សារព័ត៌មានបរទេសកាលពីពេល ថ្មីៗកន្លងមកផ្សាយថា ភូមិមួយស្ថិតនៅក្នុងល្អាងជ្រៅជាងកម្រិតនីវ៉ូទឹកសមុទ្រ១.៨០០ម៉ែត្របានក្លាយជាភូមិនៅក្នុងល្អាង ។ អ្នកភូមិមានសេចក្ដីសុខដោយការរស់នៅបែបបុរាណ ។ ក្នុងល្អាងគ្មានពន្លឺថ្ងៃ និងព្យុះភ្លៀងទេ ។
ភូមិនោះស្ថិតនៅខេត្តគុយចូវ ប្រទេសចិន។ អ្នករស់នៅក្នុងល្អាងជាមនុស្សរស់ក្នុងល្អាងចុងក្រោយរបស់ចិន ដោយរស់នៅតាមបែបបុរាណ ខណៈនៅខាងក្រៅសង្គមមនុស្សពោរពេញដោយការអភិវឌ្ឍន៍ ។ ភូមិនេះស្ថិតនៅក្នុងល្អាងជ្រៅ ប៉ុន្តែពួកគេបានសង់ផ្ទះ និងរស់នៅក្នុងជម្រៅពី៥០ទៅ១០០ម៉ែត្រពីមាត់ល្អាង ។ នៅបរិវេណច្រកចូលភូមិមានសភាពស្ងប់ស្ងាត់ ប៉ុន្តែមានឮសំឡេងសត្វដែលអ្នកស្រុកចិញ្ចឹម និងពេលខ្លះក៏ឮសំឡេងយន្តហោះ ។
ភូមិនោះទើបបានទទួលការអភិរក្ស ហើយអាជ្ញាធរបានជួយកែលំអ និងជួសជុលផ្ទះរបស់អ្នកភូមិឲ្យមានភាពល្អប្រសើរឡើង ។
បច្ចុប្បន្នប្រជាជននៅក្នុងភូមិមានប្រហែល៧០នាក់ ភាគច្រើនជាជនអំបូរ«ម៉ុង» មាន១៨គ្រួសាររស់នៅរួមគ្នានៅក្នុងល្អាង ។ អាជីពរបស់ពួកគេភាគច្រើនគឺចិញ្ចឹមសត្វ និងធ្វើកសិកម្ម ។ ជារៀងរាល់សប្ដាហ៍ពួកគេបានយកផលិតផលទៅលក់នៅទីផ្សារមានចម្ងាយប្រហែល១៥គីឡូម៉ែត្រពីភូមិ ។
បច្ចុប្បន្នទើបមានអគ្គិសនីប្រើប្រាស់ និងមានទូរទស្សន៍ ហើយអ្នកភូមិមានសេចក្ដីសុខ ដោយមិនចាំបាច់ពឹងផ្អែកលើបច្ចេកវិទ្យា ឬពន្លឺថ្ងៃទេ ប៉ុន្តែស្ថានភាពជីវិតទាំងនៅពេលថ្ងៃ និងយប់គឺជារឿងធម្មតារបស់ពួកគេ ៕
ចែករំលែកព័តមាននេះ