ខេត្តកំពង់ស្ពឺ ៖ ក្រោយការផ្សាយរបស់កោះសន្តិភាពអំពីជីវិតដ៏លំបាករបស់កុមារពិការទាំង៣នាក់បងប្អូនដែលរស់នៅជាមួយម្តាយរួចមក ធ្វើអោយថ្នាក់ដឹកនាំកាកបាទក្រហមស្រុក សប្បុរសជនដែលមានចិត្តសប្បុរសបានផ្តល់ថវិកា និងរទេះរុញជនពិការតាមរយៈភ្នាក់ងារកោះប្រចាំខេត្តកំពង់ស្ពឺដើម្បីសម្រួលដល់ការលំបាករបស់ស្ត្រីជាម្តាយ និងកុមារទាំង៣នាក់បានអង្គុយលើរទេះសមដូចបំណងហើយ ។
នៅរសៀលថ្ងៃទី៨ ឧសភា ២០១៨ កុមារទាំង៣នាក់ត្រូវបាននាំយកទៅកាន់មជ្ឈមណ្ឌស្តារលទ្ឋភាពពលកម្ម កាយសម្បទារខេត្តកំពង់ស្ពឺ់ ដោយការព្យាបាលនេះមិនតម្រូវអោយបង់ថវិកាឡើយ ហើយនៅទីនោះមានទីកន្លែងសម្រាប់ស្នាក់អាស្រ័យទៀតផង។
សប្បុរសជនដែលបានបរិច្ចាគថវិការួមមាន លោក អន នាង នាយករងរដ្ឋបាលសាលាក្រុងភ្នំពេញ ផ្តល់ថវិកា២០០.០០០រៀល ។ លោកវ៉ាន់គី លោកឡុង ប៊ុនណា លោកស្រីកង ច័ន្ទថារី កញ្ញាឡាយ ពុទ្ឋានី និងលោកនៅ ចំណាន រស់នៅភូមិព្រៃព្រីង ខណ្ឌពោធិសែនជ័យឧបត្ថម្ភថវិកាដល់កុមារទាំងបីនាក់ចំនួន២០០.០០០រៀល។
ជាងនេះទៅទៀត កាលពីល្ងាចថ្ងៃទី៧ ឧសភា ២០១៨ លោកស្រីអោម ចន្ថា នាយិកាសាខាកាកបាទក្រហមខេត្ត បានចុះសូរសុខទុក្ខ និងនាំយកអំណោយមនុស្សធម៌របស់កាកបាទក្រហមកម្ពុជាជូនដល់អ្នកស្រីឃិន សុវណ្ណ ជាម្តាយ និងរទេះរុញជនពិការចំនួន៣គ្រឿងជូនដល់កុមារទាំង៣ផងដែរ ។ ក្នុងនោះដែរ លោកស្រីក៏បាននាំយកនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចកិត្តិព្រឹទ្ឋបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាល សម្តេចតែងតែគិតគូរពីសុខទុក្ខបងប្អូនប្រជាពលរដ្ឋក្រីក្រគ្រប់មជ្ឈដ្ឋាន ដែលមានទុក្ខលំបាក ដោយមិនប្រកាន់រើសអើងវណ្ណៈ ជាតិសាសន៍ ពណ៌សម្បុរ ឬនិន្នាការនយោបាយឡើយ ។ អំណោយដែលបានផ្តល់ជូនរួមមានអង្ករ៧០គីឡូក្រាម មី៣កេស ត្រីខ៣០កំប៉ុង ប្រេងឆា៣ដប ទឹកដោះគោ៣កំប៉ុង ទឹកត្រីនិងទឹកស៊ីអ៊ីវ៣យួរ រទេះរុញជនពិការ៣គ្រឿង និងថវិការ២០០.០០០រៀល។
ម្តាយរបស់កុមារទាំង៣នាក់មានក្តីរំភើបឥតឧបមាដោយបានសំដែងនូវការដឹងគុណចំពោះអស់លោកសប្បុរសជនទាំងអស់ដែលបានផ្តល់ថវិកាដល់រូបគាត់ដើម្បីទ្រទ្រង់ជីវភាពប្រចាំថ្ងៃ ។ លើសពីនេះផងដែរ ម្តាយកុមារទាំង៣នាក់ក៏សូមថ្លែងអំណរគុណចំពោះសម្តេចកិត្តិព្រឹទ្ឋបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលសម្តេចបានចាត់ឱ្យក្រុមការងារអនុសាខាកាកបាទក្រហមស្រុកយករទេះរុញជនពិការចំនួន៣គ្រឿង និងថវិកាមកផ្តល់ដល់អ្នកស្រី និងកូនៗ ជាពិសេសក៏សូមបួងសួងដល់វត្ថុស័ក្តិសិទ្ឋិ និងទេវតាដែលមានបារមីសូមជួយតាមថែរក្សាសម្តេច និងបុត្រាបុត្រីជួបតែសេចក្តីសុខជានិច្ចនិរន្ត។
បន្ទាប់ពីជួប និងផ្តល់ថវិការបស់សប្បុរសជនដល់ម្តាយ និងកុមារទាំង៣នាក់រួចមក ក្រុមការងារកោះសន្តិភាពប្រចាំខេត្តបាននាំកុមារទាំង៣នាក់ និងម្តាយរបស់គេមកកាន់មជ្ឈមណ្ឌលស្តារលទ្ឋភាពពលកម្មកាយសម្បទារខេត្តកំពង់ស្ពឺដើម្បីអោយគ្រូពេទ្យដែលមានជំនាញព្យាបាលដោយចលនាបានព្យាបាលដល់រូបគេ។
លោកគ្រូពេទ្យយឹម ពិសិដ្ឋ ជំនាញឯកទេសព្យាបាលដោយចលនាបានអោយដឹងថា កុមារទាំង៣នាក់នេះប៉ះពាល់បញ្ហាខួរក្បាល ហើយការព្យាបាលនេះគឺព្យាលបាលដោយចលនាមិនប្រើថ្នាំពេទ្យទេ បើទុកបណ្តែតបណ្តោយតទៅទៀតកុមារទាំង៣នឹងមានបញ្ហាធ្ងន់ធ្ងរកាន់តែខ្លាំង សំណាងហើយដែលក្រុមអ្នកព័ត៌មាននាំក្មេងទាំង៣មករកសេវាព្យាបាលបានទាន់ពេល ចំពោះការព្យាបាលប្រើរយៈពេល២ទៅ៤សប្តាហ៍ទើបដឹងលទ្ឋផល ៕
ចែករំលែកព័តមាននេះ