ខេត្តក្រចេះ ៖ ការពុលដែលបានវាយលុកអ្នកស្រុកស្ទើរពេញមួយភូមិពេលនេះ អាជ្ញាធរត្រួតត្រាស្ថាន ការណ៍បានហើយ ដោយគ្មានអ្នកពុលកើនឡើងទៀតទេ ឯអ្នករងគ្រោះដែលបានបញ្ជូនមកព្យាបាលក៏វិលត្រឡប់ទៅលំនៅឋានរបស់ខ្លួនវិញជាបណ្តើរៗដែរ ។ ចំពោះការពុលដែលអាជ្ញាធរកំណត់ថា ដើមចមបណ្តាលមកពីពុលស្រា និងទឹកព្រែក បានផ្ទុះជាបាតុភាពយ៉ាងគំហុកវាយលុកលើអ្នកស្រុកក្មេងចាស់ពេញមួយភូមិស្រែនន និងភូមិអាលច ឃុំកន្ទួត ស្រុកចិត្របុរី ក្នុងនោះបានបង្កឱ្យមានអ្នកភូមិប្រុសស្រីយ៉ាងតិច១៣ស្លាប់ និងច្រើនរយនាក់ទៀតត្រូវបាននាំទៅសង្គ្រោះ ។
នៅថ្ងៃទី៨ ខែឧសភា ស្ថានភាពនៃការពុលបានធូរស្រាលមកវិញហើយ ឯចំនួនអ្នកភូមិដែលរងគ្រោះដោយ សារពុលមិនមានតួលេខកើនឡើងទេ ចំណែកអ្នកភូមិរងគ្រោះដែលបញ្ជូនទៅសង្គ្រោះក៏មានភាពធូរ ស្រាល និងបានត្រឡប់ទៅកាន់ភូមិឋានវិញ ។ នេះបើតាមការបញ្ជាក់របស់ប្រធានមន្ទីរសុខាភិបាលខេត្ត លោក ឈ្នាង សុវត្ថា ។
ថ្លែងប្រាប់ឱ្យដឹងនៅថ្ងៃទី៨ ឧសភា លោកប្រធានមន្ទីរសុខាភិបាលមានប្រសាសន៍ថា អ្នកភូមិដែលរងគ្រោះ និងបានមកទទួលការសង្គ្រោះនៅមន្ទីរពេទ្យមានចំនួន២៣៧នាក់(ស្រី១៧១នាក់) ។ យោងតាមការសិក្សារបស់ក្រុមជំនាញមកពីក្រសួងសុខាភិបាល និងអង្គការសុខភាពពិភពលោក ក៏ដូចជាមន្ទីរសុខាភិបាលខេត្តបានរកឃើញថា អ្នកដែលមានរោគសញ្ញាទាក់ទងនឹងការពុលចំនួន៥៨នាក់(ស្រី៣៥នាក់) ស្លាប់ចំនួន១៣នាក់(ស្រី៨នាក់) ។ រហូតមកទល់នឹងពេលនេះ ស្ថានភាពអ្នកជំងឺសម្រាកពេទ្យដែលធូរស្រាល ត្រូវបានអនុញ្ញាតឱ្យចេញចំនួន១២៣នាក់ ក្នុងនោះស្រី្ត៤៩នាក់ កុមារ៥៨នាក់។
បើតាមលោក ឈ្នាង សុវត្ថា បានបញ្ជាក់ថា អាការរបស់អ្នកជំងឺទាំងស្លាប់និងឈឺកំពុងជួយសង្គ្រោះ គឺមានអាការពុលដូចៗគ្នាដូចជា ងងឹតមុខ ស្រវាំងភ្នែក ហេវហត់ ណែនដើមទ្រូង ទន់ដៃជើង ។ លោកប្រធានមន្ទីរលើកឡើងថា ក្រុមគ្រូពេទ្យបានពន្យល់ណែនាំពលរដ្ឋ ពេលទៅដល់ភូមិវិញឱ្យពួកគាត់មានការប្រុងប្រយ័ត្នក្នុងការទទួលទានអាហារប្រចាំថ្ងៃ ពិសេសហាមមិនឱ្យពួកគាត់ទទួលទានស្រា.ស និងទឹកព្រែក អូរ នោះទៀតទេ ។ក្រុមអាជ្ញាធរដែលមានវត្តមានជួយសង្គ្រោះបានប្រាប់ឱ្យដឹងថា អ្នកភូមិប្រុសស្រីក្មេងចាស់ត្រូវបានអាជ្ញាធរដឹកបញ្ជូនពួកគាត់តាមរថយន្តធំៗរបស់អង្គភាពកងកម្លាំង ចេញពីមន្ទីរពេទ្យ នាំឆ្ពោះទៅកាន់លំនៅឋានក្នុងភូមិវិញ ។
ដោយនិយាយរដឺនៗជាជនជាតិភាគតិចព្នង ក្នុងវ័យ៧៦ឆ្នាំ បុរសឈ្មោះ ហញ ក្លើស ដែលប្រពន្ធគាត់បានស្លាប់ដោយការពុលរៀបរាប់ថា អាការរបស់គាត់បានធូរស្រាលក្រោយពីបានមកព្យាបាលនៅមន្ទីរពេទ្យ ។ គាត់នឹងចូលទៅរស់នៅក្នុងភូមិវិញ ប្រសិនបើមានអ្នកភូមិច្រើននាក់ចូលទៅដែរនោះ ។ គាត់ថា អ្នកភូមិនឹងមានពិធីតាមប្រពៃណីជនជាតិភាគតិចគឺ កាប់គោ ក្របីដើម្បីសែនដល់អ្នកតាម្ចាស់ស្រុក ក្រោយពីស្ថានភាពពុលនេះបានធូរស្រាល ។
លើកឡើងស្រដៀងគ្នានេះ អ្នកភូមិខ្លះនិយាយថា ពួកគាត់ហាក់ដូចជាមិនហ៊ានចូលទៅរស់នៅក្នុងភូមិវិញទេ នៅពេលដែលភូមិរបស់គាត់បានជួបគ្រោះអាក្រក់ ធ្វើឱ្យមានមនុស្សស្លាប់ច្រើននាក់បែបនេះរួចមក ។ដោយសារតែស្ថានភាពពុលបានវាយលុកយ៉ាងខ្លាំងទៅលើអ្នកភូមិស្រែនន ដែលជាភូមិមួយសម្បូរទៅដោយបងប្អូនជនជាតិភាគតិចព្នងរស់នៅ មានទីតាំងនៅប្របនឹងដងព្រែកទេរ ក្នុងរយៈពេលប៉ុន្មានថ្ងៃចុងក្រោយនេះ ធ្វើឱ្យភូមិដែលធ្លាប់មានអ្នកភូមិរស់នៅយ៉ាងអ៊ូអរ ឥឡូវប្រែក្លាយទៅជាស្ងាត់ជ្រងំ និងត្រូវបានអ្នកភូមិប្តូរឈ្មោះថាជាភូមិខ្មោច ។
សំឡេងគោ ក្របី ឆ្កែ ជ្រូក មាន់ ទា នៅស្រែកយំរង៉ោងពេញភូមិលាយឡំនឹងផ្សែងភ្នក់ភ្លើង ដែលអ្នកភូមិគរដុត និងរូបទីងមោងខាងមុខផ្ទះ លើជំនឿអរូបីដែលពួកគាត់ជឿថា ដើម្បីបណ្តេញខ្មោចព្រាយបិសាចឱ្យចេញពីភូមិ ។ ទិដ្ឋភាពក្នុងភូមិ គឺកាន់តែស្ងាត់ច្រៀបពីមួយថ្ងៃទៅមួយថ្ងៃ មើលទៅហាក់គួរឱ្យសង្វេគជាពន់ ពេក នៅពេលមនុស្សស្ទើរ១ភូមិ បានជួបរឿងអាក្រក់មួយដែលអាជ្ញាធរថា បណ្តាលមកពីពុលទឹកព្រែកទេរសម្លាប់អាយុជីវិតមនុស្សនៅនឹងមុខស្រស់ៗ ។ ក្រៅពីនោះ អ្នកភូមិដែលមិនរងនឹងការពុល ក៏បានចាក់សោផ្ទះ លែងគោក្របីចេញពីក្រោល និងបានជម្លៀសខ្លួន ទៅរស់នៅឆ្ងាយពីភូមិមួយរយៈពេល ៕
ចែករំលែកព័តមាននេះ