ខេត្តកំពត ៖ ស្ត្រីម្នាក់បានស្លាប់តែមួយប៉ប្រិចភ្នែកដែលមើលឃើញគួរឲ្យរន្ធត់បំផុត ខណៈដឹកកូនតូចមកពីមន្ទីរពេទ្យហើយជួបនឹងហេតុការគ្រោះចរាចរដែលបង្កឡើងដោយរថយន្តដឹកជីចំណុះ៥តោនមួយគ្រឿងបុកពីក្រោយពេញទំហឹងរួចកិនពីលើបែកខួរស្លាប់យ៉ាងអាណោចអាធម៌ កាលពីវេលាម៉ោង៩និង៣០នាទីព្រឹក ថ្ងៃទី០៤ ខែឧសភា ឆ្នាំ២០១៨ នៅលើកំណាត់ជាតិលេខ៣៣ ស្ថិតក្នុងភូមិកោះខ្លូត…
ខេត្តកំពត ៖ ស្ត្រីម្នាក់បានស្លាប់តែមួយប៉ប្រិចភ្នែកដែលមើលឃើញគួរឲ្យរន្ធត់បំផុត ខណៈដឹកកូនតូចមកពីមន្ទីរពេទ្យហើយជួបនឹងហេតុការគ្រោះចរាចរដែលបង្កឡើងដោយរថយន្តដឹកជីចំណុះ៥តោនមួយគ្រឿងបុកពីក្រោយពេញទំហឹងរួចកិនពីលើបែកខួរស្លាប់យ៉ាងអាណោចអាធម៌ កាលពីវេលាម៉ោង៩និង៣០នាទីព្រឹក ថ្ងៃទី០៤ ខែឧសភា ឆ្នាំ២០១៨ នៅលើកំណាត់ជាតិលេខ៣៣ ស្ថិតក្នុងភូមិកោះខ្លូត ឃុំកំពង់ត្រាចខាងកើត ស្រុកកំពង់ត្រាច ខេត្តកំពត ។
តាមប្រភពពីសមត្ថកិច្ចនគរបាលចរាចរស្រុកកំពង់ត្រាចបានឲ្យដឹងថា ស្ត្រីរងគ្រោះមានឈ្មោះ អេង សារិ អាយុ៣៥ឆ្នាំ និងអ្នករួមដំណើរឈ្មោះ អេង សារ៉យ ភេទស្រី អាយុ២៦ឆ្នាំ និងកូនស្រីជនរងគ្រោះទើបតែមានអាយុ៥ខែម្នាក់ ទាំង២នាក់អ្នករួមដំណើរនេះបានរងរបួសស្រាល ។ អ្នកទាំងបីមានទីលំនៅភូមិកោះខ្លូត ឃុំកំពង់ត្រាចខាងកើត ស្រុកកំពង់ត្រាច ខេត្តកំពត ។
សមត្ថកិច្ចបានបន្តថា ក្នុងហេតុការគ្រោះថ្នាក់ចរាចររវាងរថយន្ត និងម៉ូតូខាងលើ ម៉ូតូបើកបរក្នុងទិសដៅពីជើងទៅត្បូងក្នុងទិសដៅស្របគ្នា ។ លុះដល់ចំណុចកើតហេតុម៉ូតូក៏បានបត់ឆ្វេងឆ្លងកាត់ផ្លូវដោយពុំបានប្រុងប្រយ័ត្នមើលឆ្វេងស្តាំ និងពីក្រោយ ខណៈពេលបត់ឆ្លងផ្លូវបានពាក់កណ្តាលផ្លូវក៏មានរថយន្តមួយគ្រឿង ពណ៌ស ពាក់ផ្លាកលេខ ភ្នំពេញ 3C-5700 ចំណុះ៥តោនបានបុកពីក្រោយពេញទំហឹងបណ្តាលឲ្យស្ត្រីអ្នកម៉ូតូខ្ទាតមកមុខរថយន្តត្រូវរថយន្តកិនចំក្បាល់បែកខួរស្លាប់ភ្លាមៗនៅកន្លែងកើតហេតុ ។
ចំណែកអ្នករួមដំណើរ២នាក់ក្នុងនោះមានកូនស្ត្រីរងគ្រោះម្នាក់ដែលមានអាយុទើបតែបាន៥ខែផងនោះបានរងរបួសស្រាល ។ ម៉ូតូរបស់ស្ត្រីរងគ្រោះម៉ាកសេ១២៥ ស៊េរីឆ្នាំ២០១៦ ពណ៌ខ្មៅ ពាក់ផ្លាកលេខ កំពត 1J-2547 បានខូចខាតស្រាល ។ ចំណែកអ្នកបើកបររថយន្តក្រោយពីមានហេតុការបានចុះរត់គេចខ្លួនបាត់ស្រមោលបន្សល់ទុករថយន្តនៅកន្លែងកើតហេតុ ។
ក្រោយពីពិនិត្យវាស់វែងរួចសាកសពត្រូវបានសមត្ថកិច្ចប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ។ ចំណែកយានយន្តទាំងពីរគ្រឿងសមត្ថកិច្ចបាននាំយកទៅរក្សាទុកនៅអធិការដ្ឋាននគរបាលស្រុកកំពង់ត្រាចទុកដោះស្រាយតាមផ្លូវច្បាប់នៅពេលក្រោយជាមួយគ្រួសារជនរងគ្រោះ ៕
ចែករំលែកព័តមាននេះ