លោក អានុទីន ថានឹងសន្ទនាតាមទូរស័ព្ទជាមួយលោក ត្រាំ នៅយប់នេះ ជុំវិញរឿងជម្លោះព្រំដែនកម្ពុជា និងថៃ
ទីក្រុងបាងកក ៖ នាយករដ្ឋមន្ត្រីចាំផ្ទះប្រទេសថៃ លោក អានុទីន ចាន់វីរៈគុល (Anutin Charnvirakul) នៅព្រឹកថ្ងៃទី១២ ខែធ្នូ…
ទីក្រុងបាងកក ៖ នាយករដ្ឋមន្ត្រីចាំផ្ទះប្រទេសថៃ លោក អានុទីន ចាន់វីរៈគុល (Anutin Charnvirakul) នៅព្រឹកថ្ងៃទី១២ ខែធ្នូ ឆ្នាំ២០២៥ បានអះអាងថា លោកគ្រោងនឹងសន្ទនាតាមទូរស័ព្ទនិយាយជាមួយប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) នៅយប់នេះ ខណៈដែលការប៉ះទង្គិចគ្នាតាមព្រំដែនរវាងកម្ពុជា និងថៃបានបន្តដល់ថ្ងៃទី ៥ ។ នេះបើយោងតាមប្រភពពីទីភ្នាក់ងារសារព័ត៌មាន Reuters បានចេញផ្សាយ។
លោក អានុទីន បានប្រាប់បណ្តាអ្នកយកព័ត៌មានថា ការហៅទូរស័ព្ទជាមួយលោក ត្រាំ នឹងធ្វើឡើងនៅម៉ោងប្រហែល ០៩ និង ២០ នាទីយប់ថ្ងៃទី១២ ខែធ្នូ ឆ្នាំ២០២៥នេះ (ម៉ោងក្នុងស្រុក)។
លោក ត្រាំ ចង់ធ្វើអន្តរាគមន៍ម្តងទៀត ដើម្បីបញ្ឈប់ការបាញ់ប្រហារគ្នា និងជួយស្តារបទឈប់បាញ់ឡើងវិញ ដែលលោកបានសម្របសម្រួលកាលពីដើមឆ្នាំនេះ ដោយសន្យាថា នឹងហៅទូរស័ព្ទទៅកាន់មេដឹកនាំកម្ពុជា និងថៃ ដើម្បីធ្វើការអំពាវនាវឱ្យបញ្ឈប់ការបាញ់ប្រហារគ្នា។
គួររំលឹកថា កាលពីយប់ថ្ងៃទី១១ ខែធ្នូ កន្លងទៅ លោក ត្រាំ បានបង្ហាញពីសមត្ថភាពរបស់លោកជាអ្នកបង្កើតសន្តិភាពសកល ព្រមទាំងមានជំនឿចិត្តថា លោកនឹងធ្វើឱ្យបទឈប់បាញ់រវាងកម្ពុជា និងថៃ វិលមករកផ្លូវត្រូវឡើងវិញ។ លោកបាននិយាយថា «យើងបានដោះស្រាយសង្គ្រាមចំនួន ៨ ហើយ។ សូមគិតអំពីវា។ សង្គ្រាមចំនួន ៨ ត្រូវបានដោះស្រាយហើយ សង្គ្រាមមួយផ្ទុះឡើងជាថ្មី (កម្ពុជា និងថៃ) ហើយខ្ញុំនឹងពន្លត់អណ្តាតភ្លើងនៃសង្គ្រាម។ ខ្ញុំបានបញ្ឈប់វា ប៉ុន្តែយើងនឹងបញ្ឈប់វាជាថ្មីម្ដងទៀត»។
សូមជម្រាបថា លោក អានុទីន បានសម្រេចរំលាយសភា កាលពីយប់ថ្ងៃទី១១ ខែធ្នូ កន្លងទៅ ព្រមទាំងបានផ្ញើសារថា ផ្ដល់អំណាចទៅឱ្យប្រជាជនវិញ។ ជាមួយគ្នានោះ ប្រទេសថៃត្រូវរៀបចំការបោះឆ្នោតក្នុងរយៈពេលពី ៤៥ថ្ងៃ ទៅ ៦០ថ្ងៃ ក្រោយមហាក្សត្រថៃ បានយល់ព្រមតាមសំណើរំលាយសភា៕ ប្រភព ៖ Reuters និង The Guardian
ចែករំលែកព័តមាននេះ