ខេត្តស្វាយរៀង ៖ ក្រុមការងារបច្ចេកទេសប្រឆាំងអាវុធគីមីសាស្ត្រនៃអគ្គនាយកដ្ឋានអាជ្ញាធរជាតិទប់ស្កាត់អាវុធគីមីនុយក្លេអ៊ែជីវសាស្ត្រ និងវិទ្យុសកម្មក្រសួងការពារជាតិបានចុះបេសកកម្មគាស់គ្រាប់បែកគីមីដែលសហរដ្ឋអាមេរិកទម្លាក់សម័យសង្គ្រាមឆ្នាំ១៩៦៧ដល់១៩៧៣នៅក្នុងឃុំគគីរ ស្រុករមាសហែក បានបន្សល់ទុកជាចម្ការគ្រាប់បែកគីមី ហើយក្រុមការងារបច្ចេកទេសបានស្រាវជ្រាវរាវរក និងបោះស្លាករួចរាល់មាន៥ភូមិមកដល់ថ្ងៃទី៦ ខែឧសភា ឆ្នាំ២០១៨នេះ ។
មានទី១ – គឺភូមិតាវាំង មានចំនួន៦គ្រាប់ ស្មើរនឹង៥កន្លែង ទី២- ភូមិគគីរ មានចំនួន១គ្រាប់ ស្មើរនឹង១កន្លែង ទី៣ – ភូមិត្រពាំងស្គន់ មាន២គ្រាប់ស្មើរនឹង១កន្លែង ទី៤- ភូមិព្រៃក្តីមានចំនួន៣គ្រាប់ ស្មើរនឹង៣កន្លែង ទី៥- ភូមិតាសេកមានចំនួន២គ្រាប់ ស្មើរនឹង១កន្លែង សរុប៥ភូមិ ចំនួន១៤គ្រាប់ដែលទើប និងរកឃើញថ្មីៗ ស្មើរនឹង១១កន្លែង ហើយបើតាមការផ្តល់ព័ត៌មានបឋម គឺក្រុមការងារបានគាស់បានគ្រាប់បែកគីមីចំនួន០២គ្រាប់ទៀតហើយ គឺនៅភូមិតាវាំង១គ្រាប់ និងនៅភូមិតាសេក១គ្រាប់ដែលក្រុមការងារបានធ្វើការគាស់យកគ្រាប់បែកនេះចាប់តាំងពីថ្ងៃទី២ ខែឧសភា ២០១៨ រហូតមកដល់ថ្ងៃទី៦ ឧសភា ឆ្នាំ២០១៨នេះ ។ ក្រុមការងារកំពុងធ្វើការវិចខ្ចប់មិនទាន់អនុញ្ញាត្តឲ្យអ្នកសារព័ត៌មានចូលទៅថតរូបភាពនៅឡើយទេ គ្រាប់បែកគីមីទាំង២គ្រាប់នេះ ។
បើសរុបគាស់បានចំនួន០៣គ្រាប់ហើយ គឺគ្រាប់ទី១នៅក្នុងបរវេណខាងមុខសាលាបឋមសិក្សាគគីរ ស្ថិតក្នុងវត្តគគីរហើយត្រូវក្រុមការងារបច្ចេកទេសវិចខ្ចប់រួច បានប្រគល់ឲ្យក្រុមការងារអ្នកជំនាញអាវុធគីមីរបស់អង្គការសហប្រជាជាតិយកទៅពិនិត្យសារជាតិពុល ក៏ប៉ុន្តែរហូតមកដល់ពេលនេះពុំទាន់បានដឹងលទ្ធផលយ៉ាងណានៅឡើយទេ ហើយគ្រាប់បែកចំនួន២គ្រាប់ដែលទើបតែគាស់បានថ្មីនេះ កំពុងធ្វើការវិចខ្ចប់ ។
បើតាមក្រុមការងារបានឲ្យដឹងទៀតថា គ្រាប់បែកគីមីដែលសហរដ្ឋអាមេរិកទម្លាក់នៅលើទឹកដីឃុំគគីរស្រុករមាសហែក គឺរាវរកឃើញសរុប៤០គ្រាប់ឯណោះ ក៏ប៉ុន្តែក្រុមការងារបច្ចេកទេសបានប៉ោះបង្គោលហ៊ុមពាត់ រួចរាល់ជាផ្លូវការមាន១១ទីតាំងមានគ្រាប់ចំនួន១៤គ្រាប់ និងដំណើរការគាស់ជាបន្តបន្ទាប់ ក្រោយពេលវិចខ្ចប់គ្រាប់បែកចំនួន២គ្រាប់ថ្មីនេះរួចរាល់ និងសុំគោលការណ៍ពីរាជរដ្ឋាភិបាល ដើម្បីយកគ្រាប់បែកជម្លៀសទៅទុកដាក់នៅកន្លែងមានសុវត្ថិភាព ៕
ចែករំលែកព័តមាននេះ