រាជធានីភ្នំពេញ ៖ សាកសពស្ត្រីជាជនអនាថាម្នាក់ ត្រូវបានអ្នកស្រុកប្រទះឃើញ ដេកស្លាប់យ៉ាងអាណោចអាធ័ម បានរាយការណ៍ជូននគរបាលឲ្យចុះទៅពិនិត្យមើលភ្លាមៗ ហើយនគរបាលបានសន្និដ្ឋានថា ជនរងគ្រោះខាងលើស្លាប់ដោយសារជំងឺខ្យល់គ រួចបាននាំយកសាកសពទៅតម្កល់ទុកនៅឈាបនដ្ឋានវត្តឫស្សីសាញ់ រង់ចាំការស្រាវជ្រាវក្រែង…
រាជធានីភ្នំពេញ ៖ សាកសពស្ត្រីជាជនអនាថាម្នាក់ ត្រូវបានអ្នកស្រុកប្រទះឃើញ ដេកស្លាប់យ៉ាងអាណោចអាធ័ម បានរាយការណ៍ជូននគរបាលឲ្យចុះទៅពិនិត្យមើលភ្លាមៗ ហើយនគរបាលបានសន្និដ្ឋានថា ជនរងគ្រោះខាងលើស្លាប់ដោយសារជំងឺខ្យល់គ រួចបាននាំយកសាកសពទៅតម្កល់ទុកនៅឈាបនដ្ឋានវត្តឫស្សីសាញ់ រង់ចាំការស្រាវជ្រាវក្រែង រកឃើញសាច់ញាតិរបស់គាត់។ ស្ត្រីអនាថាខាងលើមានអាយុប្រហែលជាង៤០ឆ្នាំ ត្រូវបានគេប្រទះឃើញកាលពីវេលាម៉ោង៤ និង៤០នាទីល្ងាច ថ្ងៃទី៧ ខែឧសភា ឆ្នាំ២០១៨ ស្ថិតនៅក្នុងដីឡូត៍មួយកន្លែងនៅតាមបណ្ដោយផ្លូវបេតុង ភូមិថ្មី សង្កាត់ដង្កោ ខណ្ឌដង្កោ។
ប្រជាពលរដ្ឋបាននិយាយថា ស្ត្រីអនាថាខាងលើមិនត្រូវបានស្គាល់ឈ្មោះនោះទេ ហើយកន្លងមកពួកគាត់តែងបានឃើញស្ត្រីរូបនោះដើរទៅមក និងស្នាក់នៅតាមសំយ៉ាបផ្ទះគេ ស្ថិតនៅម្ដុំកន្លែងកើតហេតុរាល់ថ្ងៃ មិនតែប៉ុណ្ណោះពួកគាត់ក៏ធ្លាប់ឲ្យបាយទឹកនំចំណីហូបខ្លះៗដែរ។ ដោយឡែកនៅថ្ងៃកើតហេតុមិនមាននរណាម្នាក់បានដឹងថាគាត់ស្លាប់បែបណាឡើយ ព្រោះអត់ដែលបានឃើញគាត់ឈឺពីមុនមកផង ហើយស្រាប់តែប្រទះឃើញគាត់ស្លាប់បាត់ទៅហើយ ទើបរាយការណ៍ប្រាប់សមត្ថកិច្ចនគរបាល និងអាជ្ញាធរសង្កាត់ និងខណ្ឌចុះទៅពិនិត្យមើលជាក់ស្តែង។
នគរបាលបានឲ្យដឹងថា ក្រោយពីការពិនិត្យនៅលើសពស្ត្រីរងគ្រោះខាងលើ មិនឃើញមានស្លាកស្នាម អ្វីគួរឲ្យសង្ស័យទៅលើអំពើឃាតកម្មនោះឡើយ គឺជនរងគ្រោះស្លាប់ដោយសារជំងឺខ្យល់គ។ ពេលនេះសាកសពត្រូវបាននាំយកទៅតម្កល់ទុកនៅឈាបនដ្ឋានវត្តឫស្សីសាញ់ រង់ចាំស្រាវជ្រាវរកសាច់ញាតិនាំយកសពទៅធ្វើបុណ្យតាមប្រពៃណី ប៉ុន្តែពុំដឹងថា គាត់នៅមានសាច់ញាតិខ្លះដែរឬអត់នោះឡើយ ៕
https://youtu.be/dhMPw5mKWw4
ចែករំលែកព័តមាននេះ