សហរដ្ឋអាមេរិក ៖ តាមប្រភពព័ត៌មាន Metro បានឲ្យដឹងថា កូនកំលោះកូនក្រមុំមួយគូបានចូលរោងការ បើទោះបីជាខាងកូនក្រមុំទើបតែដាច់ដៃដោយសារក្រពើខាំក៏ដោយ។ នេះពិតជាបង្ហាញពីទឹកចិត្តមោះមុតស្រឡាញ់ប្តូរផ្តាច់របស់អ្នកទាំងពីរមែន។
កូនក្រមុំឈ្មោះ Zanele Ndlovu និងកូនកម្លោះ Jamie Fox បានទៅជិះទូកលេងនៅទន្លេ Zambezi នៅមុនថ្ងៃរៀបការមួយថ្ងៃ។ នៅពេលជិះនោះ ស្រាប់តែមានក្រពើមួយក្បាលមកវាយប្រហារលើខាងស្រី ដែលធ្វើឲ្យនាងក្បែរនឹងស្លាប់។ នេះកុំតែបានខាងប្រុសចុះទៅប្រវាយប្រតប់ជាមួយនឹងក្រពើវិញ ទើបបានរស់ជីវិត។
តែជាអកុសល នាងត្រូវពេទ្យបង្ខំចិត្តកាត់ដៃម្ខាងចោល ដើម្បីជួយជីវិតឲ្យរស់បាន។ នេះពិតជាស្តាយខ្លាំងណាស់ ព្រោះថា ត្រូវធ្លាក់ខ្លួនពិការមុនថ្ងៃរៀបការមួយថ្ងៃ។
ទោះបីជាមានឧបសគ្គយ៉ាងនេះក៏ដោយ ក៏ពួកគេទាំងពីរនាក់មកចូលរោងការតាមការកំណត់ដែរ។ ទង្វើបែបនេះធ្វើឲ្យមហាជនមិនសរសើរមិនបាន។ មហាជនជឿជាក់ថា នេះមកពីពួកគេទាំងពីរនាក់ស្រឡាញ់គ្នាដោយស្មោះមិនគិតពីរាងកាយខាងក្រៅ៕
ចែករំលែកព័តមាននេះ