ប្រទេសចិន ៖ សារព័ត៌មានផ្លូវការចិនរាយការណ៍កាលពីថ្ងៃទី៨ ឧសភាថា អតីតប្រមុខបក្សកុំមុយនីស្តចិន ក្រុងចុងគិញ ជាទីក្រុងធំមួយនាភាគនីរតីចិន ត្រូវកាត់ទោសដាក់គុកមួយជីវិត ពីបទពុករលួយ។
លោក SUN ZHENGCAI អាយុ៥៤ឆ្នាំ ជាមន្ត្រីជាន់ខ្ពស់ចិនចុងក្រោយ គេរងទោសទណ្ឌក្នុងសង្គ្រាមប្រឆាំងអំពើពុករលួយរបស់ប្រធានាធិបតីលោកស៊ីជីនពីង ។ លោកបានសារភាពកាលពីខែមេសា នៅមុខតុលាការមួយនៃទីក្រុង TIANJIN ថា លោកបានទទួលសំណូកមានទឹកប្រាក់លើសពី១៧០លានយន់ ប្រមាណជា២០លានអឺរ៉ូ។ តំណែងរបស់លោកត្រូវប្ដូរទៅឲ្យ លោក CHEN MINER ជាមនុស្សជំនិតម្នាក់របស់លោកស៊ីជីនពីង។
មុនពេលដកហូតតំណែងលោក ភ្លាមៗកាលពីខែកក្កដា ២០១៧ លោក SUN ZHENGCAI ដែលជាសមាជិកវ័យក្មេងម្នាក់ ក្នុងចំណោមសមាជិកវ័យក្មេង២៥រូបនៃការិយាល័យនយោបាយមជ្ឈឹមបក្សកុំមុយនីស្តចិន ធ្លាប់ត្រូវគេចាត់ទុកជាមនុស្សម្នាក់ដែល អាចឈរឈ្មោះជាបេក្ខជននៃជនលេខមួយចិន។
ប្រធានាធិបតីចិនលោកស៊ីជីនពីង បានបើកធ្វើយុទ្ធនាការធំមួយតស៊ូប្រឆាំងអំពើ ពុករលួយចាប់តាំងពីលោកឡើងកាន់អំណាច ពីឆ្នាំ២០១២មក ដោយសន្យាផ្ដោតទាំងទៅលើពួកខ្លា ជាពួកអ្នកធំទាំងទៅលើពួករុយ ជាមន្ត្រីថ្នាក់ទាប។ មនុស្សជាច្រើនពាន់នាក់ ទទួលការកាត់ទោសរួចហើយ ជាពិសេសក្នុងជួរកងទ័ព និងជួរបក្សកុំមុយនីស្តចិន៕
ចែករំលែកព័តមាននេះ