ទៀត​ហើយ ! គណបក្ស​HRP


រាជធានី​ភ្នំពេញ ៖ ខណៈ​ដែល​គ​.​ជ​.​ប កំពុង​ទទួល​ការ​ចុះបញ្ជី​បេក្ខជន​ឈរ​បោះ​ឆ្នោត​នោះ គណបក្ស​សិទ្ធិ​មនុស្ស​ប្រកាស​បញ្ជាក់​ជំហរ​ជា​ថ្មី​ថា ទោះបីជា​នៅ​មានឈ្មោះ​ក្នុង​បញ្ជី​ឈ្មោះ គណបក្ស​នយោបាយ​ដែល​ក្រសួងមហាផ្ទៃ​ទើប​ផ្សព្វផ្សាយ​នា​ពេល​ថ្មី​ៗ​នេះ​ក៏​ដោយ​ក៏​គណបក្ស​នឹង​មិន​ចូលរួម​ការ​បោះ​ឆ្នោត​ថ្នាក់​ជាតិ​ជ្រើសតាំង​តំណាងរាស្ដ្រ​អាណត្តិ​ទី​៦ នៅ​ថ្ងៃ​ទី​២៩ ខែកក្កដា ឆ្នាំ​២០១៨ ខាង​មុខ​នេះ​ទេ ។

ការ​សម្រេច​របស់​គណបក្ស​សិទ្ធិ​មនុស្ស​ដែល​លោក​កឹ​ម សុខា​អតីត​ប្រធាន​គណបក្ស​សង្គ្រោះ​ជាតិ​ធ្លាប់​ធ្វើ​ជា​ប្រធាន​ក្នុង​ការ​មិន​ចូលរួម​បោះ​ឆ្នោត​នេះ គឺ​មិនមែន​មាន​តែ​គណបក្ស​នេះ​មួយ​ទេ គឺ​មាន​គណបក្ស​ជា​ច្រើន​ទៀត​ដូច​ជា គណបក្ស​អំណាច​ខ្មែរ និង​គណបក្ស​ភ្លើងទៀន​ជាដើម ។

យោង​តាម​សេចក្ដីថ្លែងការណ៍​របស់​គណបក្ស​សិទ្ធិ​មនុស្ស​នៅ​ថ្ងៃ​ទី​៩ ខែឧសភា ឆ្នាំ​២០១៨ ឲ្យ​ដឹង​ថា គណបក្ស​សិទ្ធិ​មនុស្ស​ជា​ភាគី​ស្ថាបនិក​នៃ​គណបក្ស​សង្គ្រោះ​ជាតិ​ដែល​តែង​ចង់​ឃើញ​មាន​ដំណោះស្រាយ​នយោបាយ​ដោយ​មានការ​ដោះ​លែង​លោក​កឹ​ម សុខា ដែល​ជា​អ្នកទោស​នយោបាយ និង​មាន​វត្តមាន​គណបក្ស​សង្គ្រោះ​ជាតិ ក្នុង​បោះ​ឆ្នោត ដោយ​សេរី និង​ត្រឹមត្រូវ ។

គណបក្ស​សិទ្ធិ​មនុស្ស​ធ្លាប់​បាន​ជូនដំណឹង​ទៅ​ក្រសួងមហាផ្ទៃ​កាលពី​ខែមករា ដើមឆ្នាំ​នេះ​អំពី​ការ​រំលាយ​គណបក្ស​សិទ្ធិ​មនុស្ស​ចាប់​ពេល​នោះ​មក​គណបក្ស​មិន​ដែល​គិត​ថា ខ្លួន​នៅ​តែ​ជា​គណបក្ស​សិទ្ធិ​មនុស្ស​ទៀត​ឡើយ ។

ក្នុង​សេចក្ដីថ្លែងការណ៍​ដដែល​បាន​បញ្ជាក់​ថា «​គណបក្ស​សិទ្ធិ​មនុស្ស​សូម​បញ្ជាក់​ជំហរ​សារ​ជា​ថ្មី ជូន​សាធារណ​ជនជាតិ​-​អន្ដរជាតិ​ឲ្យ​ជ្រាប​ថា ទោះបីជា​នៅ​មានឈ្មោះ​ក្នុង​បញ្ជី​ឈ្មោះ​គណបក្ស នយោបាយ​ដែល​ក្រសួងមហាផ្ទៃ​ទើប​ផ្សព្វផ្សាយ​នា​ពេល​ថ្មី​ៗ​នេះ និង​ទោះ​ស្ថិត​ក្នុង​កាលៈទេស​ណា​ក៏​ដោយ​ក៏​គណបក្ស​សិទ្ធិ​មនុស្ស​នឹង​មិន​ចូលរួម​បោះ​ឆ្នោត​នៅ​ថ្ងៃ​ទី​២៩ ខែកក្កដា ឆ្នាំ​២០១៨ នា​ពេល​ខាង​មុខ​នេះ​ឡើយ​» ។

គួរ​បញ្ជាក់ ៖ ទោះបី​មាន​បក្ស​មួយ​ចំនួន​មិន​ចូលរួម​ការ​បោះ​ឆ្នោត​ជ្រើសតាំង​អ្នកតំណាង​រាស្ត្រ​អាណត្តិ​ទី​៦​ក៏​ដោយ តែ​ក៏​មាន​បក្ស​ថ្មី​ជា​ច្រើន​ទៀត​បាន​បង្កើត​ជា​បន្តបន្ទាប់ ដើម្បី​ចូលរួម​បោះ​ឆ្នោត​ផង​ដែរ ដូច​ជា​គណបក្ស​ឆន្ទៈ​ខ្មែរ របស់​កូនលោក​គង់ គាំ អតីតមន្ត្រី​ជាន់ខ្ពស់​គណបក្ស​សង្គ្រោះ​ជាតិ គណបក្ស​ពន្លឺ​ថ្មី គណបក្ស​ខ្មែរ​តែ​មួយ គណបក្ស​រស្មី​ខេមរា​ជាដើម ។

សូម​រំលឹក​ថា ប្រធាន​គណបក្ស​សិទ្ធិ​មនុស្ស (​គ​សម​) លោក សឺ​ន ស៊ូ​បែ​រ្តិ៍ កាលពី​ថ្ងៃ​ទី​២៨ ខែមករា​កន្លង​ទៅ​បាន​ផ្ញើ​លិខិត​មួយ​ច្បាប់​ជូន​សម្ដេច​ក្រឡាហោម ស ខេ​ង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ ពី​ការ​រំលាយ​គណបក្ស​របស់​ខ្លួន​ដោយ​ប្រធាន​គណបក្ស​សិទ្ធិ​មនុស្ស​រូប​នេះ​អះអាង​ថា ការ​រំលាយ​នេះ គឺ​ស្រប​តាម​ស្មារតី​អង្គប្រជុំ​របស់​គណៈកម្មាធិការ​អចិន្ត្រៃយ៍​នៃ​គណ បក្ស​សិទ្ធិ​មនុស្ស ។

គណបក្ស​សិទ្ធិ​មនុស្ស​បង្កើត​ឡើង​នៅ​ឆ្នាំ​២០០៧ ដោយ​មាន​ប្រជាពលរដ្ឋ​ប្រមាណ​ជា​២០​ម៉ឺន នាក់​បាន​ផ្តិត​មេដៃ ដើម្បី​ឲ្យ​លោក កឹ​ម សុខា ដែល​ជា​អតីត​ប្រធាន​មជ្ឈមណ្ឌល​សិទ្ធិ​មនុស្ស កម្ពុជា ធ្វើ​ជា​ប្រធាន​គណបក្ស ។ បង្កើត​បាន​១​ឆ្នាំ​លោក​ក៏​បាន​ឈរឈ្មោះ​ជា​បេក្ខភាព​នាយក​រដ្ឋមន្ត្រី​សម្រាប់​ការ​បោះ​ឆ្នោត​សភា​ខែកក្កដា ឆ្នាំ​២០០៨ ដែល​ពេល​នោះ​គណបក្សកាន់អំណាច បាន​ឈ្នះ​សំឡេង​ភាគច្រើន ភ្លូកទឹកភ្លូកដី ចំណែក​គណបក្ស​សិទ្ធិ​មនុស្ស​វិញ​ស្ថិត​នៅ​លំដាប់​ទី​៣ បន្ទាប់​ពី​គណបក្ស​សម រ​ង្ស៊ី ។

ក្រោយ​ពី​ការ​បង្កើត​គណបក្ស​មិន​បាន​ប៉ុន្មាន​ឆ្នាំ​ផង គណបក្ស​សិទ្ធិ​មនុស្ស និង​គណបក្ស​សមរ​ង្ស៊ី បាន​ប្រកាស​រួបរួម​គ្នា​ទៅ​បង្កើត​គណបក្ស​សង្គ្រោះ​ជាតិ​កាលពី​អំឡុង​ឆ្នាំ​២០១២ ហើយ​បាន​ចូលរួម​ប្រកួតប្រជែង​បោះ​ឆ្នោត​ថ្នាក់​ជាតិ នៅ​ឆ្នាំ​២០១៣ ដោយ​បាន​៥៥​អាសនៈ ចំណែក​គណបក្ស​ប្រជាជន​កម្ពុជា​បាន​ទទួល​៦៨​អាសនៈ ប៉ុន្តែ​មក​ដល់​ថ្ងៃ​ទី​១៦ ខែវិច្ឆិកា ឆ្នាំ​២០១៧ គណបក្ស​សង្គ្រោះ​ជាតិ ត្រូវ​បាន​តុលាការ​កំពូល​រំលាយ​ចោល ដោយសារ​លោក កឹ​ម សុខា ជាប់​ពាក់ព័ន្ធ​អំពើ​ក្បត់ជាតិ ។

គួរ​បញ្ជាក់​ថា ប​ច្ចប្ប​ន្ន​នេះ​ក្រសួងមហាផ្ទៃ​បាន​បាន​ចុះបញ្ជី​ជា​ផ្លូវការ​គណបក្ស​នយោបាយ​ចំនួន​៣៨​ហើយ ។ គណបក្ស​ទាំងនេះ​ខ្លះ​បាន​ប្រកាស​ជំហរ​ចូលរួម​ប្រកួតប្រជែង​ការ​បោះ​ឆ្នោត​ខាង​មុខ​នេះ ។ ក៏​ប៉ុន្តែ​ក៏​មាន​គណបក្ស​មួយ​ចំនួន​បាន​ប្រកាស​ជំហរ​មិន​ចូលរួម​ផង​ដែរ ។

ទាក់ទិន​នឹង​ការ​ចុះ​បោះ​ឆ្នោត​នេះ​ដែរ​គណៈកម្មាធិការ​ជាតិ​រៀបចំ​ការ​បោះ​ឆ្នោត​បាន​ទទួលស្គាល់​ជា​ផ្លូវការ​គណបក្ស​នយោបាយ​ចំនួន​៣ គឺ​គណបក្ស​ប្រជាជន​កម្ពុជា គណបក្ស​យុវជន​កម្ពុជា និង​គណបក្ស​សញ្ជាតិ​ខ្មែរ សម្រាប់​ការ​ដាក់​បេក្ខជន​ឈរឈ្មោះ​បោះ​ឆ្នោត​នៅ​ពេល​ខាង​មុខ​នេះ ។ ហើយ​មាន​គណបក្ស​នយោបាយ​ជា​ច្រើន​ទៀត​បាន​កំពុង​ត្រៀម​មក​ចុះបញ្ជី​បេក្ខជន​ឈរឈ្មោះ​បោះ​ឆ្នោត​ផង​ដែរ ៕

Facebook Google Twitter Email

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

ការស្ទង់មតិគេហទំព័រថ្មី




សូម​អរគុណ