រាជធានីភ្នំពេញ ៖ មន្ត្រីក្រសួងការពារជាតិបានបញ្ជាក់កាលពីព្រឹកថ្ងៃទី៧ ខែឧសភា ឆ្នាំ ២០១៨ នេះថា បន្ទាប់ពីបំពេញបេសកកម្មអង្គការសហប្រជាជាតិនៅសាធារណរដ្ឋម៉ាលី អស់រយៈពេល១ឆ្នាំ ដោយជោគជ័យ…
រាជធានីភ្នំពេញ ៖ មន្ត្រីក្រសួងការពារជាតិបានបញ្ជាក់កាលពីព្រឹកថ្ងៃទី៧ ខែឧសភា ឆ្នាំ ២០១៨ នេះថា បន្ទាប់ពីបំពេញបេសកកម្មអង្គការសហប្រជាជាតិនៅសាធារណរដ្ឋម៉ាលី អស់រយៈពេល១ឆ្នាំ ដោយជោគជ័យ កងកម្លាំងរក្សាសន្តិភាពកម្ពុជាបានធ្វើមាតុភូមិនិវត្តន៍ដល់កម្ពុជាវិញ ដោយសុវត្ថិភាព ។
កងកម្លាំងមួកខៀវកម្ពុជាចំនួន២កង មានចំនួនសរុប២២៩នាក់ បានបំពេញបេសកកម្មរក្សាសន្ដិភាពរបស់អង្គការសហប្រជាជាតិនៅសាធារណរដ្ឋម៉ាលីបានមកដល់កម្ពុជាដោយសុវត្ថិភាពវិញហើយ បន្ទាប់ពីកងប្តូរវេនបានទៅដល់ ។ នៅក្នុងពិធីទទួលការវិលត្រឡប់ដោយជោគជ័យបានធ្វើឡើងនៅអធ្រាត្រយប់ថ្ងៃអាទិត្យឈានចូលថ្ងៃទី៧ ខែឧសភា ឆ្នាំ២០១៨ ក្នុងពិធីទទួលកងកម្លាំងរក្សាសន្តិភាពពីសាធារណរដ្ឋម៉ាលី នៅអាកាសយាន្តដ្ឋានអន្តរជាតិភ្នំពេញលោក នាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិរក្សាសន្តិភាពថ្លែងថា ៖ កម្លាំងទ័ពដែលបានមកដល់នេះចំនួន២២៩នាក់ គឺទៅគ្រប់មកគ្រប់ដោយមិនមានបាត់បង់កម្លាំងណាម្នាក់នោះទេ ។
លោកនាយឧត្តមសេនីយ៍លើកឡើងថា ៖ «កម្លាំងមកនេះ គឺមានកងវិស្វកម្មព្រលានយន្ដហោះ និងកងកម្ទេចគ្រាប់មិនទាន់ផ្ទុះ ដែលពួកគាត់បំពេញការងារបេសកកម្មអង្គការសហប្រជាជាតិ សាធារណរដ្ឋម៉ាលី បានដោយជោគជ័យ» ។ កម្លាំងរក្សាសន្តិភាពពេញការងារនៅប្រទេសម៉ាលីនេះ ដើម្បីបុព្វហេតុសន្តិភាព សន្តិសុខ និងមនុស្សធម៌លើពិភពលោក ។ កម្ពុជាបានរួមចំណែកបញ្ជូនកម្លាំងរក្សាសន្តិភាពរបស់ខ្លួន ក្នុងក្របខណ្ឌអង្គការសហប្រជាជាតិ ដើម្បីជួយដល់បណ្តាប្រទេសដែលកំពុងប្រឈម និងរងគ្រោះដោយសារមីន និងសំណល់ជាតិផ្ទុះពីសង្គ្រាម ។ កងកម្លាំងវិស្វកម្មព្រលានយន្តហោះ គឺបំពេញការងារនៅតំបន់គីដាល់ និងកងកម្ទេចយុទ្ធភណ្ឌមិនទាន់ផ្ទុះ គឺតំបន់តេសាលីតនៃប្រទេសម៉ាលី ។
លោកវរសេនីយ៍ឯក ប៊ុន កប មេញ្ជាការកងវិស្វកម្មព្រលានយន្តហោះឲ្យដឹងថា កម្លាំងទាំងពីរកង គឺបានបំពេញការងារនៅម៉ាលី ទទួលបានជោគជ័យគ្រប់ការងារទាំងអស់ គឺការងារថែទាំជួសជុលព្រលានយន្តហោះ នៅតំបន់គីដាល់ និងការងារកម្ទេចយុទ្ធភណ្ឌមិនទាន់ផ្ទុះ ត្រូវកម្ទេចចោលនៅទីកន្លែងតែម្តង ហើយក្រុមទាំងពីរនេះ គឺបានទទួលការកោតសរសើរពីអង្គការសហប្រជាជាតិផង ។ លោកបានបន្តថា៖ ១ខែកន្លងទៅនេះ នៅទីបញ្ជាការកងកម្លាំងមួកខៀវកម្ពុជាប្រចាំនៅសាធារណរដ្ឋម៉ាលី ត្រូវបានក្រុមឧទ្ទាមផ្លោងចូលបណ្តាលឲ្យទីស្នាក់នៅចំនួន២ខ្នងត្រូវបានឆេះ តែមិនបណ្តាលឲ្យរងបួស ឬបាត់បង់អាយុជីវិតដល់កម្លាំងមួកខៀវកម្ពុជានោះទេ ។
គួរបញ្ជាក់ថា ចាប់តាំងពីឆ្នាំ២០០៦មកកម្ពុជាបានបញ្ជូនកម្លាំងចំនួនសរុបប្រមាណជាង៥២០០នាក់ ក្នុងនោះមានស្ត្រីជាង២០០នាក់ ទៅចូលរួមបេសកកម្មរបស់អង្គការសហប្រជាជាតិ ។ ដែលបច្ចុប្បន្នកម្ពុជាមានកម្លាំងជិត១០០០នាក់ ដែលកំពុងបំពេញបេសកកម្មនៅប្រទេសស៊ូដង់ , ស៊ូដង់ខាងត្បូង, អាហ្វ្រិកកណ្តាល, លីបង់ និងម៉ាលី ៕
ចែករំលែកព័តមាននេះ