«ជោគជ័យមិនមែនកើតឡើងដោយចៃដន្យ»៖ ឯកឧត្តម ហ៊ុន ម៉ានី សម្តែងការកោតសរសើរ និងអបអរសាទរម្ចាស់ពាន X Factor Cambodia រដូវកាលទី២
- ភ្នំពេញ
រាជធានីភ្នំពេញ៖ បេក្ខនារីកែវ សុគន្ធា បានក្លាយជាម្ចាស់ជ័យលាភីកម្មវិធី «X Factor Cambodia» រដូវកាលទី២ កាលពីរាត្រីថ្ងៃទី១៣ ខែកញ្ញា ឆ្នាំ២០២៦ ក្រោយពីការប្រកួតប្រជែងយ៉ាងស្វិតស្វាញអស់ជាច្រើនសប្តាហ៍ ។
ឯកឧត្តមហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈដែលចូលរួមជាអធិបតីក្នុងវគ្គផ្ដាច់ព្រ័ត្របានលើកឡើថា «ភាពជោគជ័យរបស់ប្អូនស្រីកែវ សុគន្ធា នៅថ្ងៃនេះ មិនមែនកើតឡើងដោយចៃដន្យនោះទេ ប៉ុន្តែជាលទ្ធផលនៃកិច្ចខិតខំប្រឹងប្រែង ការតាំងចិត្ត តស៊ូជាបន្តបន្ទាប់កន្លងមក ។ ខ្ញុំនៅចាំបានពីទេពកោសល្យ និងសំឡេងដ៏មានទឹកដម ពោរពេញដោយមនោសញ្ចេតនារបស់ប្អូនស្រី កាលពីបានចូលរួមច្រៀងក្នុងកម្មវិធីអបអរសាទរខួបលើកទី៤៤នៃសហភាពសហព័ន្ធយុវជនកម្ពុជា (ស.ស.យ.ក.) កាលពីឆ្នាំ២០២២។
ខ្ញុំក៏ដូចជាទស្សនិកជន អ្នកគាំទ្រទាំងអស់ បានតាមដានយ៉ាងជក់ចិត្តនូវការប្រកួតប្រជែងដ៏ស្វិតស្វាញរបស់បេក្ខជន បេក្ខនារី ដែលសុទ្ធតែបានបង្ហាញនូវការខិតខំប្រឹងប្រែង ទេពកោសល្យ សមត្ថភាព ភាពក្លាហាន ពិសេស រៀងៗខ្លួន គួរឱ្យកោតសរសើរ ។ ប្អូនៗពិតជាធ្វើបានល្អ សូមជូនពរប្អូនស្រី កែវ សុគន្ធា និង ប្អូនៗទាំងអស់ បន្តទទួលបានជោគជ័យ បំពេញក្តីស្រមៃរបស់ខ្លួនឆ្ពោះទៅមុខ ហើយសម្រេចបានស្នាដៃ ថ្មីៗបន្ថែមទៀតក្នុងវិស័យសិល្បៈ» ។
តារាចម្រៀងកែវ សុគន្ធា ចាត់ទុកការខិតខំរបស់នាងរហូតទទួលបានជោគជ័យនាពេលនេះគឺជាការសម្រេចសុបិនរបស់ខ្លួន ឲ្យក្លាយជាការពិត សម្រាប់ការចូលរួមប្រកួតប្រជែងប្រឡងចម្រៀងលំដាប់ថ្នាក់ពិភពលោកនាពេលនេះ ។
កែវ សុគន្ធា ចាត់ទុកពានរង្វាន់នេះ មិនមែនជារបស់នាងម្នាក់ឯងទេ ប៉ុន្តែជារបស់អ្នកគាំទ្រទាំងអស់គ្នាដែលបាននៅក្បែរនាងរហូតមក ៕
ចែករំលែកព័តមាននេះ