ខេត្តមណ្ឌលគិរី ៖ លោក វុធ សារុំ នាយកដែនជម្រកសត្វព្រៃភ្នំណាមលៀបានឲ្យដឹងកាលពីថ្ងៃទី០៤ ខែមេសា ឆ្នាំ២០១៨ ថានាពេលឆាប់ៗខាងមុខនេះដែនជម្រកសត្វព្រៃភ្នំណាមលៀ នឹងមានកសិដ្ឋានចិញ្ចឹមជ្រូកធម្មជាតិមួយកន្លែង…
ខេត្តមណ្ឌលគិរី ៖ លោក វុធ សារុំ នាយកដែនជម្រកសត្វព្រៃភ្នំណាមលៀបានឲ្យដឹងកាលពីថ្ងៃទី០៤ ខែមេសា ឆ្នាំ២០១៨ ថានាពេលឆាប់ៗខាងមុខនេះដែនជម្រកសត្វព្រៃភ្នំណាមលៀ នឹងមានកសិដ្ឋានចិញ្ចឹមជ្រូកធម្មជាតិមួយកន្លែង ដោយមានការថែទាំពីមន្ត្រីឧទ្យានុរក្ស ដើម្បីជួយលើកស្ទួយកម្រិតជីវភាពរស់នៅរបស់សហគមន៍តំបន់ការពារធម្មជាតិដែលមានការជួយ ជ្រោមជ្រែង ពីក្រសួងបរិស្ថាន ។
នាយកដែនជម្រកសត្វព្រៃភ្នំណាមលៀបន្តថា បន្ទាប់ពីក្រុមការងារក្រសួងបរិស្ថានដឹកនាំដោយឯកឧត្តម ខៀវ បូរិន អគ្គនាយកនៃអគ្គនាយកដ្ឋានសហគមន៍មូលដ្ឋាននៃក្រសួងបរិស្ថានបានចុះសិក្សាលទ្ធភាពជ្រើសរើសទីតាំងផលិតកូនជ្រូកពូជជនជាតិភាគតិចនៅស្នាក់ការអភិរក្សនៃដែនជម្រកសត្វព្រៃភ្នំណាមលៀ ដែលស្ថិតក្នុងស្រុកពេជ្រាដា ខេត្តមណ្ឌលគិរី កាលពីថ្ងៃទី០៣ ខែឧសភា ឆ្នាំ២០១៨ ។
លោកវុធ សារុំ បន្តថា ដែនជម្រកសត្វព្រៃភ្នំណាមលៀ ពិតជារីករាយចំពោះគម្រោងចិញ្ចឹមជ្រូកពូជនេះ ហើយមន្ដ្រីឧទ្យានុរក្សក៏បានប្តេជ្ញាចូលរួមអនុវត្តន៍គម្រោងនេះ ឱ្យបានជោគជ័យសម្តៅបង្កើនប្រាក់ចំណូលក្នុងគ្រួសារ និងជីវភាពប្រចាំថ្ងៃរបស់មន្ត្រីឧទ្យានុរក្ស ព្រមទាំងជួយលើកស្ទួយកម្រិតជីវភាពរបស់ប្រជាសហគមន៍រស់នៅក្នុងតំបន់នោះផងដែរ ។
លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរីមានប្រសាសន៍ថា មន្ទីរបានឯកភាព និងគោលការណ៍របស់ឯកឧត្តមរដ្ឋមន្ត្រី ហើយមន្ទីរមានផែនការពង្រីកការចិញ្ចឹមជ្រូកសម្រាប់ដែនជម្រកសត្វព្រៃទាំងប្រាំក្នុងខេត្ត និងសហគមន៍ ។
លោកថា ការបង្កើតកសិដ្ឋានចិញ្ចឹមជ្រូកនេះនឹងជួយដល់ជីវភាពរបស់ប្រជាសហគមន៍នឹងមន្ត្រីឧទ្យានុរក្សបានយ៉ាងប្រសើរ ហើយក៏បម្រើឲ្យវិស័យទេសចរណ៍ផងដែរ ដោយសារបច្ចុប្បន្ននេះទីផ្សារជ្រូកជនជាតិមានតម្រូវការនឹងតម្លៃខ្ពស់នាពេលបច្ចុប្បន្ន ៕
ចែករំលែកព័តមាននេះ