ខេត្តត្បូងឃ្មុំ ៖ ពិតជាមិនធម្មតានោះទេដែលពីមុនអ្នកជំងឺដែលចូលមកសម្រាក ព្យាបាលជំងឺនៅមន្ទីរពេទ្យក្នុងនោះបានរកឃើញ មានរហូតដល់ទៅ៩០ភាគរយកើតជំងឺគ្រុនចាញ់ ដែលនោះជាក្តីកង្វល់មួយដែលមិនអាចព្រងើយកន្តើយបាននោះទេ ។ តែក្រោមការយកចិត្តទុកដាក់របស់គ្រូពេទ្យគ្រប់លំដាប់ថ្នាក់ដោយបានបើកយុទ្ធនាការក្តៅគគុក ប្រយុទ្ធប្រឆាំងជំងឺនេះ ហើយមកដល់សព្វថ្ងៃនៅក្នុងទឹកដីស្រុកមេមត់…
ខេត្តត្បូងឃ្មុំ ៖ ពិតជាមិនធម្មតានោះទេដែលពីមុនអ្នកជំងឺដែលចូលមកសម្រាក ព្យាបាលជំងឺនៅមន្ទីរពេទ្យក្នុងនោះបានរកឃើញ មានរហូតដល់ទៅ៩០ភាគរយកើតជំងឺគ្រុនចាញ់ ដែលនោះជាក្តីកង្វល់មួយដែលមិនអាចព្រងើយកន្តើយបាននោះទេ ។ តែក្រោមការយកចិត្តទុកដាក់របស់គ្រូពេទ្យគ្រប់លំដាប់ថ្នាក់ដោយបានបើកយុទ្ធនាការក្តៅគគុក ប្រយុទ្ធប្រឆាំងជំងឺនេះ ហើយមកដល់សព្វថ្ងៃនៅក្នុងទឹកដីស្រុកមេមត់ ប្រជាពលរដ្ឋដែលមានផ្ទុកមេរោគគ្រុនចាញ់ស្ទើរមិនមាននោះទេ ។
លោកវេជ្ជបណ្ឌិត អ៊ិន ម៉ារឌី ប្រធានការិយាល័យសុខាភិបាលប្រតិបត្តិស្រុកមេមត់មានប្រសាសន៍ឲ្យដឹងនៅរសៀលថ្ងៃទី០៥ ខែឧសភា ឆ្នាំ២០១៨ថា ក្នុងពេលដែលរូបលោកត្រូវបានថ្នាក់លើចាត់ឲ្យមកបម្រើការងារនៅស្រុកមេមត់អំឡុងឆ្នាំ១៩៩៩នោះ ដោយបានសង្កេតឃើញមានប្រជាពលរដ្ឋក្មេងចាស់ប្រុសស្រីដែលបានចូលមកសម្រាកព្យាបាលជំងឺ នៅមន្ទីរពេទ្យបង្អែកស្រុកមេមត់ គឺប្រមាណ៩០ភាគរយ សុទ្ធតែមានផ្ទុកទៅដោយមេរោគគ្រុនចាញ់ ថែមទាំងមានអាការធ្ងន់ធ្ងរថែមទៀតផង ។
លោកវេជ្ជបណ្ឌិត អ៊ិន ម៉ារឌី មានប្រសាសន៍បន្តថា ក្រោមការយកចិត្តទុកដាក់របស់រដ្ឋមន្ត្រីក្រសួងសុខាភិបាល ប្រធានមន្ទីរ និងអាជ្ញាធរមូលដ្ឋានបានបើកយុទ្ធនាការប្រយុទ្ធប្រឆាំងជំងឺគ្រុនចាញ់ដោយបានធ្វើឡើងមានលក្ខណៈទូលំទូលាយ ហើយមានការចូលរួមស្តាប់ពីប្រជាពលដ្ឋនៅគ្រប់ទិសទីយ៉ាងផុលផុសនោះ ដោយសេវាព្យាបាលជំងឺនេះបានទៅដល់មណ្ឌលសុខភាពតែម្តង ។
ក្នុងត្រីមាសទី១ ឆ្នាំ២០១៨នេះ មានប្រជាពលរដ្ឋចំនួនតែ២៨នាក់ប៉ុណ្ណោះ ដែលកើតជំងឺគ្រុនចាញ់មកសម្រាកព្យាបាលនៅមន្ទីរពេទ្យស្រុកមេមត់ សុទ្ធតែមានលក្ខណៈស្រាល ក្រោយពីជាសះស្បើយ ហើយបាននាំគ្នាត្រឡប់ទៅផ្ទះវិញ ។ ចំណែកនៅតាមមណ្ឌលសុខភាពតាមបណ្តាឃុំនានា ក៏បានរកឃើញមានពលរដ្ឋមករកសេវាព្យាបាលជំងឺនេះចំនួន១៣៤នាក់ផងដែរ ។ ថ្មឺៗកន្លងទៅនេះរូបលោកបានរៀបចំកម្មវិធីប្រយុទ្ធប្រឆាំងជំងឺគ្រុនចាញ់នៅមណ្ឌលសុខភាព ដោយមានការចូលរួមពីពលរដ្ឋក្នុងមូលដ្ឋានផុលផុសព្រមទាំងចែកមុងជ្រលក់ថ្នាំផងដែរ ។
លោកវេជ្ជបណ្ឌិត អ៊ិន ម៉ារឌី ប្រធានការិយាល័សុខាភិបាលប្រតិបត្តិស្រុកមេមត់ បញ្ជាក់ថា ចំពោះលក្ខណដែលសង្ស័យកើតជំងឺគ្រុនចាញ់ដូចជា អ្នកជំងឺក្តៅខ្លួន ហើយញាក់ បែកញើស ឈឺក្បាលអស់កម្លាំងរហិតរហៃជាដើម ប្រសិនបើមានលក្ខណបែបនេះសូមប្រញាប់ទៅរកសេវាសុខាភិបាលដែលនៅកៀកបំផុត ។ ព្រោះថា នៅតាមមណ្ឌលសុខភាពនីមួយៗ សុទ្ធតែមានឧបករណ៍សម្រាប់ធ្វើតេស្ត មេរោគគ្រុនចាញ់ផងដែរ ។ ដោយឡែកនៅតាមឱសថស្ថាននានាក្នុងស្រុកមេមត់ ច្បាប់ក៏មិនអនុញ្ញាតឲ្យមានលក់ថ្នាំគ្រុនចាញ់នោះទេ គឺថ្នាំមានតែនៅតាមមណ្ឌលសុខភាព ឫមន្ទីរពេទ្យតែប៉ុណ្ណោះ ៕
ចែករំលែកព័តមាននេះ