រាជធានីភ្នំពេញ ៖ ក្នុងរយៈពេល៧នៃការចុះឈ្មោះបោះឆ្នោតជ្រើសតាំងអ្នកតំណាងរាស្ត្រអាណត្តិទី៦ គណៈកម្មាធិការជាតិរៀបចំការបោះឆ្នោតបានចុះឈ្មោះបញ្ជីបេក្ខជនគណបក្សនយោបាយចំនួន៣ និងទទួលគណបក្សនយោបាយចំនួន៩បានមកទទួលយកទម្រង់១០០៨ ដើម្បីបំពេញបែបបទ ។
យោងតាមសេចក្តីប្រកាសព័ត៌មានរបស់ គ.ជ.ប ដែលចេញផ្សាយកាលពីថ្ងៃទី៧ ខែឧសភា ឆ្នាំ២០១៨បានឲ្យដឹងថា បន្ទាប់ពីពិនិត្យពាក្យសុំចុះបញ្ជីគណបក្សនយោបាយឈរឈ្មោះបោះឆ្នោត ក្នុងរយៈពេល៧ថ្ងៃ ស្របតាមបទបញ្ជា និងនីតិវិធីសម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៦ គ.ជ.ប បានសម្រេចទទួលស្គាល់ជាផ្លូវការ ការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះបោះឆ្នោតរបស់គណបក្សនយោបាយចំនួន៣គឺ ទី១- គណបក្សប្រជាជនកម្ពុជាបានដាក់បេក្ខជនឈរឈ្មោះនៅ២៥ មណ្ឌលរាជធានីខេត្ត ។ ទី២-គណបក្សយុវជនកម្ពុជាបានដាក់បេក្ខជនឈរឈ្មោះនៅ១៧ មណ្ឌលរាជធានីខេត្ត ។ និងទី៣ – គណបក្សសញ្ជាតិកម្ពុជា បេក្ខជនឈរឈ្មោះនៅ២៥ មណ្ឌលរាជធានីខេត្ត ។
អ្នកនាំពាក្យ គ.ជ.ប លោកឌឺម សុវណ្ណារុំ បានឲ្យដឹងនៅថ្ងៃទី៨ ខែឧសភាថា កាលព្រឹកថ្ងៃទី៧ ឧសភាកន្លងមក គណបក្សប្រជាធិបតេយ្យមូលដ្ឋានបានមកសុំពាក្យបង់ប្រាក់តម្កល់ចំនួន១៥លានរៀល នៅរតនាគារជាតិ ។ គណបក្សសាធារណរដ្ឋប្រជាធិបតេយ្យមកជម្រាប គ.ជ.ប ថា គណបក្សរបស់ខ្លួនបានតម្កល់ប្រាក់នៅរតនាគារជាតិរួចរាល់ហើយ ។
គណបក្សនយោបាយចំនួន៧ផ្សេងទៀតក៏បានបំពេញបែបបទតម្កល់ប្រាក់នៅរតនាគារជាតិផងដែររួមមាន ៖ គណបក្សខ្មែរអភិវឌ្ឍន៍សេដ្ឋកិច្ច, គណបក្សសម្ព័ន្ធ ដើម្បីប្រជាធិបតេយ្យ ,គណបក្សខ្មែរឈប់ក្រ , គណបក្សហ្វ៊ុនស៊ិនប៉ិច , គណបក្សធម្មាធិបតេយ្យ , គណបក្សពន្លឺថ្មី , គណបក្សសំបុកឃ្មុំសង្គមប្រជាធិបតេយ្យ ។
អ្នកនាំពាក្យក៏បានឲ្យដឹងថា គណបក្សនយោបាយដែលមកទទួលពាក្យសុំចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរទម្រង់១០០៨ ពីមានចំនួន៩រួមមាន ៖ គណបក្សចលនាប្រជាធិបតេយ្យ , គណបក្សអំណាចខ្មែរ , គណបក្សជនជាតិដើមប្រជាធិបតេយ្យ , គណបក្សប្រជាធិបតេយ្យថ្មី ,គណបក្សរស្មីខេមរា ,គណបក្សកសិករ ,គណបក្សឆន្ទៈខ្មែរ , គណបក្សខ្មែរសាធារណរដ្ឋ និងគណបក្សខ្មែរក្រោក ។
លោកបញ្ជាក់ថា មកដល់ម៉ោងប្រមាណ១១ព្រឹកថ្ងៃទី៨ ឧសភានេះ មានអ្វីដែលថ្មី គឺគណបក្សខ្មែរក្រោកបានមកយកពាក្យសុំចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះបោះឆ្នោត ។
បើតាមសេចក្តីប្រកាសព័ត៌មាន គ.ជ.ប ក៏បានឲ្យដឹងថា កាលពីរសៀលថ្ងៃទី៧ ខែឧសភាកន្លងមកនេះ គណបក្សខ្មែររួបរួមជាតិបានដាក់ពាក្យសុំចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជូនបេក្ខជនឈរឈ្មោះបោះឆ្នោតនៅគ.ជ.ប ។
បើតាមប្រភពដដែលបានឲ្យដឹងថា គ.ជ.ប បាន និងកំពុងបំពេញបែបបទជាមួយគណបក្សនយោបាយសរុបចំនួន២១ ។
បើតាមមន្ត្រីជាន់ខ្ពស់ គ.ជ.ប ធ្លាប់បានឲ្យដឹងថា ការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦នេះ នឹងមានប្រជាពលរដ្ឋអញ្ជើញទៅបោះឆ្នោតលើសពី៥០% ព្រោះថា បើតាមបច្ចេកទេស ពិសេសនោះការបោះឆ្នោតជ្រើសរើមេឃុំ ចៅសង្កាត់ឆ្នាំ២០១៧កន្លងមក អ្នកបោះឆ្នោតគាំទ្រគណបក្សប្រជាជនកម្ពុជាមានជាង៥០% និងគណបក្សនយោបាយផ្សេងៗទៀត ។
មន្ត្រីដដែលក៏បានអះអាងថា ទោះបីជាចំនួនអ្នកបោះឆ្នោតមានចំនួនតិច ឬច្រើនក្តី គ.ជ.ប នៅតែប្រកាសលទ្ធផលផ្លូវការជាធម្មតាដដែល ៕
ចែករំលែកព័តមាននេះ