ទីក្រុងបាងកក ៖ ឧស្សាហកម្មទេសចរណ៍របស់ប្រទេសថៃ កំពុងត្រៀមប្រឈមមុខនឹងការធ្លាក់ចុះសេដ្ឋកិច្ច ខណៈដែលជម្លោះឡើងវិញជាមួយកម្ពុជាបានរំខានដល់រដូវកាលទេសចរណ៍ដ៏សំខាន់របស់ថៃ ដោយបណ្តាអាជីវកម្មក្នុងស្រុកបានព្រមានអំពីការខាតបង់កាន់តែធ្ងន់ធ្ងរ ស្របពេលមានការព្រមានការធ្វើដំណើរដោយប្រទេសមួយចំនួន។ នេះបើតាមប្រភពពីកាសែតថៃ Khaosod ចេញផ្សាយនៅថ្ងៃទី១១…
ទីក្រុងបាងកក ៖ ឧស្សាហកម្មទេសចរណ៍របស់ប្រទេសថៃ កំពុងត្រៀមប្រឈមមុខនឹងការធ្លាក់ចុះសេដ្ឋកិច្ច ខណៈដែលជម្លោះឡើងវិញជាមួយកម្ពុជាបានរំខានដល់រដូវកាលទេសចរណ៍ដ៏សំខាន់របស់ថៃ ដោយបណ្តាអាជីវកម្មក្នុងស្រុកបានព្រមានអំពីការខាតបង់កាន់តែធ្ងន់ធ្ងរ ស្របពេលមានការព្រមានការធ្វើដំណើរដោយប្រទេសមួយចំនួន។ នេះបើតាមប្រភពពីកាសែតថៃ Khaosod ចេញផ្សាយនៅថ្ងៃទី១១ ខែធ្នូ ឆ្នាំ២០២៥។
ជម្លោះព្រំដែនបានបង្ខំឱ្យបិទចំណុចត្រួតពិនិត្យពាណិជ្ជកម្មសំខាន់ៗ និងជំរុញឱ្យជម្លៀសប្រជាជននៅតាមព្រំដែន ដោយបង្កើនការព្រួយបារម្ភអំពីទាំងប្រាក់ចំណូលទេសចរណ៍ភ្លាមៗ និងទំនុកចិត្តអ្នកវិនិយោគរយៈពេលវែង។
នាយករដ្ឋមន្ត្រីថៃ លោក អនុទីន ចាន់វីរៈគុល (Anutin Charnvirakul) បានបដិសេធការចរចាជាមួយកម្ពុជា ដោយទទួលបានការសរសើរពីក្រុមជាតិនិយម ប៉ុន្តែការព្រួយបារម្ភពីសហគមន៍អាជីវកម្មកាន់តែខ្លាំងឡើង ខណៈដែលអំពើហិង្សាកើតឡើង អំឡុងពេលប្រទេសគួរតែរកប្រាក់ចំណេញបានច្រើនបំផុតពីឧស្សាហកម្មទេសចរណ៍។
លោកវេជ្ជបណ្ឌិត ភីផាត លឿងណារូមីតឆៃ ប្រធានសេដ្ឋវិទូក្រុមហ៊ុន Kiatnakin Phatra Financial Group បានលើកឡើងថា ទឹកជំនន់ និងការប៉ះទង្គិចគ្នាកំពុងកើតឡើង នៅពេលរដូវកាលទេសចរណ៍ដ៏មមាញឹក ដែលអាចប៉ះពាល់ដល់ការសម្រេចចិត្តរបស់អ្នកទេសចរក្នុងការធ្វើដំណើរទៅកាន់ប្រទេសថៃ។
ប្រទេសកម្ពុជាមានចំណែក ២ ទៅ ៣% នៃការនាំចេញសរុបរបស់ប្រទេសថៃ ដោយប្រហែល ៧០% ដឹកជញ្ជូនឆ្លងកាត់ព្រំដែនគោក ប៉ុន្តែឥឡូវនេះត្រូវបានបិទទាំងស្រុងដោយជម្លោះ។ មជ្ឈមណ្ឌលស្រាវជ្រាវថៃ Kasikorn បានប៉ាន់ប្រមាណថា ជម្លោះអាចកាត់បន្ថយផលិតផលក្នុងស្រុកសរុប (GDP) ០,៤% បើវាបន្តរហូតដល់ឆ្នាំ ២០២៦។
ខេត្តជាប់ព្រំដែនប្រឈមនឹងផលប៉ះពាល់ធ្ងន់ធ្ងរបំផុត។ ជាក់ស្តែង ខេត្តត្រាត មានកោះរមណីយដ្ឋានដ៏ពេញនិយមចំនួន ៣ ដែលឈានដល់ចំណែក ៩០% នៃការទាក់ទាញភ្ញៀវសម្រាប់ខែធ្នូ ប៉ុន្តែបណ្តាប្រតិបត្តិករបានរាយការណ៍ថា ភ្ញៀវទេសចរបរទេសកំពុងតែរារែកដោយគិតអំពីសុវត្ថិភាពពួកគេ បន្ទាប់ពីសហរដ្ឋអាមេរិកបានចេញការជូនដំណឹងអំពីការហាមប្រាមធ្វើដំណើរសម្រាប់តំបន់ក្នុងរង្វង់ ៥០ គីឡូម៉ែត្រពីព្រំដែន។
លោក សក្តិសិទ្ធិ ម៉ុងកាន (Saksit Mungkarn) ទីប្រឹក្សានៃក្រុមប្រឹក្សាឧស្សាហកម្មទេសចរណ៍ខេត្តត្រាត បានថ្លែងថា រដ្ឋបាលខេត្តត្រូវរង់ចាំរហូតដល់ប្រហែលថ្ងៃទី ២០ ខែធ្នូ ដើម្បីវាស់ស្ទង់ផលប៉ះពាល់ពិតប្រាកដលើការលុបចោលការធ្វើដំណើរ។
បើតាម លោក សោមឆាត ពង្សកាប៉ាណាក្រៃ (Somchat Pongkapanakrai) ប្រធានសភាពាណិជ្ជកម្មភាគឦសានថា តំបន់ព្រំដែនភាគឦសានប្រឈមមុខនឹងភាពតានតឹងបន្ថែម ខណៈដែលបណ្តាអាជីវកម្មខ្នាតតូចដែលត្រៀមខ្លួនស្រេច សម្រាប់ការប្រារព្ធពិធីចូលឆ្នាំសកល ឥឡូវនេះព្រួយបារម្ភអំពីការខាតបង់ ប្រសិនបើជម្លោះនៅតែបន្ត។
យ៉ាងណាមិញ វិធានការសង្គ្រោះដែលត្រូវបានស្នើឡើងសម្រាប់ខេត្តជាប់ព្រំដែនទាំង ៧ របស់ថៃ រួមមានទាំង ការកាត់បន្ថយពន្ធ និងការជំរុញទេសចរណ៍ នៅតែមិនទាន់ត្រូវបានអនុវត្ត បន្ទាប់ពីជាប់គាំង អំឡុងពេលផ្លាស់ប្តូររដ្ឋាភិបាលថ្មីៗថៃ និងវិបត្តិទឹកជំនន់៕ ប្រភព ៖ Khaosod
ចែករំលែកព័តមាននេះ