នៅថ្ងៃទី០២ ដល់ថ្ងៃទី០៤ ខែឧសភា ឆ្នាំ២០១៨ ឯកឧត្តមបណ្ឌិត គុណ ញឹមប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានគយ និងរដ្ឋាករកម្ពុជា (អគរ)…
នៅថ្ងៃទី០២ ដល់ថ្ងៃទី០៤ ខែឧសភា ឆ្នាំ២០១៨ ឯកឧត្តមបណ្ឌិត គុណ ញឹមប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានគយ និងរដ្ឋាករកម្ពុជា (អគរ) បានដឹកនាំគណៈប្រតិភូគយចូលរួមកិច្ចប្រជុំអគ្គនាយកគយអាស៊ានលើកទី២៧ នៅកោះឡាងកាវី ប្រទេសម៉ាឡេស៊ី។ កិច្ចប្រជុំនេះបានដឹកនាំដោយលោក Dato’ Subromaniam Tholasyអគ្គនាយកគយនៃរដ្ឋបាលគយម៉ាឡេស៊ី ដោយមានការចូលរួមពីអគ្គនាយកគយអាស៊ានទាំងដប់ប្រទេស និងមន្ត្រីលេខាធិការដ្ឋានអាស៊ាន។
កិច្ចប្រជុំអគ្គនាយកគយអាស៊ានលើកទី២៧នេះ បានសម្រេចលើការងារសំខាន់ៗមួយចំនួនដូចជា ៖
១) -ការបង្កើតអនុក្រុមការងារបច្ចេកទេសចំណាត់ថ្នាក់ទំនិញ
២) – ពិនិត្យ និងពិភាក្សាលើវឌ្ឍនភាពស្តីពីការអភិវឌ្ឍប្រព័ន្ធដឹកជញ្ជូនទំនិញឆ្លងកាត់គយអាស៊ាន ដោយសមាជិកអាស៊ានទាំងដប់បានចុះហត្ថលេខាលើពិធីសារ២ ស្តីពីការកំណត់ការិយាល័យមាត់ច្រកសម្រាប់ដឹកទំនិញឆ្លងកាត់នៅក្នុងក្របខណ្ឌកិច្ចព្រមព្រៀងអាស៊ានស្តីពីការដឹកជញ្ជូនទំនិញឆ្លងកាត់ (AFAFGIT) និងសមាជិកចំនួនប្រាំបួនបានផ្តល់សច្ចាប័នលើពិធីសារ៧ ស្តីពីការដឹកជញ្ជូនទំនិញឆ្លងកាត់អាស៊ាននៅក្នុងក្របខណ្ឌ AFAFGIT
៣) – បង្កើតក្រុមការងារសិក្សាអំពីប្រតិបត្តិករសេដ្ឋកិច្ចមានការអនុញ្ញាតអាស៊ាន (ASEAN AEO)។ បច្ចុប្បន្ននេះ មានប្រទេសសមាជិកចំនួនប្រាំមួយបានអនុវត្ត AEO។ ដោយឡែកកម្ពុជាបានអនុវត្តកម្មវិធីលើកទឹកចិត្តដល់ធុរជនដែលមានអនុលោមភាពខ្ពស់ និងកំពុងឈានទៅអនុវត្តពេញលេញនូវកម្មវិធីប្រតិបត្តិករសេដ្ឋកិច្ចមានការអនុញ្ញាតនៅពេលអនាគតដ៏ឆាប់ខាងមុខ
៤) – វឌ្ឍនភាពនៃការអនុវត្តបញ្ជរតែមួយអាស៊ានដោយប្រទេសសមាជិកចំនួនប្រាំ រួមមានឥណ្ឌូណេស៊ី ម៉ាឡេស៊ី សឹង្ហបុរី ថៃ និងវៀតណាម បានធ្វើការផ្លាស់ប្តូរវិញ្ញាបនបត្រដើមកំណើតទំនិញ COForm D តាមអេឡិកត្រូនិច។ ចំពោះឯកសារប្រតិវេទន៍គយអាស៊ាន និងវិញ្ញាបនបត្រអេឡិកត្រូនិចអនាម័យ និងភូតគាមអនាម័យសមាជិកអាស៊ានកំពុងពិភាក្សានិងពិចារណាដាក់ឲ្យផ្លាស់ប្តូរតាមរយៈប្រព័ន្ធបញ្ជរតែមួយអាស៊ាននៅពេលអនាគត។ កម្ពុជាស្ថិតនៅក្នុងដំណាក់កាលសាកល្បងក្នុងការតភ្ជាប់ជាមួយប្រព័ន្ធបញ្ជរតែមួយអាស៊ាន ដើម្បីធ្វើការផ្លាស់ប្តូរវិញ្ញាបនបត្រដើមកំណើតទំនិញ CO Form D តាមអេឡិកត្រូនិច និងអាចចូលរួមអនុវត្តជាផ្លូវការជាមួយបណ្តាប្រទេសសមាជិកអាស៊ានក្នុងពេលឆាប់ៗនេះ។
កិច្ចប្រជុំអគ្គនាយកគយអាស៊ានលើកទី២៧ ក៏បានប្រជុំពិគ្រោះយោបល់ដោយឡែកពីគ្នាជាមួយគណៈប្រតិភូរដ្ឋបាលគយ ចិន ជប៉ុន កូរ៉េ និងអូស្ត្រាលី ដើម្បីពង្រឹងកិច្ចសហប្រតិបត្តិការពាក់ព័ន្ធនឹងការងារគយ និងបានពិគ្រោះយោបល់ជាមួយតំណាងវិស័យឯកជនសំខាន់ៗចំនួនបី រួមមាន ៖
១) ក្រុមប្រឹក្សាធុរកិច្ចអាស៊ាន-អាមេរិក
២) ក្រុមប្រឹក្សាធុរកិច្ចអាស៊ាន-អឺរ៉ុប និង
៣)ក្រុមប្រឹក្សាធុរកិច្ចអាស៊ាននិងវិស័យឯកជនរបស់ម៉ាឡេស៊ី ក្នុងគោលបំណងពង្រឹងទំនាក់ទំនងនិងកិច្ចសហការរវាងរដ្ឋបាលគយនិងវិស័យឯកជន ដើម្បីលើកកម្ពស់កិច្ចសម្រួលពាណិជ្ជកម្ម។
នៅក្នុងកិច្ចប្រជុំនេះ លោកបណ្ឌិត គុណ ញឹម បានលើកឡើងពីការរីកចម្រើននៃវិស័យពាណិជ្ជកម្មអេឡិកត្រូនិចក្នុងបរិបទសេដ្ឋកិច្ចឌីជីថល និងបដិវត្តន៍ឧស្សាហកម្មទី៤ និងតម្រូវការក្នុងការគ្រប់គ្រង និងកិច្ចសម្រួលពាណិជ្ជកម្ម ជាពិសេសការធ្វើពាណិជ្ជកម្មអេឡិកត្រូនិចឆ្លងដែនទាំងទំនិញរូបវន្ត និងទំនិញឌីជីថល។ លោកក៏បានលើកឡើងពីជោគជ័យរបស់ អគរ ក្នុងការចូលរួមអនុវត្តកម្មវិធីត្រួតពិនិត្យកុងតឺន័រ (Container Control Program – CCP) នៅកំពង់ផែអន្តរជាតិក្រុងព្រះសីហនុ ដែលជាកម្មវិធីរួមរបស់អង្គការគយពិភពលោក (WCO) និងការិយាល័យអង្គការសហប្រជាជាតិផ្នែកគ្រឿងញៀន និងឧក្រិដ្ឋកម្ម (UNODC) ហើយយោងលើបទពិសោធន៍នេះ អគរ កំពុងពិនិត្យលទ្ធភាពក្នុងការពង្រីកកម្មវិធីនេះឲ្យគ្របដណ្ដប់អាកាសយានដ្ឋានអន្តរជាតិភ្នំពេញផងដែរ។
ឆ្លៀតឱកាសក្នុងកិច្ចប្រជុំអគ្គនាយកគយអាស៊ានលើកទី២៧នេះ គណៈប្រតិភូនៃអគរ ក៏បានជួបប្រជុំពិគ្រោះយោបល់ទ្វេភាគីជាមួយរដ្ឋបាលគយជប៉ុនដឹកនាំដោយលោកអគ្គនាយក Iizuka Atsuhi ដើម្បីបន្តពង្រឹងកិច្ចសហប្រតិបត្តិការគយរវាងរដ្ឋបាលគយទាំងពីរ។ទ ន្ទឹមនេះ គណៈប្រតិភូនៃ អគរ ក៏បានប្រជុំទ្វេភាគីជាមួយរដ្ឋបាលគយថៃ ដឹកនាំដោយលោក Auychai Kultipmontre អគ្គនាយករងគយថៃ ដើម្បីពង្រឹងកិច្ចសហប្រតិបត្តិការ និងពិភាក្សាពីលក្ខខណ្ឌ ដើម្បីចុះហត្ថលេខាលើអនុស្សារណៈនៃការយោគយល់គ្នាស្តីពីទំនិញឆ្លងកាត់។ គណៈប្រតិភូនៃអគរ ក៏បានប្រជុំទ្វេភាគីជាមួយក្រុមប្រឹក្សាធុរកិច្ច អាស៊ាន-អឺរ៉ុប និងអាស៊ាន-អាមេរិក ក្នុងគោលបំណងពង្រឹងទំនាក់ទំនង និងកិច្ចសហការរវាងរដ្ឋបាលគយកម្ពុជា-វិស័យឯកជន ជាពិសេសជម្រាបអំពីវឌ្ឍនភាពសំខាន់ៗនៃកំណែទម្រង់និងទំនើបកម្មរដ្ឋបាលគយកម្ពុជា ហើយស្ដាប់ និងពិភាក្សារកដំណោះស្រាយលើកង្វល់ និងបញ្ហាដែលលើកឡើងដោយវិស័យឯកជន។
ចែករំលែកព័តមាននេះ