ទីក្រុងតូក្យូ៖ កូរ៉េខាងត្បូង និងជប៉ុនបញ្ចេញប្រតិកម្មទាំងកំហឹងតបទៅករណីដែលប្រទេសចិន និងរុស្ស៊ីបើកយន្តហោះចម្បាំងធ្វើសមយុទ្ធយោធារួមគ្នានៅពីលើដែនអាកាសប្រទេសទាំង២ (ជប៉ុន និងកូរ៉េខាងត្បូង) ជាហេតុធ្វើឱ្យប្រទេសទាំង២ប្រញាប់ចល័តយន្តហោះចម្បាំងរបស់ខ្លួនយ៉ាងសស្រាក់សស្រាំដើម្បីត្រៀមទប់ទល់។ កូរ៉េខាងត្បូងថ្លែងថាខ្លួនបានបញ្ជូនកំណត់ហេតុតវ៉ាអំពីរឿងនេះតាមរយៈអ្នកតំណាងរបស់ប្រទេសចិន និងរុស្ស៊ី។ ចំណែកជប៉ុនចាត់ទុកថានេះជាបញ្ហាប្រឈមដ៏ធំមួយសម្រាប់សន្តិសុខជាតិរបស់ខ្លួន។
យន្តហោះទម្លាក់គ្រាប់បែកខ្នាតយក្សរបស់រុស្ស៊ីម៉ាកធីយូ៩៥ (Tu-95) ដែលអាចបំពាក់ក្បាលគ្រាប់នុយក្លេអ៊ែរបានហោះចេញពីសមុទ្រជប៉ុនដើម្បីទៅជួបគ្នាជាមួយយន្តហោះទម្លាក់គ្រាប់បែករបស់ប្រទេសចិនម៉ាកអេច៦ (H-6) ដែលរង់ចាំនៅសមុទ្រចិនខាងកើត។ បន្ទាប់មក យន្តហោះរបស់ប្រទេសទាំង២ក៏ចាប់ផ្ដើមធ្វើសមយុទ្ធយោធាជុំវិញប្រទេសជប៉ុន។
គេកត់សម្គាល់ថាការប្រទាំងប្រទើសគ្នានេះកើតឡើងនៅពេលជប៉ុន និងចិននៅតែបន្តមានជម្លោះការទូតជាមួយគ្នាបន្ទាប់ពីនាយករដ្ឋមន្ត្រីជប៉ុនថ្លែងថាត្រៀមកម្លាំងយោធាជួយតៃវ៉ាន់បើសិនកោះនេះរងការវាយប្រហារពីសំណាក់កងទ័ពចិន។ ចិនបានស្នើសុំឱ្យលោកស្រីដកពាក្យសម្ដីដែលបាននិយាយនេះមកវិញ។ ប៉ុន្តែជប៉ុនប្រកាសច្បាស់ៗថាខ្លួនមិនលេបសម្ដីវិញទេ។
ប្រតិកម្មតបទៅនឹងការធ្វើសមយុទ្ធយោធានេះ រដ្ឋមន្ត្រីការពារជាតិជប៉ុនដែលត្រូវជាកូនប្រុសរបស់អតីតនាយករដ្ឋមន្ត្រីកូអ៊ីហ្ស៊ូមីបានបង្ហោះសារនៅលើបណ្ដាញអ៊ិចថាការបើកយន្តហោះទម្លាក់គ្រាប់បែកខ្នាតធំរបស់ប្រទេសទាំង២រំលងដែនអាកាសជប៉ុនជាចេតនាបង្ហាញអំពីកម្លាំងរបស់ពួកគេប្រាប់មកប្រទេសជាតិរបស់យើងយ៉ាងពិតប្រាកដ។
អ្នកនាំពាក្យជប៉ុនថ្លែងថារដ្ឋាភិបាលរបស់ខ្លួនបានជម្រាបជូនប្រទេសចិន និងរុស្ស៊ីតាមរយៈបណ្ដាញការទូតថាយើងបារម្ភអំពីសន្តិសុខជាតិរបស់យើង។ កូរ៉េខាងត្បូងមិនមានទំនាស់អ្វីជាមួយចិនទេ។ ប៉ុន្តែទំនាក់ទំនងរវាងកូរ៉េខាងត្បូង និងរុស្ស៊ីមិនសូវល្អប៉ុន្មានទេព្រោះរុស្ស៊ីជួយផ្ដល់បច្ចេកវិទ្យាឱ្យកូរ៉េខាងជើងផលិតមីស៊ីល និងអាវុធដទៃទៀតប្រឆាំងនឹងទីក្រុងសេអ៊ូល។ ចំណែកកូរ៉េខាងត្បូងផ្ដល់គ្រាប់កាំភ្លើងទៅឱ្យអ៊ុយក្រែន។
កូរ៉េខាងត្បូងថ្លែងថាយន្តហោះរុស្ស៊ី និងចិនហោះរំលងដែនអាកាសរបស់ខ្លួន។ ហេតុនេះខ្លួនបានផ្ញើកំណត់ទូតទៅសេនានុព័ន្ធយោធា (ប្រចាំស្ថានទូតរបស់ប្រទេសទាំង២នៅកូរ៉េខាងត្បូង) ដើម្បីបង្ហាញការកើតទុក្ខមិនសុខចិត្តចំពោះបញ្ហានេះ។ មន្ត្រីជាន់ខ្ពស់នៅក្រសួងការពារជាតិកូរ៉េខាងត្បូងថ្លែងថាយោធារបស់យើងនឹងចាត់វិធានការឆ្លើយតបយ៉ាងសកម្មបើយន្តហោះរបស់ប្រទេសទាំង២មានសកម្មភាពអ្វីមួយជាបន្តទៀត។ នេះបើយោងតាមការផ្សាយរបស់ឆេនណល ញូស៍ អេស៊ា (Channel News Asia) និងប្រភពដទៃទៀត៕
ចែករំលែកព័តមាននេះ