រាជធានីភ្នំពេញ ៖ គ្រោះថ្នាក់ចរាចរណ៍២ករណីក្នុងពេលតែមួយផ្តើមឡើងដោយរថយន្តសណ្តោងដែលគេសង្ស័យថា អ្នកបើកបរស្រវឹងស្រាបានបើករេចង្កូតឡើងលើសួនច្បារពុះចែកជ្រុលទៅបុករះបង្គោលភ្លើងបំភ្លឺ បណ្តាលឱ្យបាក់អស់២ដើមតែមិនមានគ្រោះថ្នាក់ដល់មនុស្សនោះទេ ភ្លាមនោះដែរករណីនេះមិនទាន់ដោះស្រាយចប់ផងក៏ស្រាប់តែរថយន្តកុងតឺន័រ២គ្រឿងទៀតបានបើកប្រដេញគ្នាក្នុងទិសដៅបញ្ច្រាសទិសគ្នាបានទៅបុកគូទគ្នាពីក្រោយពេញទំហឹងបណ្តាលឱ្យមានអ្នករងរបួសម្នាក់នៅកន្លែងតែមួយ ។ ហេតុការណ៍នេះបានកើតឡើងនៅវេលាម៉ោង២និង៣០នាទី រំលងអធ្រាត្រឈានចូលថ្ងៃទី៩ ខែឧសភា ឆ្នាំ២០១៨ ផ្លូវជាតិលេខ១ ភូមិបឹងឈូក សង្កាត់និរោធន៍ ខណ្ឌច្បារអំពៅ ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេបានឃើញរថយន្តសណ្តោងមួយគ្រឿង ពណ៌ក្រហម បានធ្វើដំណើរតាមផ្លូវជាតិលេខ១ ក្នុងទិសដៅពីលិចទៅកើតក្នុងល្បឿនលឿន ខណៈមកដល់ចំណុចកើតហេតុគេសង្ស័យថា អ្នកបើកបរស្រវឹងស្រាទើបបណ្ដាលឱ្យរថយន្តរេចង្កូតឡើងលើសួនច្បារពុះចែកផ្លូវបុករះបង្គោលភ្លើងបំភ្លឺផ្លូវបណ្តាលឱ្យបានបាក់ខ្ទាតរប៉ាត់រប៉ាយពាសពេញផ្លូវ អស់ចំនួន២ដើម និងធ្វើឱ្យសួនច្បាររងការខូចខាតអស់មួយចំនួនផងដែរ ចំណែករថយន្តវិញរងការខូចខាតខ្ទេចផ្នែកខាងមុខយ៉ាងដំណំ ហើយភ្លាមៗនោះដែរគេបានឃើញបុរសចំនួន៤នាក់បានចុះពីលើរថយន្តនាំគ្នារត់គេចបាត់ស្រមោលអស់ ។
ប្រភពដដែលបានបន្តទៀតថា បន្ទាប់ពីករណីរថយន្តបុកបង្គោលភ្លើងមិនទាន់បាន១៥នាទីផងក៏ស្រាប់តែមានរថយន្តកុងតឺន័រចំនួន២គ្រឿងបានបើកប្រដេញគ្នាតាមបណ្តោយផ្លូវជាតិលេខ១ក្នុងទិសដៅពីកើតទៅលិចក្នុងល្បឿនលឿនលុះមកដល់ចំណុចកើតហេតុស្រាប់តែរថយន្តកុងតឺន័រដែលបើកនៅខាងមុខបានជាន់ហ្វ្រាំងឈប់ទាំងបង្ខំ ព្រោះខ្លាចកិនបង្គោលភ្លើងដែលខ្ទាតរប៉ាត់រប៉ាយមកលើផ្លូវស្រាប់ទើបធ្វើឱ្យរថយន្តកុងតឺន័រមួយគ្រឿងទៀតដែលមានផ្លាកលេខ ភ្នំពេញ ៣C-៩១៦៩ ដែលបានបើកមកក្នុងទិសដៅស្របគ្នាជ្រុលទៅបុកនឹងរថយន្តកុងតឺន័រដែលឈប់នៅខាងមុខចំពីក្រោយពេញទំហឹងបណ្តោយឱ្យបុរសជាអ្នកបើករថយន្តរងរបួសជើងខាងឆ្វេងធ្ងន់គៀបនឹងការប៊ីនរថយន្តហើយពេលនោះដែរ ជនរងគ្រោះត្រូវបងប្អូនប្រជាពលរដ្ឋ និងសមត្ថកិច្ចមូលដ្ឋានជួយទាញ់ចេញពីរថយន្តរួចហើយក៍៏បានហៅរថយន្តសង្គ្រោះឱ្យមកដឹកជនរងគ្រោះយកទៅសង្គ្រោះនៅ គ្លិនិកឯកជន ។ ចំណែករថយន្តរងការខូចខាតខ្ទេចផ្នែកខាងមុខយ៉ាងដំណំ ។
ក្រោយពេលកើតហេតុសមត្ថកិច្ចជំនាញខណ្ឌបានចុះទៅកន្លែងកើតហេតុ រួចហើយក៏បានទំនាក់ទំនងទៅខាងជំនាញចរាចរណ៍ក្រុងឱ្យមកស្ទូចយករថយន្តទាំងពីរគ្រឿងទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញដើម្បីរងចាំធ្វើការដោះស្រាយ ៕
ចែករំលែកព័តមាននេះ