រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានសួរទៅមេដឹកនាំគណបក្សប្រឆាំងលោក សម រង្ស៊ី ឲ្យបកស្រាយនូវសំណួរចំនួនពីរ តើអ្វីជាសហគមន៍អន្តរជាតិ និងតើប្រទេសណាជាសហគមន៍អន្តរជាតិ ?
ក្រោយពីមេដឹកនាំអតីតគណប្រឆាំងលើកឡើងថា ខ្លួននឹងពហិការការបោះឆ្នោតនាថ្ងៃទី២៩ ខែកក្កដា ឆ្នាំ២០១៨ ខាងមុននេះ ហើយអវត្តមានរបស់ខ្លួនក្នុងការប្រកួតប្រជែងការបោះឆ្នោតថ្នាក់ជាតិ នោះសហគមន៍អន្តរជាតិនឹងមិនទទួលស្គាល់នោះទេ ។ ថ្លែងនៅឯពិធីបើកការដ្ឋានពង្រីក និងលើកកម្រិតគុណភាពកំណាត់ផ្លូវជាតិលេខ៣ ប្រវែងជាង១៣៤គីឡូម៉ែត្រ នៅខណ្ឌពោធិ៍សែនជ័យ សម្តេចតេជោ ហ៊ុន សែនបានលើកឡើងថា ថ្មីនេះមានប្រទេសមួយ ឬពីរដែលគាំទ្រមេដឹកនាំបក្សប្រឆាំង ហើយស្រែកថា គេនឹងអាចស្នើដកកៅអីរបស់កម្ពុជានៅអង្គការសហប្រជាជាតិទៀតផង ។
សម្តេចបានបញ្ជាក់ថាថ្មីៗនេះកម្ពុជាបានបញ្ជួនកងទ័ពរបស់ខ្លួនជាង៤០០នាក់ទៅក្រៅប្រទេសក្រោមឆ័ត្រអង្គការសហប្រជាជាតិ ហើយអង្គការសហប្រជាជាតិកំពុងត្រូវការកម្ពុជាបញ្ជួនកងទ័ពទៅជួយនូវសកម្មភាពមនុស្សធម៌ជាច្រើននៅប្រទេសលីបង់ ស៊ូដង់ខាងត្បូង អាហ្វ្រិកកណ្តាល និងម៉ាលីជាដើម ។
សម្តេចក៏បានបញ្ជាក់ថា ការអំពាវនាវរបស់លោក សម រង្ស៊ី កុំឲ្យប្រជាពលរដ្ឋទៅបោះឆ្នោត គឺជាការបំពានសិទ្ធរបស់ប្រជាពលរដ្ឋ ហើយសម្តេចបានចំអកថា មេបក្សនោះបានលើកឡើងថាបើគណបក្សប្រឆាំងរបស់លោក សម រង្ស៊ីមិនចូលរួមការបោះឆ្នោត សហគមន៍អន្តរជាតិនឹងមិនទទួលស្គាល់ការបោះឆ្នោត និងរាជរដ្ឋាភិបាល «កុំស្អីតិចសំពាធអន្តរជាតិ» ឆ្លើយមកសហគមន៍អន្តរជាតិជាអ្នកណា?
អ្នកឯងមានប្រទស១ ឬ២ គាំទ្រអ្នកឯង ខណៈដែលប្រទេសចិន ឥណ្ឌា កូរ៉េខាងត្បូង ជប៉ុន ឬក៏អាស៊ាន និងរុស្សី ជាដើមដែលធ្វើការយ៉ាងជិតស្និតជាមួយនឹងប្រទេសកម្ពុជា «គេមិនមែនជាសហគមន៍អន្តរជាតិទេអី?» ដូច្នេះសម្តេចបានទាមទារឲ្យមេបក្សប្រឆាំងឆ្លើយជូនសម្តេចនូវសំនូរចំនួន២ គឺទី១ – តើអ្វីជាសហគមន៍អន្តរជាតិ ? និងតើប្រទេសណាជាសហគមន៍អន្តរជាតិ ? សម្តេចមានប្រសាសន៍ថា ៖ «ឥឡូវឆ្លើយមក សហគមន៍អន្តរជាតិជានរណា ? និយាយឲ្យពិត អ្នកឯងមានប្រទេស ១ ឬ២ស្រែកគាំទ្រអ្នកឯង ។ តែអ្នកឯងកុំភ្លេចមានប្រទេសច្រើនណាស់ ដែលគាំទ្ររដ្ឋាភិបាលសព្វថ្ងៃ ហើយបន្តការងារធ្វើការជាមួយរាជរដ្ឋាភិបាលសព្វថ្ងៃ» ។
សម្តេចតេជោនាយករដ្ឋមន្ត្រីបានបញ្ជាក់ថា ប្រទេសទាំងអស់កំពុងធ្វើការជាមួយយើងទាំងអស់ សូម្បីល្ងាចនេះសម្តេចនឹងជួបជាមួយសមាជិកព្រឹទ្ធសភាអាមេរិកនៅរសៀលនេះផងដែរ ។ សម្តេចតេជោ ហ៊ុន សែនបញ្ជាក់បន្ថែមថា៖ «អាមេរិកមានទាន់ផ្តាច់ការទូតជាមួយយើងឯណា ទោះបីជាមានបញ្ហាខ្លះគាត់មិនពេញចិត្តជាមួយយើង» ៕
ចែករំលែកព័តមាននេះ