ខេត្តបាត់ដំបង៖ ពិធីបើកស្បៃរូបសំណាកសិល្បករ សិល្បការិនីជំនាន់ដើមចំនួន៣រូបបន្ថែមទៀត នៅបរិវេណសួនសិល្បៈ ក្រុងបាត់ដំបង កាលពីល្ងាចថ្ងៃទី១៣ កញ្ញា ឆ្នាំ២០២៦ ។ រូបសំណាកទាំង៣ គឺលោកស្រីរស់ សេរីសុទ្ធា ,លោកស្រីប៉ែន រ៉ន និងលោកស្រីហួយ មាស ។
បើតាមរដ្ឋបាលខេត្តបាត់ដំបង ឯកឧត្តម សុខ លូ អភិបាលខេត្តបានអញ្ជើញជាអធិបតីក្នុងពិធីនោះ ព្រមទាំងមានការចូលរួមពីសិល្បករ សិល្បការិនី និងប្រជាពលរដ្ឋយ៉ាងច្រើនកុះករ ។
មន្ទីរទេសចរណ៍ខេត្តបាត់ដំបង ចាត់ទុករូបសំណាកនេះ ជាសមិទ្ធផលថ្មីមួយបន្ថែមទៀត ក្នុងការលើកកម្ពស់សោភ័ណភាពទីក្រុង និងអភិរក្ស លើកតម្កើងតម្លៃសិល្បៈ និងវប្បធម៌ខ្មែរ ។
ការដាក់តាំងរូបសំណាកសិល្បករនេះ មិនត្រឹមតែជាការបន្ថែមសោភ័ណភាពដល់ទីតាំងសាធារណៈប៉ុណ្ណោះទេ ប៉ុន្តែថែមទាំងបង្ហាញពីការយកចិត្តទុកដាក់ចំពោះវិស័យសិល្បៈ ការចងចាំគុណូបការៈ និងស្នាដៃរបស់សិល្បករខ្មែរ ព្រមទាំងចូលរួមបង្កើតជាទីកន្លែងសម្រាប់ប្រជាពលរដ្ឋ និងភ្ញៀវទេសចរទៅទស្សនា សម្រាកលំហែ និងឈ្វេងយល់ពីអត្តសញ្ញាណសិល្បៈ និងវប្បធម៌របស់ខេត្តបាត់ដំបង ។
កន្លងមករដ្ឋបាលខេត្តបានដាក់តាំងរួចមកហើយរូបសំណាកលោកស៊ីន ស៊ីសាមុត និងលោកគង្គ ប៊ុនឈឿន ៕
ចែករំលែកព័តមាននេះ