រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជា លោក សុខ ឥសានបានអះអាងទោះបីជាអតីតគណបក្សសង្គ្រោះជាតិចង់ចូលរួមបោះឆ្នោតជ្រើសតាំងអ្នកតំណាងរាស្ត្រនៅពេលខាងមុខយ៉ាងណា ក្តីក៏មិនអាចបានជាដាច់ខាត ។ ការអះអាងរបស់អ្នកនាំពាក្យគណបក្សប្រជាជន បន្ទាប់ពីរអតីតគណបក្សសង្គ្រោះជាតិបានចេញសេចក្តីថ្លែងការណ៍ប្រកាន់ជំហរថា…
រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជា លោក សុខ ឥសានបានអះអាងទោះបីជាអតីតគណបក្សសង្គ្រោះជាតិចង់ចូលរួមបោះឆ្នោតជ្រើសតាំងអ្នកតំណាងរាស្ត្រនៅពេលខាងមុខយ៉ាងណា ក្តីក៏មិនអាចបានជាដាច់ខាត ។
ការអះអាងរបស់អ្នកនាំពាក្យគណបក្សប្រជាជន បន្ទាប់ពីរអតីតគណបក្សសង្គ្រោះជាតិបានចេញសេចក្តីថ្លែងការណ៍ប្រកាន់ជំហរថា ត្រៀមចូលរួមបោះឆ្នោតនៅពេលខាងមុខនេះដោយស៊េរីត្រឹមត្រូវ និងយុត្តិធម៌ ។
លោក សុខ ឥសានបានឲ្យដឹងនៅថ្ងៃទី០៤ ខែឧសភា ឆ្នាំ២០១៨ថា ចង់ចូលរួមបោះឆ្នោតម្ត៉េចបាន ។ អតីតមេបក្សប្រឆាំងដែលជាទណ្ឌិតកំពុងត្រូវបានតុលាការតាមចាប់ខ្លួនយកមកផ្តន្ទាទោសតាមអំណាចសាលក្រមស្ថាពរនោះបានចេញរបស់ដែលហៅថា សេចក្តីថ្លែងការណ៍ចង់ឲ្យមានដំណោះស្រាយនយោបាយ និងចូលរួមការបោះឆ្នោតជ្រើស តាំងតំណាងរាស្ត្រនាចុងខែកក្កដាខាងមុខនេះ ។
លោកបញ្ជាក់ថា «ទោះបីមានការចង់បានយ៉ាងណាក៏មិនអាចបានជាដាច់ខាតដោយសារអតីតបក្សប្រឆាំងត្រូវបានតុលាការកំពូលកាត់សេចក្តីរំលាយចោលជាស្ថាពររួចហើយ និងមានសាដីកាស្ថាពរបិទផ្លូវតវ៉ា និងចូលជាធរមានតាំងពីថ្ងៃទី១៦ ខែវិច្ឆិកា ឆ្នាំ២០១៧ រួចហើយ ។ អតីតបក្សប្រឆាំងអត់មាននីតិសម្បទាក្នុងការធ្វើសកម្មភាពនយោបាយ និងសកម្មភាពនានាដូចគណបក្សដទៃទេ ។
លោកក៏បានលើកឡើងថា ក្រុមមេដឹកនាំចំនួន១១៨ នាក់នៃអតីតបក្សប្រឆាំងត្រូវបានផ្អាកសកម្មភាពនយោបាយដោយតុលាការកំពូលរយៈពេល៥ឆ្នាំ រួចហើយ និងជាធរមាន ។ បញ្ហាពាក់ព័ន្ធនឹងអតីតៈបក្សប្រឆាំង គឺជារឿងផ្លូវច្បាប់ ។ ដូច្នេះគ្មានទេរឿងចរចានយោបាយ ដើម្បីបានរួចខ្លួននោះ ។
លោកគូសបញ្ជាក់ថា «ដូច្នេះ គ្មានមុខអតីតៈបក្សប្រឆាំងនៅក្នុងការបោះឆ្នោតនាពេលខាងមុខឆាប់ៗនេះជាដាច់ខាត ទោះបីមានសេចក្តីថ្លែងការណ៍ប៉ុន្មានក៏អត់ប្រយោជន៍ដែរ» ។
ការលើកឡើងរបស់អ្នកនាំពាក្យគណបក្សប្រជាជនកម្ពុជានេះបន្ទាប់ពីអតីតគណបក្សសង្គ្រោះជាតិបានសេចក្តីថ្លែងការណ៍កាលពីថ្ងៃទី០៣ ខែឧសភានេះបានបញ្ជាក់ជំហរថា គណបក្សនៅតែគោរពយ៉ាងម៉ឺងម៉ាត់តាមឆន្ទៈរបស់ប្រជាជពលរដ្ឋម្ចាស់ឆ្នោតដោយទទូចឲ្យមានការដោះស្រាយនយោបាយ ដើម្បីឲ្យមានការបង្រួមបង្រួមជាតិ និងឯកភាពជាតិ ហើយនឹងត្រៀមខ្លូនជានិច្ចចូលរួមប្រកួតប្រជែងក្នុងការបោះឆ្នោតដោយស៊េរីត្រឹមត្រូវ និងយុត្តិធម៌ នៅពេលខាងមុខនេះ ។
ថ្លែងការណ៍បញ្ជាក់ថា « ថ្នាក់ដឹកនាំគណបក្សសង្គ្រោះជាតិទាំងអស់នៅតែរក្សាស្មារតី សាមគ្គីភាព រួបរួមគ្នាយ៉ាងរឹងមាំជុំវិញគណបក្សមិនមានការពាក់ព័ន្ធជាមួយគណបក្សដទៃ ឬបុគ្គលដែលទៅបង្កើតគណបក្សនយោបាយផ្សេងឡើយ » ៕
ចែករំលែកព័តមាននេះ