រាជធានីភ្នំពេញ ៖ ស្ត្រីវ័យក្មេងម្នាក់ដែលឈឺចាប់ក្នុងចិត្ត ព្រោះតែប្តីលួចមានស្រី បានស្ពាយបង្វេចឡើងមកលើស្ពានព្រះមុនីវង្សថ្មី ក្នុងសង្កាត់ច្បារអំពៅទី១ ខណ្ឌច្បារអំពៅ ប៉ុនប៉ងលោតទឹកសម្លាប់ខ្លួន បង្កឱ្យមានការភ្ញាក់ផ្អើលឡើង កាលពីវេលាម៉ោង១២ និង៣០នាទីរំលងអធ្រាត្រ ឈានចូលថ្ងៃទី៧ ឧសភា ។
ទោះជាយ៉ាងណា ស្ត្រីរូបនេះមិនត្រូវបានគេស្គាល់អត្តសញ្ញាណទេ ហើយបើតាមប្រភពពីអ្នកឃើញហេតុការណ៍និយាយថា ពេលពួកគាត់់ធ្វើដំណើរឆ្លងកាត់ទីនោះ ក៏ប្រទះឃើញនាងឈរនៅកណ្តាលស្ពានតែម្នាក់ឯង ដោយមានយួរថង់ខោអាវមួយផង ។ ដោយមានការសង្ស័យ ពួកគាត់ក៏ឈប់ម៉ូតូចាំមើល ស្រាប់តែឃើញនាងបម្រុងឡើងលើបង្កាន់ដៃស្ពានលោតចុះទៅក្នុងទឹក ទើបប្រញាប់ជួយឃាត់និងនិយាយលួងលោមអង្វរដោយពាក្យសម្តីល្អៗឱ្យនាងគិតសាជាថ្មី ហើយក៏រាយការណ៍ទៅសមត្ថកិច្ចមកជួយអន្តរាគមន៍ផងដែរ ។
ប្រភពដដែលនិយាយទៀតថា បន្ទាប់មកបានព្យាយាមសុំលេខទូរស័ព្ទរបស់សាច់ញាតិ ហើយនាងក៏បានប្រាប់លេខទូរស័ព្ទប្តី ប៉ុន្តែពេលទូរស័ព្ទប្រាប់ បែរជាប្តីនិយាយថា មិនខ្វល់ទេ ហើយថែមទាំងនិយាយទៀតថា «បើវាចង់ស្លាប់ឲ្យវាលោតទៅ» មានផ្ទះឲ្យនៅមិនចង់នៅ អុីចឹងវាចង់ទៅណាក៏ទៅៗ និយាយចប់ក៏បិទទូរស័ព្ទភ្លាម ។ បើតាមនារីរូបនេះបានបង្ហើបឲ្យដឹងថា មូលហេតុដែលនាងចង់សម្លាប់ខ្លួនបែបនេះនេះ គឺ ដោយសារតែតូចចិត្តនឹងប្តីលែងយល់ចិត្ត ហើយលួចមានស្រីខាងក្រៅ មិនដែលយល់ពីអារម្មណ៍នាងជាប្រពន្ធឡើយ គិតតែខ្លួនឯង ទើបនាងសម្រេចចិត្តចង់បញ្ចប់ជីវិតកុំឲ្យនៅឈឺចាប់ដោយសារតែប្តីបែបនេះទៀត ។ ទោះជាយ៉ាងណា គ្មានអ្នកណាម្នាក់អាចបញ្ជាក់ឲ្យច្បាស់បានថា គ្រួសារស្ត្រីរូបនេះមានជម្លោះនឹងគ្នា ដោយសារបញ្ហាអ្វីឱ្យប្រាកដឡើយ ព្រោះអ្នកទាំង២និយាយចោទប្រកាន់គ្នាទៅវិញទៅមក ។
ក្រោយពីសមត្ថកិច្ចមូលដ្ឋានចុះទៅដល់ហើយអ្នកឃើញហេតុកាណ៍ជួយឃាត់និយាយលួងលោមដោយពាក្យសម្តីល្អៗ ស្ត្រីរូបនេះក៏យល់ព្រមមិនលោតទឹកទេ ថែមទាំងនិយាយអរគុណអ្នកដែលបានជួយឃាត់នាងទាំងទឹកភ្នែកទៀតផង ។ បន្ទាប់មក សមត្ថកិច្ចនិងប្រជាពលរដ្ឋក៏បានជួយជូនស្ត្រីរូបនេះត្រឡប់ទៅដល់បន្ទប់ជួលរបស់នាងវិញនៅឯសង្កាត់ព្រែកប្រា ខណ្ឌច្បារអំពៅ ៕
ចែករំលែកព័តមាននេះ