ខេត្តកំពត ៖ មានហេតុគ្រោះថ្នាក់ចរាចរដ៏រន្ធត់មួយបានកើតឡើងកាលពីវេលាម៉ោង០៩និង១០នាទីយប់ ថ្ងៃទី០៣ ខែឧសភា ឆ្នាំ២០១៨ លើកំណាត់ផ្លូវលេខ៧៣៥ ត្រង់ចំណុចមុខសាខាកាកបាទក្រហមខេត្ត ស្ថិតក្នុងភូមិ១ឧសភា ឃុំ-ស្រុកកំពង់កណ្តាល ក្រុងកំពត ។
រថយន្តបង្កឡើងជារថយន្តកូរ៉េចំណុះ១តោន ពណ៌ស ពាក់ផ្លាកលេខ ភ្នំពេញ ១AI-១៤៤៥ បើកបរដោយឈ្មោះ នៅ ឌីណា ភេទប្រុស អាយុ៣០ឆ្នាំ មានទីលំនៅភូមិទួលមាស ឃុំអារីយ៍ក្សត្រ ស្រុកល្វាឯម ខេត្តកណ្តាល បើកបរក្នុងទិសដៅពីត្បូងទៅជើងក្នុងស្ថានភាពស្រវឹងហើយបានទៅបុកម៉ូតូម៉ាកសេ១២៥ ពណ៌ខ្មៅ ពាក់ផ្លាកលេខ កំពត ១G-៨៨៨៥ បើកបរដោយឈ្មោះ សាង បូរី ភេទប្រុស អាយុ៣៧ឆ្នាំ ក្នុងទិសដៅពីជើងទៅត្បូងដោយមានដឹកមនុស្ស៣នាក់ពីក្រោយផង ។
សមត្ថកិច្ចនគរបាលចរាចរក្រុងកំពតបានឲ្យដឹងថា មុនពេលកើតហេតុខ្លួនបានចូលទៅផឹកស្រាបៀរអស់ចំនួន៤កំប៉ុងផឹកជាមួយជាងសំណង់ម្នាក់ដែលធ្លាប់ស្គាល់គ្នានៅពេលខ្លួនផឹកអស់៤កំប៉ុងចាប់ផ្តើមស្រវឹងក៏ ឈប់ផឹកហើយបែកគ្នាជាងសំណង់នោះក៏ចេញទៅផ្ទះ ចំណែកខ្លួនបានបើករថយន្តមកការដ្ឋានវិញ ។ លុះដល់ការដ្ឋានបានមួយសន្ទុះខ្លួនក៏គិតថាទៅភ្នំពេញទាំងយប់ដើម្បីទៅហៅកម្មករមកធ្វើការនៅក្នុងការដ្ឋានដែលខ្លួនកំពុងធ្វើនេះនៅពេលបើករថយន្តមកដល់ចំណុចខាងលើក៏ជួបហេតុការគ្រោះថ្នាក់បុកម៉ូតូនេះតែម្តងទៅ ។
ប្រភពពីសមត្ថកិច្ចដដែលបានឲ្យដឹងថា ក្រោយពីកើតហេតុអ្នកបើកបររូបនេះពុំបានឈប់រថយន្តនោះទេគឺបានបើកបំរុងរត់គេចខ្លួន ប៉ុន្តែដោយមានកម្លាំងម៉ូតូសាច់ញាតិជនរងគ្រោះដេញតាមពីក្រោយបន្ទាប់មកម៉ូតូសមត្ថកិច្ចក៏ដេញតាមដែរទើបរថយន្តបង្កបើករត់ទៅតាមផ្លូវជាតិលេខ៣ កំពត-ខេត្តព្រះស៊ីហនុ លុះដល់ចំណុចស្ពាន BCI រថយន្តបង្កដោយសារតែបើកល្បឿនលឿនផងហើយដាច់ភ្លើងហ្វាទៀតក៏បុកបង្គោលចរាចរក្បែរបង្កាន់ដៃស្ពានរួចរថយន្តរត់ក្រៅស្ពានផ្លោះលើទឹកព្រែកទៅក្រឡាប់ផ្ងារជើងបួននៅត្រើយម្ខាងទៀតទើបទៅមុខលែងរួច ហើយកម្លាំងសមត្ថកិច្ចក៏បាននាំគ្នាគាស់យកអ្នកបើកបរចេញពីក្នុងកាប៊ីនរថយន្តរួចនាំទៅកាន់អធិការក្រុងកំពតទាំងយប់ដើម្បីឲ្យផុតពីការមានកំហឹងរបស់សាច់ញាតិជនរងគ្រោះ ។
ប្រភពបានបន្តថា ជនរងគ្រោះទាំង៤នាក់មានទី១-ឈ្មោះ សាង បូរី ភេទប្រុស អាយុ៣៧ឆ្នាំ អ្នកបើកបរ មានទីលំនៅភូមិ១ឧសភា សង្កាត់កំពង់កណ្តាល ក្រុងកំពត ខេត្តកំពត (របួសធ្ងន់), ទី២-ឈ្មោះ ចាន់ រតនា ភេទស្រី អាយុ៣៧ឆ្នាំ របួសធ្ងន់, ទី៣-ឈ្មោះ វុទ្ធី រ៉ាត់បញ្ញាស័ក ភេទប្រុស អាយុ៦ឆ្នាំ របួសធ្ងន់ និងទី៤-ឈ្មោះ វុទ្ឋី រ៉ាត់សូនីតា ភេទស្រី អាយុ៣ឆ្នាំ (ស្លាប់) ជនរងទាំង៤នាក់មានទីលំនៅភូមិ១ឧសភា សង្កាត់កំពង់កណ្តាល ក្រុងកំពត ។ ចំណែកអ្នកបើកបរត្រូវបានសមត្ថកិច្ចឃាត់ខ្លួនទៅធ្វើការសាកសួរនៅអធិការដ្ឋាននគរបាលក្រុងកំពតដើម្បីកសាងសំណុំរឿងអនុវត្តតាមនីតិវិធី ៕
ចែករំលែកព័តមាននេះ