ខេត្តបាត់ដំបង ៖ កងកម្លាំងប្រដាប់អាវុធតាមព្រំដែនទទួលបានអាវភ្លៀង ដែលជាអំណោយរបស់សម្តេចមហាសេនាបតីតេជោ នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត បានផ្តល់ឲ្យចំនួន១៣៤២៨នាក់ មាននគរបាលចំនួន១៥៥៥នាក់ កងទ័ពជើងគោកប្រចាំទិសចំនួន៨៦៤នាក់ អាវុធហត្ថចំនួន១០១៥នាក់ គ្រប់តាមបណ្តាអង្គភាពឈរជើងតាមព្រំដែនក្នុងទិសយោធភូមិភាគទី៥ ដែលមានកងទ័ព នគរបាល អាវុធហត្ថទាំង៤ខេត្តមានពោធិសាត់ បាត់ដំបង ប៉ៃលិន និងបន្ទាយមានជ័យ កងពលលេខ៥១,៥២ និង៥៣ កងកាពារព្រំដែនលេខ៥០១,៥០២,៥០៣ និង៥០៤ គ្រប់វរៈនគរបាលការពារព្រំដែន កងទ័ពជើងគោកទិសជួរមុខ ក្រសួងការពារជាតិទិសជួរមុខកងទ័ពផ្នែកទំនាក់ទំនងព្រំដែនកម្ពុជា-ថៃ ។
ដោយកងកម្លាំងទាំងអស់បានចាត់តំណាងប្រមាណជាង៥០០នាក់ មកទទួលយកនៅទីបញ្ជាការយោធភូមិភាគទី៥ វេលារសៀលម៉ោង៣និង០០ថ្ងៃទី០៥ ខែឧសភា ឆ្នាំ២០១៨ ក្រោមអធិបតីភាពលោកនាយឧត្តមសេនីយ៍គន់ គីម តំណាងឲ្យសម្តេចតេជោហ៊ុន សែនជានាយករដ្ឋមន្ត្រីនៃព្រះរាជាណាចក្រកម្ពុជា ។
លោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ មានមតិស្វាគមន៍ និងរាយការណ៍ពីការងារដឹកនាំទូទាំងយោធភូមិភាគទី៥កន្លងមក គឺបានប្រឈមមុខ និងបញ្ហាខ្លះៗ តែអ្វីៗព្រោះតែកងទ័ពយើងទាំងអស់គ្នាមានស្មារតី ឆន្ទះស្នេហាជាតិ ស្រឡាញ់សុខសន្តិភាពដែលកំពុងមានរហូតដល់សព្វថ្ងៃនេះ ទើបយើងរួមគ្នាការពារ កសាងឲ្យមានការរីកចម្រើនគ្រប់ហេដ្ឋារចនាសម្ព័ន្ធ និងគ្រប់តាមបណ្តាអង្គភាពកងទ័ពមានអាគារស្នាក់នៅ សាលប្រជុំ កន្លែងធ្វើការ ជីវភាពសមរម្យ ផ្លូវថ្នល់ក្រាលកៅស៊ូពីក្រៅរហូតដល់ក្នុងអង្គភាព ហើយសំខាន់គាំទ្រសម្តេចតេជោហ៊ុន សែន បន្តដឹកនាំក្នុងអាណត្តិទី៦ បន្តទៅទៀត បន្ទាប់ពីបានបោះឆ្នោតនាពេលខាងមុននេះ ។
លោកនាយឧត្តមសេនីយ៍គន់ គីម តំណាងសម្តេចទាំងពីរបានទទួលពាក្យផ្តាំផ្ញើសួរសុខទុក្ខដល់គ្រប់កងកម្លាំងទាំងអស់មាន៣៨អង្គភាព ដែលកំពុងឈរជើងតាមព្រំដែននេះ សូមកុំភ្លេចទៅចូលរួមបោះឆ្នោតឲ្យបានគ្រប់ៗគ្នា ដោយកុំឲ្យជឿផ្តេសផ្តាស់តាមការផ្សាយរបស់ជនមួយចំនួនដែលបានក្រឡៃបន្លំជាអង្គភាពកងទ័ព ផ្សាយតាមប្រព័ន្ធហ្វេសប៊ុក ដើម្បីញុះញង់ឲ្យមានភាពវឹកវរនៅក្នុងប្រទេសកម្ពុជានេះឲ្យសោះ ព្រោះរាល់ទង្វើដែលពួកអគតិបានធ្វើមកនេះ គឺចង់បំផ្លាញសេចក្តីសុខរបស់យើងទាំងអស់គ្នា ដែលកំពុងជ្រកនៅក្នុងម្លប់សុខសន្តិភាពដែលរកបានមកដោយលំបាកជាទីបំផុត ចេញពីសង្គ្រាមដ៏រាំរ៉ៃកន្លងមកនេះ ហើយចំពោះកងទ័ពយើងសព្វថ្ងៃប្រាក់បៀវត្សក៏បានតម្លើងឲ្យបានសមរម្យដែលក្នុងខែមេសានេះ កងទ័ពទាបបំផុតក៏ទទួលបាន១លានរៀលក្នុង១ខែ និងកំពុងរៀបចំតម្លើងជាបន្តទៅទៀតដល់បងប្អូនយើង និងគ្រប់មន្ត្រីរាជការទាំងអស់ ។
លោកនាយឧត្តមសេនីយ៍បានបញ្ជាក់នាពេលខាងមុខនេះ លោក និងលាឈប់ពីកងទ័ពដើម្បីឈរឈ្មោះជាតំណាងរាស្ត្រក្នុងរដ្ឋសភា ដើម្បីមានភាពងាយស្រួលបានរស់រួមសុខរួមទុក្ខឲ្យកាន់តែជិតស្និទ្ធជាមួយបងប្អូនយើងបន្តរួមគ្នាកសាងប្រទេសបន្ថែមទៀត ៕
ចែករំលែកព័តមាននេះ