ខេត្តស្វាយរៀង ៖ សម្តេចអគ្គមហាសេនាបតីតេជោហ៊ុនសែនមានប្រសាសន៍ថា តម្លៃសន្តិភាពគឺមានតម្លៃធំធេងណាស់មិនអាចកាត់ថ្លៃបានទេ ដូច្នេះក្មួយៗត្រូវតែចូលរួមថែរក្សាសន្តិភាពឲ្យបានគង់វង់ បើគ្មានសន្តិភាព គឺបាត់អ្វីៗទាំងអស់ ។ រីឯអ្នកខ្លះនិយាយថា សិទ្ធិមនុស្ស និងលិទ្ធិប្រជាធិបតេយ្យ ហើយបើគ្មានសន្តិភាព តើមានសិទ្ធិមនុស្ស និងលទ្ធិប្រជាធិបតេយ្យបានបែបណា ?
សម្តេចមានប្រសាសន៍ទៀតថា ធ្វើយ៉ាងណាថែរក្សាកុំឲ្យមានការបំផ្លាញណាមួយនូវសន្តិភាព ហើយបើថែរក្សាសន្តិភាព គឺវាងាយណាស់ គឺក្មួយៗបោះឆ្នោតឲ្យគណៈបក្សប្រជាជនកម្ពុជា នោះគ្មានអ្នកណាហ៊ានមកបំផ្លាញសន្តិភាពបានឡើយ ។ សម្តេចតេជោមានប្រសាសន៍បែបនេះនៅក្នុងពេលសំណេះសំណាលកម្មករនិយោជិត២៨,៧៤៨នាក់ ក្នុងពិធីសម្ពោធដាក់ឲ្យដំណើរការតំបន់សេដ្ឋកិច្ច ពិសេសអ៊ីនធើវៀ និងរោងចក្រតម្លើងរថយន្តដេហានអូតូក្រុងបាវិតនាថ្ងៃទី៩ ខែឧសភា ឆ្នាំ២០១៨ នៅភូមិព្រៃផ្តៅ សង្កាត់ច្រកម្ទេស ក្រុងបាវិត ។ សម្តេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជាបានមានប្រសាសន៍ទៀតថា រាជរដ្ឋាភិបាលមានផែនការយុទ្ធសាស្ត្រកែរប្រែតំបន់ដែលមានសង្គ្រាមឲ្យក្លាយទៅជាតំបន់អភិវឌ្ឍន៍ ប្រែក្លាយតំបន់ព្រំដែនឲ្យទៅជាព្រំដែនកិច្ចសហប្រតិបត្តិការ និងអភិវឌ្ឍន៍ដែលមានរយៈពេលយូអង្វែងមិនមែនពេលឆក់ក្រដៀតនោះទេ ។
រាជរដ្ឋាភិបាល ប្រឹងប្រែងស្តារឡើងវិញនូវជីវភាពជូនប្រជាជន បើនិយាយថា គោរពសិទ្ធិមនុស្ស និងលិទ្ធិប្រជាធិបតេយ្យ យើងគិតចំបង គឺសិទ្ធិរស់រានមានជីវិត ទំនាក់ទំនងអ្នកវិនិយោគគិនមកវិនិយោគឲ្យកម្មករនិយោជិតមានការងារធ្វើ មានប្រាក់ចំណូល១ខែ១៥៣ដុល្លារនៅឆ្នាំ២០១៧ ប្រាក់របៀវត្ស១៧០ដុល្លារនៅឆ្នាំ២០១៨ បើនិយោជក់ឲ្យប្រាក់ក្រោម១៧០នោះវាជាការខុសច្បាប់ ក៏ប៉ុន្តែបើឲ្យលើសពី១៧០ដុល្លារនោះពិតជាកាន់តែប្រសើរអត់ខុសច្បាប់ទេ ។ នេះជាសុខដុមរមនារវាងម្ចាស់រោងចក្រ និងកម្មករនិយោជិតមានប្រាក់ចំណូលកើនឡើង ។
បើយើងក្រឡេកមើលពីអតីតកាលឆ្នាំ១៩៧០ទៅ១៩៧៥ តើមានអ្នកណាមកវិនិយោគ ប្រទេសមានសង្គ្រាមរបបលន់ណុលធ្លាក់ចូលរបបប្រល័យពូជសាសន៍ប៉ុលពត មានតែទុក្ខវេទនាកុំថា ឡើយការអភិវឌ្ឍន៍ ក៏ប៉ុន្តែរយៈពេល៤០ឆ្នាំក្រោយមកនេះប្រជាជនយើងមានការអភិវឌ្ឍន៍ យើងមានការដឹកនាំតែមួយ ដោយសារតែមានសន្តិភាពនេះហើយ ទើបប្រទេសកម្ពុជា ទទួលបានភ្ញៀវទេសចរណ៍ មកចូលទស្សនាកម្សាន្ត។
សម្តេចបានសង្កត់ធ្ងន់ថា លុះត្រាតែមានអ្នកចង់បំផ្លាញសុខសន្តិភាព ចង់បំផ្លាញសង្គមជាតិ សម្តេចនៅតែបន្តធ្វើជានាយករដ្ឋមន្ត្រីទៀត ដើម្បីការពារសន្តិភាពធ្វើនាយករដ្ឋមន្ត្រី៣៣ឆ្នាំ ហើយថែម១០ឆ្នាំទៀត បើសម្តេចនៅជានាយករដ្ឋមន្ត្រីគ្មានអ្នកណាមកបំផ្លាញសន្តិភាពបានទេ បើយើងស្គាល់តម្លៃសន្តិភាពច្បាស់ ។
សម្តេចក៏បានមានប្រសាសន៍ដែរថា លើកទឹកចិត្ត រក្សារសិទ្ធិអ្នកធ្វើកូដកម្មតាមសន្តិវិធីទាមទាផលប្រយោជន៍កម្មករនិយោជិត តែមិនអនុញ្ញាតិឲ្យមានជើងកាងនៅក្នុងរោងចក្រទៀតទេ ។ រាជរដ្ឋាភិបាលគោរពសិទ្ធិមនុស្ស និងលទ្ធិប្រជាធិបតេយ្យ គឺធំសិទ្ធិរស់រានមានជីវិត មានប្រាក់បៀវត្សខ្ពស់ ។ ហើយកម្មករនិយោជិតខេត្តស្វាយរៀងក្រុងបាវិតមាន២៦រោងចក្រ កម្មករកម្មការនីមានជាង៥ម៉ឺននាក់ គិតជាមធ្យមប្រាក់ខែម្នាក់២០០ដុល្លារគុណ១២ខែ តើម្នាក់ៗបានប្រាក់ប៉ុន្មាន ហើយគុណ៥ម៉ឺននាក់ ក្នុង១ខែ គឺស្មើ១២០,០០០,០០០ដុល្លារក្នុងមួយខែនេះ គឺចំណូលសម្រាប់ប្រជាពលរដ្ឋខេត្តស្វាយរៀង។
ហើយនៅឆ្នាំ២០១៩ និងដាក់ឲ្យអនុវត្សប្រាក់ចូលនិវត្សរបស់កម្មករនិយោជិតដូចជា មន្ត្រីរាជការដែរ ដោយគោរពតាមលក្ខខណ្ឌត្រូវធ្វើការឲ្យគ្រប់ឆ្នាំគិតចាប់ពី៥ឆ្នាំ១ថ្ងៃឡើងទៅ បើផ្លាស់ប្តូររោងចក្រគឺគិតចាប់ពី៨ឆ្នាំ១ថ្ងៃឡើងទៅ ។ សូមកម្មករនិយោជិតរក្សាឲ្យបាននូវសៀវភៅការងារពេលប្តូរការងារពីរោងចក្រមួយទៅរោងចក្រមួយ ដើម្បីឲ្យម្ចាស់រោងចក្រថ្មីគេចុះឈ្មោះរយៈពេលការងារឲ្យ ។
ក្នុងឱកាសនោះដែរក្រុមហ៊ុនតម្លើងរថយន្តដេហាន់អូតូបានប្រគល់រថយន្តថ្មីសម្រាប់ដឹកកម្មករនិយោជិតចំនួន១២គ្រឿង ដល់ក្រសួងការងារ ក៏ប៉ុន្តែសម្តចតេជោបានប្រគល់រថយន្ត១២គ្រឿងនេះ ឲ្យមន្ទីរការងារ និងបណ្តុះបណ្តាលវិជាជីវៈខេត្តស្វាយរៀងគ្រប់គ្រងសម្រាប់ដឹកកម្មករនិយោជិតមកធ្វើការ និងខាងធនាគារក៏បានលើកទឹកចិត្តឲ្យអ្នកប្រកបមុខរបរដឹកម្មករនិយោជិតកម្ចីប្រាក់ធនាគារ ដើម្បីទិញរថយន្តបង់រំលោះផងដែរ សម្រាប់ខេត្តស្វាយរៀង ។ ក្នុងឱកាសនោះដែរសម្តេចតេជោ ក៏បានផ្តល់អំណោយដល់កម្មករនិយោជិតចូលរួមនាព្រឹកនេះចំនួន២៨,៧៤៨នាក់ ក្នុងម្នាក់ៗទទួលបានប្រាក់២ម៉ឺនរៀល ដោយឡែកស្ត្រីដែលមានផ្ទៃពោះ ចំនួន៨៣២នាក់ ក្នុងម្នាក់ៗទទួលបាន២០០ដុល្លារ និង២ម៉ឺនរៀល ៕
ចែករំលែកព័តមាននេះ