រាជធានីភ្នំពេញ ៖ យ៉ាងហោចណាស់ នារីវ័យក្មេងម្នាក់បានស្លាប់ និងបុគ្គលិកប្រុស-ស្រីទាំងខ្មែរ និងបរទេស៤នាក់ទៀត រងរបួសរលាកខ្លួនប្រាណធ្ងន់ និងស្រាលក្នុងហេតុការណ៍ផ្ទុះធុងហ្គាស នៅក្នុងភោជនីយដ្ឋានឥណ្ឌាមួយកន្លែង ដែលមានយីហោស៊ែរ អុី ប៉ាន់យ៉ាប ។ ការផ្ទុះធុងហ្គាសនោះ បណ្តាលឱ្យឆាបឆេះ និងផ្ទុះបែកកញ្ចក់ចេញមកខាងក្រៅលាន់ឮកក្រើកអាកាស បង្កឱ្យមានការភ្ញាក់ផ្អើលហៅរថយន្តពន្លត់អគ្គិភ័យជាច្រើនគ្រឿងមកអន្តរាគមន៍ កាលពីវេលាម៉ោង៩ និង៤៥នាទីព្រឹក ថ្ងៃទី៨ ឧសភា នៅចំណុចភោជនីយដ្ឋានយីហោ ស៊ែរ អុី ប៉ាន់យ៉ាប ផ្ទះលេខ១៦E0 ផ្លូវលេខ១៣០ ក្នុងសង្កាត់ផ្សារកណ្តាលទី១ ខណ្ឌដូនពេញ ។
កញ្ញា ម៉ាលី អាយុ២៥ឆ្នាំ ជាបុគ្គលិកបម្រើការងារនៅក្នុងភោជនីយដ្ឋានបរទេសមួយកន្លែងទៀត ដែលមានទីតាំងនៅក្បែរនោះបានប្រាប់ឱ្យដឹងថា នៅពេលដែលនាងរួមទាំងបុគ្គលិកចំនួន៣នាក់ទៀត កំពុងតែនាំគ្នាអង្គុយលេងទូរស័ព្ទនោះ ស្រាប់តែឮសំឡេងផ្ទុះធុងហ្គាសឡើងកក្រើក ។ ភ្លាមៗនោះ នាងបានរត់ទៅកាច់បារ៉ែតភ្លើង និងបិទហ្គាសក្នុងហាងរបស់នាង ហើយនាំគ្នាស្ទុះរត់ចេញទៅខាងក្រៅយ៉ាងប្រញាប់ ។ នៅពេលដែលនាងរត់ចេញផុតពីហាងមកដល់ខាងក្រៅ ក៏បានប្រទះឃើញបុរសជនជាតិឥណ្ឌា២នាក់ បានរត់ចេញមកខាងក្រៅហាងដែរ ដោយនៅលើដងខ្លួនពួកគេសុទ្ធតែមានស្នាមឆេះរលាកភ្លើងពេញខ្លួនប្រាណ និង
មានទាំងអំបែងកញ្ចក់បែកខ្ទាតហោះបាចសាចមកខាងក្រៅ ធ្វើឱ្យនាងមានការតក់ស្លុត ភ័យខ្លាចញ័រខ្លួនប្រាណ។
បើតាមសមត្ថកិច្ចមូលដ្ឋានម្នាក់បានប្រាប់ឱ្យដឹងថា ក្រោយពីមានការភ្ញាក់ផ្អើលអំពីការផ្ទុះធុងហ្គាសបង្កជាអគិ្គភ័យនៅក្នុងហាងយីហោ ស៊ែរអុីប៉ាន់យ៉ាប រួចមក កម្លាំងសមត្ថកិច្ចរបស់លោកក៏បាននាំគ្នាប្រញាប់ចេញមកធ្វើអន្តារាគមន៍ជាច្រើននាក់ ដោយមានទាំងរ៉ឺម៉កម៉ូតូពន្លត់អគ្គិភ័យរបស់សាលាខណ្ឌដូនពេញចំនួន៣គ្រឿងចេញមកបាញ់ទឹកពន្លត់ជាបឋម និងហៅរថយន្តពន្លត់មកបន្តបន្ទាប់គ្នា ។ ហេតុការណ៍ផ្ទុះធុងហ្គាសនេះ បានបណ្តាលឱ្យបុរស៤នាក់រងរបួសធ្ងន់ និងស្រាល ក្នុងនោះមានខ្មែរពីរនាក់(ស្រី១ប្រុស១) បុរសជនជាតិឥណ្ឌាម្នាក់ និងបុរសនេប៉ាល់ម្នាក់ ត្រូវបានបញ្ជូនទៅកាន់មន្ទីរពេទ្យភ្លាមៗ ។ តាមការបញ្ជាក់បានប្រាប់ឱ្យដឹងថា ពាក់ព័ន្ធនឹងករណីផ្ទុះធុងហ្គាសនៅក្នុងហាងបរទេសនេះ ទំនងជាអាចកើតឡើងដោយសារតែការធ្វេសប្រហែស និងប្រើប្រាស់ធុងហ្គាសដោយខុសបច្ចេកទេស ។
ក្រោយការភ្ញាក់ផ្អើល ជុំវិញហេតុការណ៍គួរឱ្យតក់ស្លុតនេះ រហូតដល់វេលាម៉ោង១និង១៥នាទីរសៀលក៏បង្កឱ្យមានការភ្ញាក់ផ្អើលម្តងទៀត នៅក្នុងហាងដដែលនេះ ដោយគេបានប្រទះឃើញសាកសពក្មេងស្រីម្នាក់ ជាបុគ្គលិកបានស្លាប់នៅក្នុងបន្ទប់ឡៅតឿក្នុងហាងនោះ ខណៈមានការឆេះឡើងសាជាថ្មីម្តងទៀត ។ សមត្ថកិច្ចបានចុះមកកន្លែងកើតហេតុ ដោយយករ៉ឺម៉កម៉ូតូពន្លត់អគ្គិភ័យចំនួន៣គ្រឿង និងហៅរថយន្តពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញចំនួន៣គ្រឿង មកជួយអន្តរាគមន៍បាញ់ទឹកពន្លត់ម្តងទៀត ដោយសារមានភ្លើងឆេះមានផ្សែងខ្មៅហុយចេញពីក្នុងហាងនោះជាថ្មី ។ ការប្រទះឃើញសពបុគ្គលិកស្រីម្នាក់នោះ ខណៈកម្លាំងសមត្ថកិច្ចបានទម្លាយជញ្ជាំងចូលទៅក្នុងបន្ទប់ឡៅតឿ ក៏ប្រទះឃើញសពឆេះខ្លោចស្លាប់នៅក្នុងបន្ទប់ឡៅតឿន និងបានលើកសពយកចេញមកខាងក្រៅភ្លាមៗ ។
ជុំវិញការស្លាប់បុគ្គលិកស្រីម្នាក់នេះ ត្រូវបានស្ត្រីដែលត្រូវជាម្តាយធំ រួមទាំងសាច់ញាតិជាច្រើនទៀតបានមកដល់កន្លែងកើតហេតុ និងបានប្រាប់ថា នារីរងគ្រោះឈ្មោះ អុិន ស្រីម៉ៅ អាយុ១៧ឆ្នាំ ស្នាក់នៅជាមួយគាត់នៅក្នុងសង្កាត់ផ្សារកណ្តាលទី២ ខណ្ឌដូនពេញ និងមានស្រុកកំណើតនៅភូមិអង្ក្រង ឃុំជាងដែក ស្រុកកំពង់ត្របែក ខេត្តព្រៃវែង ។ នាងទើបតែមកចូលធ្វើការងារនៅក្នុងហាងខាងលើបានតែ២ថ្ងៃប៉ុណ្ណោះ ក៏ជួបគ្រោះអកុសលបែបនេះកើតឡើង ។
ករណីផ្ទុះធុងហ្គាសនៅក្នុងហាងម្ហូបឥណ្ឌា ដែលបានបណ្តាលឱ្យនារីវ័យក្មេងជាបុគ្គលិកម្នាក់ស្លាប់នេះ ដោយសារតែការថប់ដង្ហើម ។ ករណីផ្ទុះធុងហ្គាសនេះដែរ បានឆេះបំផ្លាញអស់ទ្រព្យសម្បត្តិ និងសម្ភារប្រើប្រាស់អស់មួយចំនួន ដោយប្រើប្រាស់រថយន្តពន្លត់អគ្គិភ័យអស់ទឹកសរុបចំនួន៩គ្រឿង និងរ៉ឺម៉កម៉ូតូពន្លត់អគ្គិភ័យរបស់សាលាខណ្ឌដូនពេញអស់ទឹកជាច្រើនធុងផងដែរ ។ ចំណែកសពនារីជាបុគ្គលិកត្រូវបានក្រុមគ្រួសារបញ្ជូនទៅតម្កល់នៅវត្តទួលសង្កែ ដើម្បីធ្វើបុណ្យតាមប្រពៃណី ។
មកដល់វេលាល្ងាចថ្ងៃដដែល មិនទាន់មានប្រភពព័ត៌មានណាមួយឱ្យដឹងថា ការផ្ទុះធុងហ្គាសនេះបណ្តាលមកពីមូលហេតុអ្វីឡើយ រីឯអ្នករងគ្រោះរលាកខ្លួនប្រាណទាំង៤នាក់ ក៏បានត្រឹមតែដឹងថា ជាបុគ្គលិកហាង
ប៉ុណ្ណោះ ៕
ចែករំលែកព័តមាននេះ