ខេត្តកំពត ៖ តាមសេចក្តីរាយការណ៍ពីការិយាល័យកណ្តាលនគរបាលព្រហ្មទណ្ឌខេត្តបានឱ្យដឹងថា កូន ប្រុសអកតញ្ញូម្នាក់ឈ្មោះ ណុំ សុខរឿន អាយុ២៧ឆ្នាំ បានចាក់និងកាប់ម្តាយស្លាប់ ដោយសារតែសុំលុយហើយគ្មានលុយឱ្យ…
ខេត្តកំពត ៖ តាមសេចក្តីរាយការណ៍ពីការិយាល័យកណ្តាលនគរបាលព្រហ្មទណ្ឌខេត្តបានឱ្យដឹងថា កូន ប្រុសអកតញ្ញូម្នាក់ឈ្មោះ ណុំ សុខរឿន អាយុ២៧ឆ្នាំ បានចាក់និងកាប់ម្តាយស្លាប់ ដោយសារតែសុំលុយហើយគ្មានលុយឱ្យ រួចក៏បានរត់គេចខ្លួនបាត់មួយរយៈ ។
នៅរសៀលថ្ងៃទី២៨ ខែមេសា កម្លាំងនគរបាលការិយាល័យព្រហ្មទណ្ឌកម្រិតធ្ងន់ខេត្ត និងនគរបាលស្រុកកំពង់ត្រាច សហការជាមួយនគរបាលខេត្តពោធិ៍សាត់ និងនគរបាលស្រុកវាលវែង បានចុះស្រាវជ្រាវរហូតឈានទៅឃាត់ខ្លួនកូនប្រុសបាតដៃប្រឡាក់ឈាមនេះដែលសម្ងំលាក់ខ្លួននៅភូមិទួលក្រួស ឃុំប្រមោយ ស្រុកវាលវែង ខេត្តពោធិ៍សាត់ ។ ក្រោយពីឃាត់ខ្លួន ក៏បាននាំមកកាន់ស្នងការដ្ឋាននគរបាលខេត្តកំពត ដើម្បីសាកសួរនិងកសាងសំណុំរឿងបញ្ជូនទៅសាលាដំបូង ។
គួររំលឹកថា ករណីសម្លាប់ម្តាយបង្កើតនេះបានកើតឡើងចន្លោះពីម៉ោង៧ទៅម៉ោង១១យប់ថ្ងៃទី២២ ខែមេសា នៅភូមិដំណាក់កន្ទួត ឃុំដំណាក់កន្ទួតខាងត្បូង ស្រុកកំពង់ត្រាច ។ជនឈ្មោះ ណុំ សុខរឿន ដែលជាមនុស្សញៀនថ្នាំ បានសម្លាប់ម្តាយបង្កើតឈ្មោះ រៀម ហែ អាយុ៥០ឆ្នាំ ឲ្យស្លាប់ក្នុងថ្លុកឈាមយ៉ាងអាណោចអាធ័ម រួចហើយកូនប្រុសអកតញ្ញូរូបនេះរត់គេចខ្លួនបាត់ និងទើបពេលនេះសមត្ថកិច្ចខេត្ត
កំពត សហការជាមួយសមត្ថកិច្ចខេត្តពោធិ៍សាត់ ស្រាវជ្រាវចាប់ខ្លួនបាន ៕
ចែករំលែកព័តមាននេះ