រាជធានីភ្នំពេញ ៖ មន្ត្រីជាន់ខ្ពស់នៃរដ្ឋាភិបាលកម្ពុជា និងរដ្ឋបាលតំបន់ម៉ាកាវ កាលពីថ្ងៃទី០៨ ខែឧសភា ឆ្នាំ២០១៨ បានចុះហត្ថលេខាលើអនុស្សរណលើកិច្ចព្រមព្រៀងទ្វេភាគីលើវិស័យសេដ្ឋកិច្ច វប្បធម៌ ទេសចរណ៍…
រាជធានីភ្នំពេញ ៖ មន្ត្រីជាន់ខ្ពស់នៃរដ្ឋាភិបាលកម្ពុជា និងរដ្ឋបាលតំបន់ម៉ាកាវ កាលពីថ្ងៃទី០៨ ខែឧសភា ឆ្នាំ២០១៨ បានចុះហត្ថលេខាលើអនុស្សរណលើកិច្ចព្រមព្រៀងទ្វេភាគីលើវិស័យសេដ្ឋកិច្ច វប្បធម៌ ទេសចរណ៍ ធនធានមនុស្សអប់រំ ។
បន្ទាប់ពីជំនួបទ្វេភាគីរយៈពេលជិត១ម៉ោងភាគីទាំងពីរបានចុះហត្ថលេខាលើលិខិតរួមគ្នានៅចំពោះមុខក្រុមមន្ត្រី និងអ្នកសារព័ត៌មាន ។ នេះបើតាមលោកស្រី អ៊ាន សោភា អនុរដ្ឋលេខាធិការក្រសួងការបរទេសថ្លែងនៅរសៀលថ្ងៃទី៧ ឧសភានេះ បន្ទាប់ពីជំនួបរវាងលោកទេសរដ្ឋមន្ត្រីប្រាក់ សុខុន និងលោក Chui Sai On ប្រធានប្រតិបត្តិនៃតំបន់រដ្ឋបាលពិសេសម៉ាកាវ សាធារណរដ្ឋប្រជាមានិត ចិនសម្តែងការគួរសម និងចុះហត្ថលេខា នៅទីស្តីការក្រសួង ។
លោកទេសរដ្ឋមន្ត្រីប្រាក់ សុខុនបានថ្លែងថា ដំណើរទស្សនកិច្ចរបស់ប្រតិភូតំបន់ម៉ាកាវធ្វើឡើងចំពេលដែលប្រទេសកម្ពុជា និងចិនកំពុងប្រារព្ធខួប៦០ឆ្នាំ នៃទំនាក់ទំនងការទូតនៃប្រទេសទាំងពីរ ។ លោកបានសំដែងការស្វាគមន៍ចំពោះប្រតិភូក្រុងម៉ាកាវដែលបានចូលជួបសំដែងការគួរសម ដើម្បីពិភាក្សាការងារ និងចុះហត្ថលេខាលើកកិច្ចសហការទ្វេភាគី ។
លោកស្រីអ៊ាន សោភា បានបញ្ជាក់ថា ក្នុងជំនួបនោះភាគីទាំងពីរបានរំលឹកពីកិច្ចសហប្រតិបត្តិការរវាងកម្ពុជា-ចិនខួបទី៦០ឆ្នាំ នៃទំនាក់ទំនងការទូត និងខួប១៥ឆ្នាំជាដៃគួរយុទ្ធសាស្ត្រគ្រប់ជ្រុងជ្រោយរវាងកម្ពុជា និងចិន ។ លោកស្រីអះអាងថា ថ្នាក់ដឹកនាំទាំងពីលើកឡើងដោយឯកភាពថា ទស្សនកិច្ចនេះនឹងបង្កើនមិត្តភាពរវាងប្រជាជនចិន និងកម្ពុជាក៏ដូចប្រជាជនកម្ពុជា និងម៉ាកាវ ។
ក្រោយពីកិច្ចពិភាក្សាការងារមានការចុះហត្ថលេខាលើអនុស្សរណរវាងក្រសួងការបរទេស និងតំបន់រដ្ឋបាល ពិសេសស្តីពីការជំរុញកិច្ចសហប្រតិបត្តិការរវាងម៉ាកាវ និងកម្ពុជា ដើម្បីលើកកម្ពស់ទំនាក់ទំនងពាណិជ្ជកម្ម វិស័យទេសចរណ៍ ធនធានមនុស្ស វប្បធម៌ និងយុវជន និងយុវជន” ៕
ចែករំលែកព័តមាននេះ