រាជធានីភ្នំពេញ៖ មន្ត្រីជំនាញសាធារណការ និងដឹកជញ្ជូនរាជធានីភ្នំពេញបានអះអាងថា ក្រោយពីសម្ពោធដាក់ឲ្យប្រើប្រាស់ជាផ្លូវការ ស្ពានដែកបេឡេឫស្សីកែវឆ្លងកាត់ទន្លេសាប អាជ្ញាធរមិនអនុញ្ញាតឲ្យរថយន្តក្រុង រថយន្តដឹកលើសពី៥តោន និងអ្នកថ្មើជើងឆ្លងកាត់ស្ពាននោះទេ ។
លោក សាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញ បានឲ្យកោះសន្តិភាពដឹងកាលពីព្រឹកថ្ងៃទី៧ ឧសភា ២០១៨នេះថា ស្ពានដែកបេឡេឫស្សីកែវឆ្លងកាត់ទន្លេសាបបានសាងសង់រួចរាល់កាលពីថ្ងៃទី៥ ឧសភាកន្លងមកនេះ និងគ្រោងសម្ពោធដាក់ឲ្យដំណើរការនៅរសៀលថ្ងៃទី៨ ឧសភា ស្ថិតក្រោមអធិបតីភាពលោក ឃួង ស្រេង អភិបាលរាជធានីភ្នំពេញ ព្រមទាំងមានការចូលរួមពីមន្ត្រីរាជការក្រោមឱវាទ និងតំណាងក្រសួងសាធារណការ និងដឹកជញ្ជូនផងដែរ ។
មន្ត្រីជំនាញសាធារណការ និងដឹកជញ្ជូនរាជធានីភ្នំពេញ ដែលចូលរួមមើលការខុសត្រូវក្នុងការសាងសង់ស្ពានបេឡេនោះ បានឲ្យដឹងថា ស្ពានដែលបេឡេឬស្សីកែវនេះ ចាប់ផ្តើមសាងសង់នៅថ្ងៃទី២៤ ខែតុលា ឆ្នាំ២០១៧ និងបញ្ចប់នៅថ្ងៃទី៥ ខែឧសភា ឆ្នាំ២០១៨ គឺមានរយៈពេលសាងសង់៦ខែ ១១ថ្ងៃ ដែលសាងសង់ដោយក្រុមហ៊ុន OCIC មានប្រវែងសរុប៦៥៥ម៉ែត្រ ក្នុងនោះ តួស្ពានប្រវែង៥០៥ម៉ែត្រ គល់ស្ពានសងខាងប្រវែង១៥០ម៉ែត្រ ទទឹងស្ពាន១២ម៉ែត្រ ។
មន្ត្រីដដែលបានឲ្យដឹងទៀតថា ស្ពាននេះធ្វើចរាចរទ្វេរទិស សម្រាប់រថយន្ត១គន្លងទៅ ១គន្លងមក និងម៉ូតូ១គន្លងទៅ១គន្លងមក ជម្រាលស្ពាន ៤.៥% ឯលើកណ្តាលទន្លេជម្រាល០% ល្បឿនកំណត់២៥គីឡូម៉ែត្រក្នុង១ម៉ោង កំពស់យានយន្តអនុញ្ញាត្ត មិនលើស២.៨ម៉ែត្រ ហាមរថយន្តក្រុងឆ្លងកាត់ ទម្ងន់យានយន្តអនុញ្ញាត មិនលើសពី៥តោន មិនអនុញ្ញាតឱ្យអ្នកថ្មើរជើងដើរឆ្លងកាត់ស្ពាន៕
ចែករំលែកព័តមាននេះ