រាជធានីភ្នំពេញ ៖ ប្រមុខរាជរដ្ឋាភិបាលកម្ពុជាបានចេញបទបញ្ជាទៅអាជ្ញាធរ និងស្ថាប័នពាក់ព័ន្ធត្រូវបើកឱកាសបណ្តាបក្សនយោបាយនានាធ្វើសកម្មភាពឆ្ពោះទៅកាន់ការបោះឆ្នោតជាពិសេសត្រូវចុះហត្ថលេខាលើក្រដាសស្នាម ដែលគណបក្សនយោបាយថ្មីៗចង់បាន ដើម្បីបញ្ជាក់ពីបេក្ខភាពរបស់គេ ។ សម្តេចតេជោ ហ៊ុន សែន…
រាជធានីភ្នំពេញ ៖ ប្រមុខរាជរដ្ឋាភិបាលកម្ពុជាបានចេញបទបញ្ជាទៅអាជ្ញាធរ និងស្ថាប័នពាក់ព័ន្ធត្រូវបើកឱកាសបណ្តាបក្សនយោបាយនានាធ្វើសកម្មភាពឆ្ពោះទៅកាន់ការបោះឆ្នោតជាពិសេសត្រូវចុះហត្ថលេខាលើក្រដាសស្នាម ដែលគណបក្សនយោបាយថ្មីៗចង់បាន ដើម្បីបញ្ជាក់ពីបេក្ខភាពរបស់គេ ។
សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានបញ្ជាក់ថា ម្សិលមិញត្រូវនឹងថ្ងៃទី០៦ ខែឧសភា ឆ្នាំ២០១៨នេះ គឺគណបក្សប្រជាធិបតេយ្យមូលដ្ឋានបានប្រកាសចូលរួមការបោះឆ្នោតថ្នាក់ជាតិ ដែលនាំឲ្យគណបក្សនយោបាយដែលនឹងចូលរួមប្រកួតប្រជែងការបោះឆ្នោតជ្រើសតាំងតំណាងរាស្ត្រមិនតិចជាង១០គណបក្សទេ ដែលបានចុះបញ្ជីរួច ។
ក៏ប៉ុន្តែនៅមានគណបក្សមួយចំនួនបង្កើតថ្មីនៅត្រូវការស្នាមមេដៃត្រូវការបញ្ជាក់ឯកសារនេះ ឬឯកសារនោះដូចជា តម្រូវការចុះហត្ថលេខាបញ្ជាក់ថា បុគ្គលនៃបក្សនេះពិតជារស់នៅភូមិនេះ ឬលិខិតថ្កោលទោស «សុំឲ្យជួយសម្រួល» និងតម្រូវការចុះហត្ថលេខា «ត្រូវចុះឲ្យបានឆាប់» ការលើកផ្លាក ឬក៏ពិធីជួបជុំសកម្មជនតាមមូលដ្ឋាននានាព្រោះ នេះជាពេលវេលាបណ្តាបក្សនានាត្រូវធ្វើសកម្មភាពឲ្យស្របតាមច្បាប់ ដូច្នេះបើគណបក្សណាដែលត្រូវការលើកផ្លាក ដូច្នេះរដ្ឋបាលមូលដ្ឋានត្រូវសម្រួលទីតាំង «បើទីតាំងនេះគណបក្សប្រជាជនយើងអាចដាក់បាន គណបក្សផ្សេងក៏អាចដាក់បានដែរ» ។
ថ្លែងនៅឯពិធីបើកការដ្ឋានពង្រីក និងលើកកម្រិតគុណភាពកំណាត់ផ្លូវជាតិលេខ៣ ប្រវែងជាង១៣៤គីឡូម៉ែត្រ នៅសង្កាត់ចោមចៅ ខណ្ឌពោធិ៍សែនជ័យ សម្តេចតេជោបានបញ្ជាក់ជាថ្មីថា ប្រក្រតីទិននៃការបោះឆ្នោតដែលកំណត់នៅថ្ងៃទីអាទិត្យ ទី២៩ ខែកក្កដា ឆ្នាំ២០១៨នេះ គឺគ្មានការប្រែប្រួល ឬពន្យាពេលនោះទេ ។
សម្តេចក៏បានចំអកឲ្យទៅមេដឹកនាំគណបក្សប្រឆាំងលោក សម រង្ស៊ី ទោះបីជាប្រកាសធ្វើពហិការមិនចូលរួមបោះឆ្នោត ក៏មិនត្រូវភ្លេចថា នៅមានគណបក្សជាច្រើនទៀតនឹងចូលរួមប្រកួតប្រជែងដែរ ។ សម្តេចតេជោ ហ៊ុន សែនបានបញ្ជាក់ថា ៖ «បើមួយងាប់ទៅ ងាប់ដោយសារធ្វើខុសច្បាប់ មនុស្សមួយចំនួនដែលតុលាលការហាមឃាត់ សុទ្ធជារឿងរបស់គេ […] ងាប់បក្សនយោយបាយមួយមិនបានធ្វើឲ្យប៉ះពាល់ដល់លទ្ធិប្រជាធិបតេយ្យសេរីពហុបក្សនៅកម្ពុជាដែរ» ៕
ចែករំលែកព័តមាននេះ