ទីក្រុងវ៉ាស៊ីនតោន ៖ មន្ត្រីជាន់ខ្ពស់របស់សហរដ្ឋអាមេរិកនឹងធ្វើដំណើរទៅកាន់ប្រទេសចិន ដើម្បីចូលរួមការចរចាទាក់ទងនឹងការដោះស្រាយជម្លោះពាណិជ្ជកម្ម ។ ពួកគេមានក្តីសង្ឃឹមថា នឹងអាចស្វែងរកដំណោះស្រាយមួយបាន ប៉ុន្តែបញ្ហានេះមានភាពស្មុគស្មាញណាស់ ។
ប្រសិនបើពួកគេមិនយល់ស្របលើដំណោះស្រាយណាមួយបានក្នុងការការពារសិទ្ធិកម្មសិទ្ធិបញ្ញាទេនោះ ពន្ធលើផលិតផលចិនប្រមាណ៥០ប៊ីលានដុល្លារនឹងមានប្រសិទ្ធភាព ចាប់ពីថ្ងៃទី២២ ខែឧសភា ខាងមុខនេះ។ ប្រទេសចិនក៏អាចនឹងឆ្លើយតបវិញដោយការដាក់ពន្ធលើផលិតផលអាមេរិកផងដែរ ហើយអាចប៉ះពាល់ដល់សេដ្ឋកិច្ចពិភពលោកទាំងមូល ។
គួរបញ្ជាក់ថា កាលពីចុងខែមីនា លោកប្រធានាធិបតីអាមេរិក ដូណាល់ ត្រាំ បានប្រកាសពីការដាក់ពន្ធលើប្រទេសចិន ដោយលោកចោទប្រកាន់ថា ចិនបានលួចយកបច្ចេកវិទ្យា និងជំនាញរបស់អាមេរិក ។
លោក Robert Lighthizer អ្នកតំណាងពាណិជ្ជកម្មអាមេរិក បាននិយាយថា បញ្ហាទាំងនេះពិតជាធ្ងន់ធ្ងរណាស់ ព្រោះសកម្មភាពមួយចំនួនដូចជា ការបង្ខំឲ្យផ្ទេរបច្ចេកវិទ្យា និងការលួចបច្ចេកវិទ្យា គឺប៉ះពាល់ដល់សមត្ថភាពរបស់សហរដ្ឋអាមេរិក ក្នុងការរៀបចំខ្លួនសម្រាប់សេដ្ឋកិច្ចនាពេលអនាគត ។ លោកថា ៖« ចិនកំពុងតែប្រើប្រាស់ច្បាប់របស់ខ្លួនដើម្បីយកបច្ចេកវិទ្យា ដោយមិនចាំបាច់ចំណាយប្រាក់អ្វីទាំងអស់ » ។
នាថ្ងៃព្រហស្បតិ៍ និងសុក្រ លោកនឹងធ្វើដំណើរទៅកាន់ប្រទេសចិន ជាមួយប្រធានរតនាគារ លោក Steven Mnuchin, រដ្ឋមន្ត្រីពាណិជ្ជកម្ម លោក Wilbur Ross, ទីប្រឹក្សាសេដ្ឋកិច្ចរបស់ White House លោក Peter Navarro និងលោក Larry Kudlow ដើម្បីជួបជាមួយភាគីប្រទេសចិន ។
យោងតាមភ្នាក់ងារសារព័ត៌មានក្នុងប្រទេសចិនបានឲ្យដឹងថា លោកឧបនាយករដ្ឋមន្ត្រី Liu He នឹងដឹកនាំភាគីខាងប្រទេសចិន ក្នុងជំនួបចរចានេះ ៕
ចែករំលែកព័តមាននេះ