រាជធានីភ្នំពេញ ៖ នៅឆ្នាំនេះ ពិព័រណ៍អាហារស្លាបព្រាបានប្រារព្ធធ្វើឡើងនៅថ្ងៃទី៥ និង៦ ខែឧសភាកន្លងទៅនេះ នៅផ្សារកុងតឺន័រ 2040 ដែលមានអ្នកចូលរួមប្រមាណ១៤.០០០នាក់ ដែលក្នុងនោះមានទាំងភ្ញៀវជាតិ និងអន្តរជាតិ។
នៅក្នុងពិព័រណ៍នេះមានស្តង់ប្រមាណជា 160 ដែលមានបម្រើម្ហូបអាហារ ភេសជ្ជៈ និងផលិតផលជាច្រើនប្រភេទ ក្នុងនោះរួមមានទាំងអាហារខ្មែរ ថៃ ឥណ្ឌា អ៊ឺរ៉ុប និងជប៉ុនផងដែរ។ ហើយក៏មានសកម្មភាពសប្បាយៗជាច្រើនដែលអ្នកចូលរួមអាចលេងកំសាន្តបាន ដែលសកម្មភាពទាំងនោះរួមមាន ល្បែងប្រពៃណីខ្មែរ ការឆ្លើយសំនួរងាយៗ ដើម្បីទទួលបានរង្វាន់ ការប្រកួតញ៉ាំអាហារ និងការសម្តែងក្បាច់គុនល្បុក្កតោ។ ហើយអ្វីដែលគួរអោយចាប់អារម្មណ៍ជាងគេនោះ គឺការពិភាក្សាតុមូលស្តីពីវិស័យម្ហូបអាហារនៅកម្ពុជាដែលមានការចូលរួមពីវាគ្មិនចំនួន៤រូប ដែលក្នុងនោះមាន អ្នកស្រី Tauch Soubota មកពីហាង Pelican, លោក Joshua Jones មកពីហាង 3 corner coffees, អ្នកនាង Sambo NOV មកពីហាង Thailas និង លោក Jo Jo មកពីក្រុមហ៊ុន Wing។
សុន្ទរកថារបស់លោក ជី
លោក ជី ដែលជានាយកក្រុមហ៊ុន The Idea និងជា អ្នកដឹកនាំក្រុមសមាគមន៍អ្នកស្ម័គ្រចិត្តដែលអ្នកទាំងអស់គ្នាបានឃើញស្រាប់នៅក្នុងឯកសណ្ឋានពណ៌ទឹកក្រូច។ គោលបំណងក្នុងការបង្កើតកម្មវិធីនេះឡើង គឺដើម្បីបង្កើនភាពសប្បាយរីករាយសម្រាប់អ្នកចូលរួមទាំងអស់គ្នា ព្រមទាំងផ្សព្វផ្សាយពីការគ្រប់គ្រងកាកសំណល់។ ហើយលោកក៏បានថ្លែងអំណរគុណយ៉ាងជ្រាវជ្រៅចំពោះ Wing, Cellcard, Nagaworld, Pensonic, Guardian Pharmacy និង The Art Bar ដែលជាអ្នកឧបត្ថម្ភធំក្នុងពិព័រណ៍អាហារស្លាបព្រានេះ។ ជាចុងបញ្ចប់លោកក៏បានថ្លែងអំណរគុណចំពោះអ្នកដែលបានអញ្ជើញចូលរួមក្នុងពិព័រណ៍អាហារស្លាបព្រា ២០១៨ និងក្រុមអ្នកស្ម័គ្រចិត្តទាំងអស់ដែលបានធ្វើអោយកម្មវិធីនេះប្រព្រឹត្តទៅបានយ៉ាងរលូន។
សុន្ទរកថារបស់ឯកឧត្ដម សូ វិសុទ្ធី អនុរដ្ឋលេខាធិការក្រសួងទេសចរណ៍
ជាបឋម ខ្ញុំសូមគោរពដល់ប្រធានក្រុមហ៊ុន The Idea គឺ លោក G ដែលបានបង្កើតកម្មវិធីនេះឡើងដែលទាក់ទងនឹង ការដាក់បង្ហាញអាហារ រួមជាមួយនឹងការគ្រប់គ្រងកាក់សំណល់ដែលបានបរិភោគរួច។ ដែលនេះគឺជាកម្មវិធីមួយដ៏ប្រសើរដែលបានលើកតម្កើងនូវអាហារជាតិ ហើយវាក៏បានជួយជាចំណូលថវិការជាតិលើវិស័យទេសចរណ៍ផងដែរ។ ហើយតាងនាមឲ្យក្រសួងទេសចរណ៍ និងរដ្ឋមន្ត្រីបណ្ឌិត ថោង ខុន។ ក៏សូមថ្លែងអំណរគុណយ៉ាងជ្រាលជ្រៅដល់ក្រុមហ៊ុន Wing, Cellcard, Nagaworld, Pensonic, Guardian Pharmacy និង The Art Bar ដែលបានឧបត្ថម្ភក្នុងកម្មវិធីនេះ។
មួយវិញទៀត កម្មវិធីនេះក៏បានអនុឡោមទៅតាមគោលការណ៍ ទីក្រុងស្អាត រមណីយដ្ឋានស្អាត សេវាល្អ នេះក៏ព្រោះតែមានការដឹកនាំដ៏វៃឆ្លាតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ហើយវាក៏ជាឱកាសមួយសម្រាប់អ្នកស្ម័គ្រចិត្តគ្រប់រូបចូលរួមជួយសង្គមរបស់យើងផងដែរ៕
ចែករំលែកព័តមាននេះ