ទីក្រុងតេហេរ៉ង់ ៖ តម្លៃប្រេងក្នុងពិភពលោក បានកើនឡើងដល់៧០ដុល្លារក្នុង១ធុង បន្ទាប់ពីធ្លាក់ចុះយ៉ាងខ្លាំងក្នុងឆ្នាំ២០១៤កន្លងមក ព្រោះវិនិយោគិនកាន់តែច្រើនបារម្ភថា សហរដ្ឋអាមេរិកអាចនឹងបន្តដាក់ទណ្ឌកម្មលើប្រទេសអ៊ីរ៉ង់ ។
ប្រទេសទាំងពីរនេះមានភាពតានតឹងទាក់ទងនឹងផែនការសកម្មភាពយោគយល់រួម ឬកិច្ចព្រមព្រៀងអាវុធនុយក្លេអ៊ែរអុីរ៉ង់ឆ្នាំ២០១៥។ លោកប្រធានាធិបតីអាមេរិក ដូណាល់ ត្រាំ នឹងសម្រេចចិត្តដាក់ទណ្ឌកម្មបន្តលើអុីរ៉ង់ នាថ្ងៃទី១២ ខែឧសភា ខាងមុខ ។
អ៊ីរ៉ង់ស្ថិតក្នុងចំណោមប្រទេសដែលនាំចេញប្រេងច្រើនជាងគេលើពិភពលោក និងជាប់ចំណាត់ថ្នាក់លេខ៧ ដោយនាំចេញបាន៤,៣%នៃការនាំចេញប្រេងសរុប ។ កាលពីឆ្នាំមុនប្រទេសនេះបាននាំចេញប្រេងឆៅប្រមាណជិត២លានធុងក្នុង១ថ្ងៃ ។
លោក Manoon Siriwan អ្នកវិភាគផ្នែកថាមពលក្នុងប្រទេសថៃ និយាយថា ៖« គេគិតថា នាសប្តាហ៍នេះ តម្លៃប្រេងនឹងបន្តកើនឡើងលើសពី៧០ដុល្លារក្នុង១ធុង ខណៈការដាក់ទណ្ឌកម្មកំពុងតែជិតសម្រេច ។ ប្រសិនបើសហរដ្ឋអាមេរិកសម្រេចថា បន្តការដាក់ទណ្ឌកម្មនោះ តម្លៃនឹងកើនឡើងបន្តទៀត » ។
លោកបន្តថា ទោះជាយ៉ាងណា តម្លៃប្រេងប្រហែលជាមិនអាចកើនលើសពី១០០ដុល្លារក្នុង១ធុង ដូចធ្លាប់កើតមានក្នុងអំឡុងពីឆ្នាំ២០០៩ ដល់២០១៤ឡើយ ព្រោះទិន្នផលប្រេងឆៅអាមេរិកបានកើនឡើងពីមួយឆ្នាំទៅមួយឆ្នាំ ។
របាយការណ៍របស់ Energy Information Administration (EIA) ឲ្យដឹងថា កាលពីឆ្នាំ២០១៧ ទិន្នផលប្រេងប្រចាំឆ្នាំជាមធ្យមរបស់សហរដ្ឋអាមេរិក បានកើនដល់៩,៣លានធុងក្នុង១ថ្ងៃ ច្រើនជាងឆ្នាំ២០១៦ ដល់ទៅ៤៦ម៉ឺន៤ពាន់ធុងក្នុង១ថ្ងៃ ។
EIA ព្យាករថា ផលិតកម្មប្រេងអាមេរិកនឹងបន្តលូតលាស់ក្នុងឆ្នាំ២០១៨នេះ មកស្មើជាមធ្យម១០,៧លានធុងក្នុង១ថ្ងៃ និងឆ្នាំ២០១៩ ស្មើ១១,៣លានធុងក្នុង១ថ្ងៃ ៕
ចែករំលែកព័តមាននេះ