រាជធានីភ្នំពេញ ៖ រថយន្តហាយឡែនឌ័រមួយគ្រឿងបើកឆ្លងកាត់ផ្លូវរថភ្លើង ត្រូវរថភ្លើងដឹកអ្នកដំណើរ បើកមកបុក បណ្តាលឲ្យបុរសម្នាក់រងរបួសស្រាល។ ហេតុការណ៍នេះបង្កឲ្យមានការភ្ញាក់ផ្អើលឡើង កាលពីវេលាម៉ោង១០ និង១០នាទីព្រឹក ថ្ងៃទី០៦ ខែមេសា ឆ្នាំ២០១៨នេះ ត្រង់ចំណុចផ្លូវរថភ្លើង ខាងជើងផ្សារចិនណាន់ ប្រមាណ១០០មែត្រ ស្ថិតក្នុងភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ។ តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញបុរសម្នាក់ បើកបររថយន្តមួយគ្រឿងម៉ាក ហាយឡែនឌ័រ ពណ៌ស ពាក់ស្លាកលេខ ភ្នំពេញ 2AN-2218 ដោយធ្វើដំណើរតាមបណ្តោយផ្លូវលំ ក្នុងទិសដៅពីជើងទៅត្បូង។ លុះមកដល់ចំណុចកើតហេតុ ដែលប្រសព្វជាមួយនឹងផ្លូវរថភ្លើង តែមិនមានបារ៉ាស់សម្រាប់បាំងពេលមានរថភ្លើងបើកឆ្លងកាត់ ម្តងៗឲ្យបានត្រឹមត្រូវនោះទេ ហើយពេលនោះរថយន្តខាងលើក៏មានបំណងបើកឆ្លងកាត់ផ្លូវរថភ្លើង ខណៈពេលដែលឆ្លងមិនទាន់បានពាក់កណ្តាលផ្លូវផង ស្រាប់តែមានរថភ្លើងដឹកអ្នកដំណើរមួយខ្សែ ដោយធ្វើដំណើរចេញមកពីស្ថានីយរថយន្តភ្លើងភ្នំពេញឆ្ពោះទៅទីខេត្តព្រះសីហនុ ក្នុងទិសដៅ ពីកើតទៅលិច និងក្នុងល្បឿនយ៉ាងលឿន។
រួចក៏ជ្រុលទៅបុករថយន្តចំពីមុខចំហៀងខាងដឆ្វេង ពេញទំហឹង បណ្តាលឲ្យរថយន្តខ្ទាតទៅចិញ្ចើមផ្លូវ រងការខូចខាតក្រពឹតផ្នែកខាងមុខចំហៀងខាងឆ្វេង យ៉ាងដំណំ រីឯអ្នកបើកបររងរបួសពកក្បាលបន្តិចបន្តួច ចំណែកឯរថភ្លើងមិនបានឈប់នោះទេ គឺបានបន្តដំណើរទៅមុខទៀតបាត់ទៅ។ បើតាមសម្តីពីអ្នកបើកបររថយន្តសុំមិនបញ្ចេញឈ្មោះ បានរៀបរាប់ប្រាប់ឲ្យដឹងថា នៅមុនពេលកើតហេតុគាត់បានបើករថយន្តខាងលើ បំណងនឹងបើក ឆ្លងកាត់ផ្លូវរថភ្លើងចំណុចកើតហេតុខាងលើ តែដោយនៅត្រង់ចំណុចកើតហេតុមិនមានដាក់បារ៉ាសបាំង ឬក៏មានអ្នកឈរធ្វើជាសញ្ញាប្រាប់ពេលដែលមានរថភ្លើងបើកឆ្លងកាត់ម្តងៗនោះទេ បូករួមផ្សំទាំងមានព្រៃដុះអមសងខាងផ្លូវរថភ្លើងពិបាកដល់គាត់មើលឆ្វេងស្តាំមិនឃើញថា មានរថភ្លើងបើកឆ្លងកាត់ឬក៏អត់។ បន្ទាប់មកដោយបាំងព្រៃមើលមិនឃើញរថភ្លើង និងមិនឮស៊ីប្លេរបស់រថភ្លើង ហើយគាត់ក៏បានបើកឆ្លងកាត់ផ្លូវរថភ្លើងនោះ តែខណៈដែលឆ្លងមិនទាន់បានពាក់កណ្តាលផង ស្រាប់តែមានរថភ្លើងដឹកអ្នកដំណើរបើកមកបុកពេញទំហឹងតែម្តង។
ក្រោយពេលកើតហេតុសមត្ថកិច្ចមូលដ្ឋានក៏ដូចជាសមត្ថកិច្ចជំនាញក៏បានចុះមកដល់ចំណុចកើតហេតុ ហើយបានឲ្យម្ចាស់រថយន្តធ្វើស្ទូចយករថយន្តទៅជួសជុលដោយខ្លួនឯង ព្រោះដោយភាគីខាងរថយន្ត និងភាគីខាងរថភ្លើងមិនបានធ្វើការប្តឹងផ្តល់ទាមទារសំណងអ្វីពីគ្នានោះទេ។ ហើយជាចុងក្រោយម្ចាស់ រថយន្តរងគ្រោះក៏ដូចជាប្រជាពលរដ្ឋដែលធ្វើដំណើរតាមផ្លូវនោះ និងប្រជាពលរដ្ឋដែលរស់នៅក្បែរ កន្លែងកើតហេតុ បានសូមសំណូមពរដល់ក្រសួងសាធារណៈការ និងដឹកជញ្ជូន សូមមេត្តាកាប់ព្រៃដែលដុះអមសងខាងផ្លូវរថភ្លើង និងដាក់បារ៉ាសបាំងនៅពេលដែលមាន រថភ្លើងបើកឆ្លងកាត់ឲ្យបានត្រឹមត្រូវដូចផ្លូវនានាដែរ ព្រោះខ្លាចកុំឲ្យមានដូចជាករណីខាងលើម្តងទៀត៕
ចែករំលែកព័តមាននេះ