ខេត្តរតនគីរី ៖ លោក ហ៊ុន ម៉ាណែត ថ្លែងប្រាប់លោកគ្រូ អ្នកគ្រូខេត្តរតនគីរីអំពីការអភិវឌ្ឍន៍សេដ្ឋកិច្ចនៅកម្ពុជាថ្លែងនៅក្នុងពិធីជួបសំណេះសំណាលជាមួយលោកគ្រូ អ្នកគ្រូ ខេត្តរតនគីរី កាលពីថ្ងៃទី៧…
ខេត្តរតនគីរី ៖ លោក ហ៊ុន ម៉ាណែត ថ្លែងប្រាប់លោកគ្រូ អ្នកគ្រូខេត្តរតនគីរីអំពីការអភិវឌ្ឍន៍សេដ្ឋកិច្ចនៅកម្ពុជាថ្លែងនៅក្នុងពិធីជួបសំណេះសំណាលជាមួយលោកគ្រូ អ្នកគ្រូ ខេត្តរតនគីរី កាលពីថ្ងៃទី៧ ខែឧសភា ឆ្នាំ២០១៨នេះ លោក ហ៊ុន ម៉ាណែត កូនប្រុសច្បងសម្តេច ហ៊ុន សែន បានអះអាងអំពីការអភិវឌ្ឍន៍សេដ្ឋកិច្ចនៅកម្ពុជា ខណៈដែលធនាគារពិភពលោក បានចាត់ទុកកម្ពុជាជាកូនខ្លាអាស៊ី ។
លោក ហ៊ុន ម៉ាណែត ក៏បានថ្លែងរិះគន់ផងដែរចំពោះអ្នកនយោបាយខ្មែរមួយចំនួនដែលមិនទទួលស្គាល់ការពិត ហើយបានបន្តុះបង្អាប់ខ្មែរនៅលើឆាកអន្តរជាតិ ។ លោកថា បើខ្មែរគ្នា ឯងមិនលើកតម្លៃខ្មែរ និងមិនមានមោទនភាពជាតិខ្មែរ តើឲ្យអ្នកណាមកលើកកម្លៃ និងមោទន ភាពជំនួសខ្មែរនោះ ។
ចំពោះមុខលោកគ្រូ អ្នកគ្រូ រាប់រយនាក់នាឱកាសនោះលោក ហ៊ុន ម៉ាណែតក៏បានថ្លែង អះអាងថា កម្ពុជាប្រហែលជានឹងក្លាយទៅជាប្រទេសកូនខ្លាសេដ្ឋកិច្ចនៅតំបន់អាស៊ីព្រោះថា កន្លងមកធនាគារពិភពលោកបានចាត់ទុកកម្ពុជាជាកូនខ្លារួចមកហើយផងដែរ ។ ទាក់ទងនឹងខេត្តរតនគីរី លោក ហ៊ុន ម៉ាណែត បានលើកឡើងថា ដំបូងឡើយខេត្តរតនគីរីត្រូវបានគេចាត់ទុកថា ជាដុំថ្មមួយដុំតែប៉ុណ្ណោះ ពីព្រោះវាស្ថិតនៅឆ្ងាយពីទីក្រុងពេក តែមកដល់ពេលនេះខេត្តរតនគីរី គឺជាគ្រាប់ពេជ្រដែលបានកៃឆ្នៃបណ្តើរៗហើយ ដោយសារយើងមានសក្តានុពលផ្នែករោងចក្រ កសិកម្មជាច្រើនបានមកបង្កើតនៅទីនេះ បង្កើនការងារ បង្កើតភ្ញៀវទេសចរណ៍ស្របគ្នានឹងសណ្ឋាគារច្រើនបានបើកដំណើរការផងដែរ ។
លោក ហ៊ុន ម៉ាណែត ក៏បានរម្លឹកឡើងវិញ អំពីទុកលំបាករបស់ប្រជាពលរដ្ឋយើង ប្រទេសជាតិយើង រយៈពេល៣០ឆ្នាំចុងក្រោយ ហើយយើងបានតស៊ូយ៉ាងលំបាកក្រោមការដឹកនាំរបស់សម្តេច ហ៊ុន សែន ដោយបានរួមកម្លាំងគ្នាកសាងប្រទេសឡើងវិញរហូតមានការ អភិវឌ្ឍន៍លើគ្រប់វិស័យក្នុងនោះវិស័យអប់រំ គឺជាវិស័យអទិភាពទីមួយ ដែលរាជរដ្ឋាភិបាលកំពុងតែយកចិត្តទុកដាក់លើកកម្ពស់ទាំងការស្តារ និងពង្រីកហេដ្ឋារចនាសម្ព័ន្ធមូលដ្ឋានអប់រំ ក៏ដូចជាការអភិវឌ្ឍ ពង្រឹង សមត្ថភាពស្ថាប័ន សមត្ថភាពធនធានមនុស្សដែលបានឆ្លើយតប ទៅនឹងតម្រូវការផ្នែកអប់រំ យុវជន ដល់លោកគ្រូ អ្នកគ្រូ និស្សិត សិស្ស និងប្រជាពលរដ្ឋទូទាំងប្រទេស ។
លោកក៏បានអំពាវនាវដល់លោកគ្រូ អ្នកគ្រូទាំងអស់បន្តអភិវឌ្ឍចំណេះដឹង និងសមត្ថភាពវិជ្ជាជីវៈ ក្រមសីលធម៍ និងមនសិការ ដើម្បីរួមចំណែកក្នុងការអភិវឌ្ឍសេដ្ឋកិច្ចសង្គម និងរួមចំណែកក្នុងដំណើរការកសាងប្រទេសជាតិយើងឲ្យកាន់តែរីកចម្រើនទៅមុខថែមទៀត ៕
ចែករំលែកព័តមាននេះ