ទីក្រុងរ៉ង់ហ្គូន៖ ថ្មីៗនេះ យោធាមីយ៉ាន់ម៉ារបស់លោកមីនអុងឡាំងបើកយុទ្ធនាការវាយប្រហារយ៉ាងសន្ធាប់ទៅលើមន្ទីរពេទ្យធំមួយកន្លែងនៅភាគខាងលិចបណ្ដាលឱ្យស្លាប់មនុស្ស៣១នាក់ និងរបួសជិត៧០នាក់។ ខាងលើនេះជាការអះអាងរបស់ក្រុមឧទ្ទាមដែលប្រឆាំងនឹងរបបសឹក។ យន្តហោះរបស់មីយ៉ាន់ម៉ាបានទម្លាក់គ្រាប់បែកទៅលើមន្ទីរពេទ្យនៅខេត្តរ៉ាក់ខាញភាគខាងលិច។ នេះបើយោងតាមការអះអាងរបស់លោកឃីនធូខា (Khine Thu Kha) ជាអ្នកនាំពាក្យរបស់កងទ័ពអារ៉ាខាន់ (Arakan)។
អ្នកនាំពាក្យរូបនេះថ្លែងបន្តទៀតថាមន្ទីរពេទ្យនោះត្រូវបានបំផ្លាញទាំងស្រុង។ លោកពន្យល់ថាមូលហេតុដែលហេតុការណ៍នេះសម្លាប់មនុស្សច្រើនដល់ថ្នាក់នេះព្រោះគ្រាប់បែកបានធ្លាក់ចំពីលើមន្ទីរពេទ្យតែម្ដង។ មន្ទីរពេទ្យនេះមានគ្រែចំនួនបីរយសម្រាប់ទទួលអ្នកជំងឺ។ នៅពេលទម្លាក់គ្រាប់បែកនោះ អ្នកជំងឺសម្រុកទៅព្យាបាលនៅក្នុងមន្ទីរពេទ្យនោះព្រោះមន្ទីរពេទ្យដទៃទៀតនៅរដ្ឋរ៉ាក់ខាញបានបិទទ្វារអស់ហើយ។
គិតត្រឹមវេលាព្រឹកមិញ គេឃើញថាមន្ទីរពេទ្យខ្ទេចទាំងស្រុង ដំបូលបាក់រាបដល់ដី សសរ និងធ្នឹមអគារមន្ទីរពេទ្យបែកបាក់គ្មានសល់រ។ សាកសពមនុស្សរាយប៉ាយពាសពេញបរិវេណមន្ទីរពេទ្យ។ នេះបើយោងតាមរូបថតជាច្រើនសន្លឹកដែលអ្នកនាំពាក្យក្រុមឧទ្ទាមបង្ហោះនៅលើបណ្ដាញសង្គម។ គាត់ប្រាប់ទីភ្នាក់ងារអាអែហ្វប៉េថាសភាពការណ៍អាក្រក់បំផុត។ យើងអាចបញ្ជាក់បានថាមនុស្ស៣១នាក់ស្លាប់។
ចំនួនអ្នកស្លាប់អាចនឹងច្រើនជាងនេះនៅពេលគេប្រមូលបានសាកសពជនរងគ្រោះបន្ថែមទៀត។ មនុស្ស៦៨នាក់រងរបួស។ អ្នករស់នៅម្ដុំនោះប្រាប់ថាគ្រាន់តែស្ដាប់ឮសំឡេងផ្ទុះគ្រាប់បែកភ្លាម ខ្លួនក៏ស្ទុះវឹងទៅកន្លែងកើតហេតុ។ ទៅដល់ឃើញអគារមន្ទីរពេទ្យឆេះនៅក្នុងភ្លើងសន្ធោសន្ធៅ និងឃើញសាកសពមនុស្សរាយប៉ាយពាសពេញបរិវេណនោះ។ នេះបើយោងតាមការផ្សាយរបស់អាល់ចាស៊ីរ៉ា (al Jazeera) និងប្រភពដទៃទៀត៕
ចែករំលែកព័តមាននេះ