លោកតាអាយុ១០០ឆ្នាំប្រាប់ពីអាថ៌កំបាំងធ្វើឱ្យអាយុវែង
អង់គ្លេស ៖ តាមប្រភពព័ត៌មាន Metro បានឲ្យដឹងថា លោកតាអាយុ១០០ឆ្នាំម្នាក់ ដែលធ្លាប់ឆ្លងកាត់សង្គ្រាមលោកលើកទី២ បានអះអាងថា ការទៅហាត់ប្រាណនៅ Gym…
អង់គ្លេស ៖ តាមប្រភពព័ត៌មាន Metro បានឲ្យដឹងថា លោកតាអាយុ១០០ឆ្នាំម្នាក់ ដែលធ្លាប់ឆ្លងកាត់សង្គ្រាមលោកលើកទី២ បានអះអាងថា ការទៅហាត់ប្រាណនៅ Gym គឺជាមូលហេតុដែលធ្វើឲ្យគាត់អាយុវែងបែបនេះ។
ទាហានចូលនិវត្តន៍ John Hamilton តែងតែទៅហាត់ប្រាណលើកដុំដែករយៈពេល៩០នាទី ជារៀងរាល់ថ្ងៃ។ លោកតាតែងតែទៅហាត់ប្រាណនៅកន្លែងដដែលៗអស់រយៈពេល១២ឆ្នាំហើយ ជារៀងរាល់ម៉ោង៨ព្រឹក។ នៅទីនោះ លោកតាហាត់ធាក់កង់២០នាទី រត់លើម៉ាស៊ីន១៥នាទី និង កាច់ក្បាលពោះ៤០០ដង។
ការហាត់ប្រាណរបស់លោកតា អាចបង្ហាញឲ្យយើងឃើញថា សុខភាពរបស់លោកតា គឺល្អណាស់ បើធៀបទៅនឹងមនុស្សចាស់អាយុស្របាលនឹងលោកតា។ លោកតាមិនសូវជាទៅពេទ្យប៉ុន្មានទេ ទោះបីជាអាយុច្រើនហើយក៏ដោយ។
អ្វីដែលកាន់តែចាប់អារម្មណ៍នោះគឺថា លោកតាចូលចិត្តផឹកស្រា ហើយទើបតែផ្តាច់បារីពេលថ្មីៗនេះទេ។ មូលហេតុនៃការផ្តាច់បារី គឺមិនមែនសុខៗចង់ផ្តាច់នោះទេ។ នេះមកពីលោកតាបាត់បារី ហើយខ្ជិលទៅទិញទៀត។
គួរបញ្ជាក់ផងដែរថា លោកតា John រាល់ថ្ងៃរស់នៅម្នាក់ឯង ក្រោយពីប្រពន្ធស្លាប់បាត់នៅអាយុ៦៧ឆ្នាំ។ លោកតាមានកូន៣នាក់ ចៅ៨នាក់ និងចៅទួត១០នាក់៕
ចែករំលែកព័តមាននេះ