រាជធានីភ្នំពេញ ៖ អាជ្ញាធររាជធានីភ្នំពេញបានឱ្យដឹងថា ដោយមានកិច្ចសហការពីអង្គភាពអគ្គិសនីកម្ពុជា និងស្ថាប័នជំនាញពាក់ព័ន្ធមួយចំនួនទៀត ពេលនេះ រដ្ឋបាលរាជធានីភ្នំពេញកំពុងជំរុញផែនការកាត់ផ្តាច់ប្រព័ន្ធខ្សែភ្លើង ខ្សែកាបអុបទិក និងប្រព័ន្ធខ្សែទូរស័ព្ទ ដែលបានចងនិងបន្តោងរយីងរយោងតាមបណ្តោយផ្លូវ និងកាត់ទទឹងផ្លូវសំខាន់ៗក្នុងរាជធានីភ្នំពេញចំនួន៦ផ្លូវ ។
ជាជំហានទី១ នៃផែនការនេះ គឺកាត់បញ្ចូលក្នុងបំពង់មេក្រោមដីឱ្យបានរួចរាល់នៅចុងឆ្នាំ២០១៨នេះ ។
លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញបានឱ្យដឹងថា ប្រព័ន្ធខ្សែកាប ខ្សែភ្លើង និងប្រព័ន្ធខ្សែទូរស័ព្ទ នាពេលកន្លងមក និងសព្វថ្ងៃនេះ ទាំងខ្សែកាត់ទទឹងផ្លូវ និងបណ្តោយផ្លូវតភ្ជាប់កួចចូលគ្នាយ៉ាងច្រើនស្អេកស្កះ បង្កនូវភាពរញ៉េរញ៉ៃ ដែលធ្វើឱ្យប៉ះពាល់ដល់សោភ័ណភាពក៏ដូចជាសណ្តាប់ធ្នាប់សាធារណៈ ។ ជាពិសេសបញ្ហាសុវត្ថិភាព ដូចជាទុស្សេចរន្តភ្លើង និងមានបញ្ហាអគ្គិភ័យកើតឡើងម្តងៗ គឺអាជ្ញាធរមានការលំបាកក្នុងការគ្រប់គ្រង ទើបរដ្ឋបាលរាជធានីភ្នំពេញ សម្រេចកាត់ទម្លាក់ប្រព័ន្ធខ្សែទាំងនោះឱ្យចូលទៅក្រោមដីវិញ ។
លោក ម៉េត មាសភក្តី បានឱ្យដឹងទៀតថា ដោយទទួលបានការឯកភាពពីគណៈរដ្ឋមន្ត្រី អាជ្ញាធររាជធានីភ្នំពេញ បាននិងកំពុងកាត់ប្រព័ន្ធខ្សែភ្លើង និងខ្សែកាប តាមមហាវិថីធំៗចំនួន៦ខ្សែ គឺមហាវិថីព្រះនរោត្តម មហាវិថីព្រះមុនីវង្ស មហាវិថីសហពន្ធ័រុស្ស៊ី មហាវិថីម៉ៅសេទុង មហាវិថីកម្ពុជាក្រោម និងមហាវិថីព្រះសីហនុ ដែលអនុវត្តដោយអង្គភាពចំនួន៤ គឺអង្គភាពទូរគមនាគមន៍ ក្រុមហ៊ុនស៊ីហ្វុក ក្រុមហ៊ុនភីភីស៊ីធីវី និងអង្គការចៃកា ដែលពាក់ព័ន្ធជាមួយប្រព័ន្ធចរាចរណ៍ ។ លោកបន្តថា ការងារនេះបានចាប់ផ្តើមតាំងពីឆ្នាំ២០១៦ គឺទុករយៈពេលដើម្បីឱ្យក្រុមហ៊ុនឯកជន ស្ថាប័នរដ្ឋ និងក្រុមហ៊ុនខ្សែកាបផ្សេងៗទាំងនោះកាត់ទម្លាក់ចូលទៅក្នុងដីដោយខ្លួនឯង ។
ជាក់ស្តែង ចំពោះការងារកាត់ខ្សែទទឹងផ្លូវ រហូតមកដល់ពេលនេះបានរួចរាល់ទាំង៦ផ្លូវហើយ ប៉ុន្តែសម្រាប់តាមបណ្តោយផ្លូវវិញ គឺមហាវិថីព្រះនរោត្តមអនុវត្តបាន១០០%ហើយ ។ ពេលនេះកំពុងដំណើរការតាមបណ្តោយមហាវិថីសហព័ន្ធរុស្ស៊ី ចាប់ពីស្តុបកាណាឌីយ៉ាដល់ផ្លូវលេខ២០០៤ និងមហាវិថីព្រះមុនីវង្ស ចាប់ពីរង្វង់មូលកួចកាណុងរហូតដល់ស្តុប៤២ជាន់ និងបន្តរហូតដល់ស្ពានអាកាសក្បាលថ្នល់ ។ ចំណែកឯផ្លូវ៣ខ្សែទៀត នឹងអនុវត្តបន្តបន្ទាប់គ្នាទៅតាមផែនការដែលមាននៅក្នុងសេចក្តីជូនដំណឹងជាផ្លូវការកាលពីពេលកន្លងមក ។
លោក ម៉េត មាសភក្តី បានបញ្ជាក់ថា ផែនការនៃការកាត់ទម្លាក់ប្រព័ន្ធខ្សភ្លើង ខ្សែកាប និងខ្សែទូរស័ព្ទសម្រាប់ជំហានទី១ចំនួនផ្លូវ៦ខ្សែនោះ តាមគម្រោងនឹងត្រូវបញ្ចប់នៅចុងឆ្នាំ២០១៨នេះតែម្តង ។ គួរកត់សម្គាល់ថា នៅតាមដងផ្លូវក្នុងរាជធានីភ្នំពេញនាពេលបច្ចុប្បន្ននេះ គេសង្កេតឃើញភាពអនាធិបតេយ្យនៃការតភ្ជាប់បណ្តាញអគ្គិសនី ប្រព័ន្ធខ្សែកាប ខ្សែទូរស័ព្ទពុំមានសណ្តាប់ធ្នាប់នោះទេ គឺចេះតែតភ្ជាប់ចងបន្តោងគ្នារយីងរយោង ឬធ្លាក់រប៉ាត់រប៉ាយ ដែលបង្កឱ្យបាត់បង់សោភ័ណភាព និងសណ្តាប់ធ្នាប់សាធារណៈ ។ មិនតែប៉ុណ្ណោះ មានពេលខ្លះរថយន្តបើកទាក់ ឬកៀរដាច់រាប់មិនអស់ ដែលបញ្ហានេះប្រជាពលរដ្ឋក៏ត្រូវតែចូលរួមជាមួយអាជ្ញាធរ ក្នុងការទប់ស្កាត់ភាពអនាធិបតេយ្យនេះ ដើម្បីទីក្រុងរបស់យើងទាំងអស់គ្នា ៕
ចែករំលែកព័តមាននេះ