅថានាងទាវរហូតដល់សព្វថ្ងៃ ។ រឿងទុំទាវ មិនមែនចេះតែបានចូលថត ស្រួលៗទេ ព្រោះជារឿងខ្នាតធំ និងប្រវត្តិសាស្ត្រទៀត គឺត្រូវធ្វើតេស្តសាកល្បង ។ ជំនាន់ហ្នឹង អ្នកទៅធ្វើតេស្តសុទ្ធតែតួ ស្អាតៗខ្ពស់ទៀត ហើយគេមានបទពិសោធន៍ស្រាប់ទៀត ។ សម្រាប់ខ្ញុំគឺថ្មីសន្លាងដូចអីវ៉ាន់បកពី កេស ។
ខ្ញុំគិតថាគ្មានសង្ឃឹមទេ ហើយពេលដែលគេប្រាប់ថាខ្ញុំជាប់ជាតួនាងទាវ ហើយខ្ញុំពិតជារំភើប សប្បាយចិត្តណាស់ ។ រឿងដែលនាងខ្ញុំសម្ដែង ល្បីៗច្រើនគួរសមដែរ តែខ្ញុំស្រឡាញ់រឿងទុំទាវ ខ្លាំងជាងគេ ។
អរគុណដល់លោកពូហ្វៃ សំអាង និងបងស្រី គង់ សុជាតិ ម្ចាស់ផលិតកម្ម SSB ដែលបាន ជ្រើសរើសក្មួយ២៦ឆ្នាំកន្លងផុតទៅ» ។
នេះជាការរំលឹកអតីតកាលជាថ្មីម្តងទៀតពីការអ្នកនាងដាញ់ ម៉ូនីកា បន្ទាប់ពីអតីតតារាសម្តែងរូបនេះធ្លាប់បានបង្ហាញតម្រុយពីការចង់វិលចូលសម្តែងជាថ្មី ប្រសិននាងមានឱកាស និងនៅតែមានការគាំទ្រពីទស្សនិកជន ។
អ្នកនាងដាញ់ ម៉ូនីកា ធ្លាប់បានលើកឡើងតាមបណ្តាញសង្គមថា «បើសិនខ្ញុំនឹងត្រឡប់ទៅសម្ដែងវិញ បងប្អូនគាំទ្រ ឬអត់» ។
បណ្តាអ្នកគាំទ្រជាច្រើនបានសម្តែងការគាំទ្រចង់ឃើញដាញ់ ម៉ូនីកា វិលចូលសម្ដែងវិញ តែមួយចំនួនទៀតផ្ទុះការវែកញែកចេញជាភាពអវិជ្ជមាន ៕
ចែករំលែកព័តមាននេះ